Pse është e rëndësishme aleanca prindërore për kujdesin ndaj fëmijëve?

Ndërtimi i një aleance prindërore fillon në shtatzëni, kur çifti kërkon mënyra për t’i ndarë përvojat dhe ndjenjat që lidhen me zhvillimin e foshnjës para lindjes si dhe shqetësimet dhe pritjet nga vetja si prindër të ardhshëm.

Aleanca prindërore cilësore është e rëndësishme për familjen tuaj. Mund të sigurojë:

• menaxhimin e përbashkët të familjes, rutinat e reja të kujdesit për fëmijët dhe rutinat e ndryshuara që ndërlidhen me funksionimin e përditshëm.

Prindërit që kanë një aleancë të fortë prindërore përpiqen të përfshihen në kujdesin e përditshëm të fëmijëve dhe menaxhimin e shtëpisë në një mënyrë që ata e konsiderojnë të drejtë, të kujdesshëm dhe diskutojnë se çfarë dhe si mund të bëjnë.

• kujdesi për shëndetin mendor dhe emocionet e të dy prindërve.

Prindërit që kanë një aleancë të fortë prindërore përpiqen të flasin për ndjenjat e tyre, veçanërisht ato që kanë të bëjnë me rolet e reja dhe kujdesin për fëmijën. Ata kanë një mundësi më të mirë për t’i njohur ndjenjat afatgjata të pafuqisë, brengosjes dhe mbingarkimit nga detyrat e reja dhe të reagojnë në kohën e duhur, duke e ruajtur kështu shëndetin mendor të prindërve, si dhe kushtet cilësore të jetesës për fëmijën.

• duke folur për fëmijën dhe mbështetjen në zhvillimin tuaj si baba ose nënë. Asnjë prind nuk i ka zotëruar këto aftësi thjesht duke e marrë atë rol.

Aleanca prindërore është mbështetja më e afërt dhe më intensive që mund ta keni në zhvillimin e stilit të kujdesit për fëmijën tuaj, marrëdhënien tuaj me fëmijën tuaj dhe përvojën tuaj të të qenit prind.

• përfshirja e të dy prindërve në kujdesin për fëmijën.

Një aleancë e fortë prindërore do të thotë ta kuptosh rëndësinë e një marrëdhënie cilësore me të dy prindërit për zhvillimin e fëmijës. Për më tepër, një aleancë e fortë prindërore bazohet në idenë se të dy prindërit janë njësoj të aftë në të gjitha aspektet e kujdesit për fëmijën e tyre dhe se për t’u bërë të aftë, atyre u duhet kohë për ta njohur fëmijën e tyre dhe për të krijuar një marrëdhënie me të. Kjo është arsyeja pse aleanca prindërore cilësore do të kërkojë mënyra për të siguruar kohë të veçantë me fëmijën për të dy prindërit.

Hulumtimet tregojnë se një aleancë e fortë prindërore e mbron martesën kundër efekteve të mundshme negative të ndryshimeve në intimitet, që vijnë përmes prindërimit.

Është e rëndësishme ta keni parasysh se krijimi i një aleance të fortë prindërore është detyra juaj e përbashkët. Në ndjekje të kësaj detyre, ju mund të përballeni me shumë sfida:

• familja ose mjedisi juaj, mund ta konsiderojnë nënën si një prind më të aftë dhe mund të zhvillojnë pritshmëri të tilla tek ju. Në fakt kjo krijon presion dhe stres të madh për të dy prindërit. Kjo bindje është hedhur poshtë nga shkenca – pasi të dy prindërit kanë mundësi të barabarta për të zhvilluar kujdes cilësor për fëmijën.
• mund të hasni me mesazhin sipas së cilit pritet që nëna të dijë dhe të jetë në gjendje të bëjë më shumë në organizimin e përditshëm dhe kujdesin ndaj fëmijëve dhe se informacioni dhe njohuritë rreth prindërimit u transmetohen kryesisht nënave. Ndonjëherë, nën ndikimin e mesazheve të tilla nga reklamat dhe shpesh edhe nga profesionistë, familjet “bien në grackë” dhe ia caktojnë nënës detyrën e menaxhimit të kujdesit të fëmijëve dhe shtëpisë dhe babait rolin “ndihmës”. Ju mund të keni përshtypjen se ka justifikime për këtë ndarje rolesh - babai punon, nëna është në shtëpi dhe të ngjashme? Mirëpo është e rëndësishme të merret vendimi së bashku se kush çfarë do të bëjë çfarë, duke vlerësuar ndjenjat dhe nevojat e njëri-tjetrit, si dhe duke siguruar mundësi që të dy ta njihni fëmijën dhe të mësoni se si të kujdeseni për të.