Rekomandime për aktivitetin fizik, kohën e qëndrimit para ekranit dhe gjumin për fëmijën në vitin e dytë të jetës

Jeta e shëndetshme dhe formimi i zakoneve të duhura kërkojnë një shpërndarje adekuate të aktiviteteve të përgjithshme ditore, të cilat mund të shihen si kohë e aktivitetit fizik (me intensitet të lehtë, mesatar ose të fuqishëm), gjumit dhe kohë që një fëmijë e kalon ulur (koha e kaluar ulur).

Nuk është e lehtë të planifikohen aktivitete të përditshme për një fëmijë të kësaj moshe. Ato përcaktohen jo vetëm nga mosha, por edhe nga nevojat individuale të secilit fëmijë. Koha e rregulluar mirë për: aktivitetet fizike, kohën e kaluar ulur (shujtat, qëndrimin në veturë, në një karrocë fëmijësh ...) dhe kohën e kaluar në gjumë mund të ndikojë ndjeshëm në përmirësimin e rezultateve shëndetësore të një fëmije.

Fëmijët në vitin e 2-të të jetës

Fëmija i kësaj moshe duhet të kalojë të paktën 180 minuta gjatë gjithë ditës në një shumëllojshmëri aktivitetesh fizike, përfshirë aktivitetin fizik me intensitet mesatar deri në intensitet të fuqishëm.
Pozicioni i pushimit relativ në një karrocë fëmijësh, karrige të lartë, karrige fëmijësh në veturë ose në mbajtëse fëmijësh nuk duhet të zgjasë më shumë se 1 orë.
Ekspozimi ndaj pajisjeve me ekran nuk rekomandohet deri në fund të vitit të dytë, kur koha para ekranit duhet të jetë jo më shumë se 1 orë, me pushime të shpeshta dhe praninë tuaj të detyrueshme.
Ju jeni mësuesi më i rëndësishëm i fëmijës suaj, por mos harroni se ekspozimi i fëmijës suaj ndaj këtyre pajisjeve mund të ndikojë në mënyrën se si ai/ajo ndihet dhe sillet, në atë që ai/ajo mëson dhe mendon.
Fëmija ka nevojë për gjumë të cilësisë së mirë. Ju duhet të përshtatni vënien e fëmijës tuaj në gjumë sipas nevojave të tij/saj, duke pasur parasysh se nevojat e përafërta për gjumë ditën dhe natën janë nga 11 deri në 14 orë në ditë.

Aktiviteti fizik me intensitet të lehtë përfshin aktivitete gjatë të cilave një fëmijë përdor 1.5 deri 4.0 herë më shumë energji sesa gjatë pushimit: larje, ecje e ngadaltë, aktivitete të tjera të rastësishme; ato nuk rezultojnë në nxehtësinë e fëmijës.

Aktiviteti fizik me intensitet mesatar deri në intensitet të fuqishëm përfshin aktivitete ku një fëmijë përdor 4-7 herë më shumë energji sesa gjatë pushimit: ecje e shpejtë, çiklizëm, vrapim dhe lojëra me top, kërcim, not, vallëzim etj.; gjatë së cilës fëmija nxehet dhe nuk merr frymë lirshëm.