O bolesti šaka, usta i stopala

Bolest šaka, usta i stopala virusna je infekcija koja dovodi do nastanka malih čireva u ustima i plikova na šakama (dlanovima) i stopalima. Bolest uzrokuju virusi iz roda enterovirusa. Pošto uzročnici mogu biti različiti virusi, djeca često imaju više epizoda ove infekcije tokom djetinjstva.

Bolest šaka, usta i stopala najčešće se javlja tokom ljeta i jeseni.

Laike često zbunjuje sličnost u nazivu ove bolesti i bolesti kopita i usta (slinavka i šap), koja pogađa krave, ovce i neke druge domaće životinje. Ova dva oboljenja ne treba miješati – niti ljudi mogu dobiti slinavku i šap, niti životinje mogu oboljeti od bolesti šaka, usta i stopala.

Kako se infekcija prenosi?

Bolest šaka, usta i stopala zarazna je bolest od koje obično obolijevaju djeca, posebno ona predškolskog uzrasta. Širi se uglavnom direktnim kontaktom, jer se virus nalazi u tečnom sadržaju plikova. Virus se može izolovati i iz stolice zaražene djece.

Dijete koje ima bolest šaka, usta i stopala izrazito je zarazno sve dok se plikovi u potpunosti ne sasuše.

Simptomi bolesti šaka, usta i stopala 

Simptomi se obično javljuju 4–6 dana nakon inficiranja virusom.

Bolest najčešće počinje blagom i nespecifičnom groznicom, dan ili dva prije nego što se pojave ostali simptomi.

Mali čirevi u ustima prvo se pojavljuju na unutrašnjoj strani obraza, na desnima i bočnim stranama jezika. Djeca se nekad žale na bol u ustima ili grlu, a dešava se i da odbijaju da jedu i da uzimaju tečnost.

Neka djeca imaju glavobolju i bolove u mišićima, blage bolove u stomaku ili osjećaj mučnine.

Mali plikovi se javljuju i na šakama i stopalima (obično na dlanovima i tabanima). Nekad se na zadnjici djeteta pojave sitne crvenkaste mrlje.

Plikovi i čirevi se obično povlače nakon 7–10 dana bolesti.

Da li dijete treba odvesti kod ljekara zbog ove bolesti?

Ako mislite da Vaše dijete ima bolest šaka, usta i stopala ili ne možete da utvrdite uzrok osipa, treba da posjetite ljekara.

Odmah odvedite dijete kod ljekara ili u najbližu dječju bolnicu s odjeljenjem za hitne slučajeve ukoliko:

• odbija tečnost i čvrstu hranu;
• pokazuje znake dehidracije – mokri manje nego obično, ima izraženo bljedilo, gubi na tjelesnoj težini, ima „upale oči“, hladne ruke i stopala, stalno drijema;
• veoma je pospano i opšte stanje mu je lose;
• ima glavobolju, ukočen vrat ili bol u leđima;
• ima problema pri hodu ili vrtoglavicu.

Liječenje bolesti šaka, usta i stopala

Za bolest šaka, usta i stopala ne postoji specifična terapija; većina djece relativno brzo ozdravi sama od sebe i sve se odvija bez ikakvih problema i komplikacija.

Paracetamol ili ibuprofen mogu ublažiti nelagodu i bolove.

Važno je da dijete unosi dovoljno tečnosti kako bi izbjeglo dehidraciju. To može biti poseban izazov ako su usta djeteta bolna. Pokušajte s rastvorom za oralnu rehidraciju, koji se može kupiti u bilo kojoj apoteci.

Ako je gutanje hrane izrazito bolno za dijete, najbolje bi bilo da mu nekoliko dana pripremate meku hranu, da izbjegavate začine i namirnice intenzivnog ukusa, poput paradajza, limuna, grejpfruta i pomorandže.

Ne pokušavajte da puknete plikove – time povećavate rizik od infekcije kože i širenja virusa na drugu djecu.

Prevencija bolesti šaka, usta i stopala  

Pažljivo pranje ruku glavna je preventivna mjera, koja može pomoći da se širenje virusa svede na minimum. Posebno je važno pridržavati se ove mjere u vrtićima i predškolskim ustanovama, ali i kod kuće, npr. nakon mijenjanja pelena.

Sve dok se plikovi potpuno ne sasuše, dijete ne bi trebalo da ide u vrtić, školu ili neku drugu vaspitno-obrazovnu ustanovu.