Ushqyerja e foshnjës me qumështin e gjirit të një gruaje tjetër

Përgjatë historisë njerëzore, fëmijët të cilët ishin larguar nga gjiri i nënës së tyre, shpesh ushqeheshin me gji nga gra të tjera; dihej se këta fëmijë kishin shanse shumë më të mira për të mbijetuar sesa fëmijët e ushqyer me qumësht shtazor. Kur përparimet teknologjike bënë të mundur prodhimin e formulave, nevojat për mëndesha u ulën dhe fëmijët filluan të ushqeheshin me ushqim artificial/ qumësht formulë.

Duke pasur parasysh njohjen e rolit të domosdoshëm të qumështit të njeriut për shëndetin e fëmijëve, Organizata Botërore e Shëndetësisë dhe organizatat e tjera ndërkombëtare rekomandojnë qumështin e njeriut, domethënë qumështin e një gruaje tjetër, si zgjedhjen tjetër më të mirë, nëse qumështi i nënës së tyre nuk është i disponueshëm. Këto janë gra që ushqejnë me gji fëmijët e tyre dhe janë të gatshme të mbledhin qumësht të tepërt dhe ta dhurojnë atë për të ushqyer foshnjat që kanë nevojë.

Për të ushqyer fëmijët e lindur para kohe dhe të sëmurë, organizohen bankat e qumështit; ata mbledhin, përpunojnë, ruajnë dhe grumbullojnë në mënyrë të sigurt qumështin e nënave dhe donatorëve të tyre. Bankat e qumështit njerëzor ekzistojnë në qendrat mjekësore që trajtojnë foshnjat e lindura para kohe në Beograd dhe në kohët e fundit edhe në Novi Sad.

Edhe pse pothuajse të gjitha gratë mund të ushqejnë me gji, ka ende një numër të vogël të nënave që nuk prodhojnë qumësht ose që nuk mund të ushqejnë me gji për arsye mjekësore, për shkak të barërave ose trajtimeve të tjera, operacioneve të mëparshme të gjirit etj.

Bankat e qumështit të njeriut kanë sasi të kufizuar të qumështit në dispozicion. Qumështi nga bankat e qumështit nuk mund t'u jepet fëmijëve të shëndetshëm që nuk kanë qasje në qumështin e nënave të tyre. 

Një burim tjetër mund të jetë "ndarja joformale" e qumështit të njeriut. Kjo do të thotë që fëmija merr drejtpërdrejt qumështin e një gruaje tjetër, zakonisht nga miqtë e familjes ose të afërmit; megjithatë, kohët e fundit, ka pasur gjithashtu "tendencë" të furnizimit me qumësht njerëzor në internet, e cila sigurisht nuk është një praktikë e rekomanduar.

Kur merrni vendimin për të ushqyer fëmijën tuaj me qumësht të një gruaje tjetër, duhet të dini:

• gjendjen shëndetësore të dhuruesit;
• nëse ajo pi duhan, konsumon alkool ose ndonjë drogë;
• nëse ajo përdor ndonjë medikament;
• nëse ajo është testuar për viruse (HIV, hepatiti B, citomegalovirus);
• nëse qumështi mblidhet dhe ruhet në përputhje të rreptë me masat higjienike;
• nëse transportohet siç duhet.

Përgjegjësia për dhurimin joformal të qumështit njerëzor qëndron si tek donatori ashtu edhe tek prindërit që e pranojnë dhe e përdorin atë për të ushqyer fëmijën e tyre. Nëse gruaja që dhuron qumësht është dikush nga mjedisi juaj, anëtar i familjes ose mikesha, sigurohuni që të jeni të informuar mirë për shëndetin dhe stilin e saj të jetesës. Kërkoni asaj që të testohet për viruset që mund të transmetohen përmes qumështit të njeriut dhe sigurohuni që qumështi të mblidhet, ruhet dhe transportohet në mënyrë të sigurt.

Pasterizimi i qumështit të marrë në këtë mënyrë zvogëlon rrezikun e transmetimit të virusit. Nëse fëmija juaj ka lindur para kohe ose i sëmurë, ushqyerja me qumësht të marrë në këtë mënyrë nuk rekomandohet.