Prindërit dhe koha e kaluar para ekranit: të qenit model i mirë për fëmijët

Çfarë është përdorimi i shëndetshëm i ekranit?

Përdorimi i shëndetshëm i ekranit është përdorimi i teknologjisë në mënyra të ekuilibruara dhe pozitive.

Ka të bëjë me arsyen se për çka i përdorni ekranet tuaja si dhe sa kohë kaloni duke i përdorë ato. Po ashtu ka të bëjë me pranimin e faktit, që koha që e kaloni para ekranit është vetëm një nga mënyrat që ju bën të relaksoheni dhe argëtoni -  por nuk është e vetmja mënyrë.

Si ndikon te fëmija mënyra si i qaseni ekraneve?

Fëmija juaj ndikohet shumë nga mënyra se si i përdorni ekranet dhe ka të ngjarë të kopjojnë atë që bëni, veçanërisht kur ai/ajo rritet.

Për shembull, nëse të pëlqen t’i shfletosh rrjetet sociale për pak kohë dhe pastaj të dalesh për një shëtitje si familje, kjo ia përcjell fëmijës mesazhin se mediat sociale janë vetëm një mundësi për t’u zbavitur dhe për t’u çlodhur. Gjithashtu i jep fëmijës ide për mënyra të tjera për ta kaluar kohën e tij/saj. Veçanërisht për parashkollorët, krijoni një mjedis me shumë opsione dhe materiale kreative, aktive - shih artikujt e shumtë me sugjerime për aplikacione falas të këtij lloji.

Mirëpo në qoftë se ju shqetësoheni, nëse nuk jeni ne internet për një orë, kjo dërgon një mesazh të ndryshëm. Në mënyrë të ngjashme, marrja e telefonit tuaj në banjë kur bëni dush mund të dërgojë mesazhin se vërtet nuk mund të jetoni pa telefon.

Ekranet mund të pengojnë ndërveprimet midis prindërve dhe fëmijëve – për shembull, nëse prindërit i ndërpresin bisedat me fëmijët për të kontrolluar mesazhet tekstuale. Nëse kjo ndodh shpesh, fëmijët mund të mendojnë se nuk janë të rëndësishëm. Kjo gjithashtu mund të çojë në sjellje si qarja ose zemërimi, sepse fëmijët nuk mund ta fitojnë vëmendjen e prindërve të tyre me sjellje pozitive.

Të qenit model për kalimin e kohës së shëndetshme para ekraneve (pajisjeve elektronike): këshilla

Ja disa ide për kalimin e kohës së shëndetshme para ekranit, që mund t’i përdorni për të dhënë një shembull të mirë për fëmijën tuaj:

• Lini mënjanë çdo ditë pak kohë pa telefon, kështu që mund të jeni “aty” me fëmijën tuaj. Kjo mund të ndodh, kur fëmija kthehet në shtëpi nga çerdhja ose nga shkolla ose kur ju ktheheni nga puna, gjatë vakteve familjare, kur jeni jashtë me fëmijën e kështu me radhë.
• Nëse e merrni një mesazh me tekst ose një përditësim të mediave sociale derisa jeni duke folur me dikë, veçanërisht fëmijën tuaj, prisni derisa biseda të përfundojë para se ta kontrolloni atë.
• Përpiquni të mos e mbani telefonin, tabletin apo laptopin në dhomën e gjumit gjatë natës. Karrikoni pajisjet brenda natës në një zonë të përbashkët.
• Fikeni televizorin në kohën e ngrënies së ushqimit, ose kur është thjesht ri i ndezur “në sfond”. Në vend të kësaj mund të provoni të dëgjoni pak muzikë.
• Punoni me fëmijët për të krijuar një plan të mediave familjare. Pjesë të ndryshme të planit do të aplikohen në mosha të ndryshme. Kjo duhet të përfshijë shmangien e ekraneve tërësisht deri në moshën 2 vjeç dhe ekspozimin shumë të kufizuar për parashkollorët. Ju mund të përfshini parime, si nuk ka telefon celular në kohën e ngrënies. Atëherë sigurohu që edhe ti t’i ndjekësh udhëzimet e planit!
• Përdorni ekranet në një mënyrë pozitive – për shembull, për të mbajtur kontakt me familjen dhe miqtë duke dërguar tekste, duke bërë video thirrje ose duke i përdorur mediat sociale. Ky është i vetmi lloj i përdorimit të ekranit që rekomandohet për foshnjat dhe fëmijët e vegjël.
• Bëni pushime dhe lëvizni rregullisht kur jeni duke përdorur ekranet. Përdore pajisjen tënde në nivelin e syve për një qëndrim të mirë.
• Mos i përdorni gjithmonë ekranet për ta argëtuar fëmijën në situata si udhëtime të gjata me makinë ose në takime. Përpiqu ta ndërlidhësh me gjëra si të gjesh lojëra, të lexosh apo të vizatosh.

Mbaj shënim kohën e ekranit për një javë. Përfshini gjithë kohën e përdorimit të ekranit – TV, video lojëra, media sociale, tekste e kështu me radhë. Nëse mendoni se po përdorni ekrane më shumë se ç'do të donit, atëherë zvogëloni përdorimin.

Përdorimi i shëndetshëm i rrjeteve sociale dhe të qenit model: këshilla

Përdorimi i shëndetshëm i mediave sociale mund t’ju mbajë të lidhur me miqtë dhe gjërat që ju interesojnë, lajmet më të fundit, shkollën e fëmijës tuaj dhe aktivitetet sportive, e kështu me radhë.

Nëse përdorni dhe kënaqeni me mediat sociale, ka shumë mënyra se si mund të jeni një model për fëmijën tuaj:

• Kontrollo rregullisht cilësimet e privatësisë në llogaritë e mediave sociale.
• Kini kujdes në lidhje me fotografitë dhe komentet që i postoni dhe fotografitë dhe komentet ku jeni etiketuar. Sigurohu që të jesh gjithmonë i respektueshëm në postimet e tua.
• Fol për përdorimin e mediave sociale me fëmijët e tu më të mëdhenj. Kjo do ta inkurajojë atë të jetë i hapur rreth përdorimit të rrjetetve sociale. Nëse ndani përmbajtje argëtuese mes vete, mund të jetë një mënyrë e shkëlqyeshme për të folur për gjërat që ju pëlqejnë të dyve dhe mendoni se janë të rëndësishme.
• Kërkojini leje fëmijës tuaj më të madh para se të postoni një fotografi të saj ose t’i ndani informacionet për të në mënyrë publike.

Nëse koha e kaluar para ekranit duket se është jashtë kontrollit, përpiqu të ndryshosh mënyrën se si e përdor teknologjinë. Miqtë mund ta mbështesin njëri-tjetrin, nëse ky zakon është i vështirë për t’u thyer. Nëse fëmija të sheh, duke u përpjekur të kontrollosh kohën e kaluar para ekranit, kjo lë një shembull të mirë edhe për të.