Të ushqyerit me gji gjatë udhëtimit

Gjatë udhëtimit, ju mund ta ushqeni fëmijën tuaj me gji ashtu siç e keni ushqyer gjithmonë. Megjithatë, para se të niseni, është mirë të përgatiteni dhe të informoheni.

Udhëtimi me makinë

Është më e lehtë të udhëtohet me makinë me një fëmijë të vogël. Udhëtimi me një foshnje është shumë më i lehtë se kur fëmija është më i madh. Gjatë udhëtimit, fëmija juaj duhet të jetë gjithmonë në karrigën për fëmijë të sigurtë, të përshtatshme për moshën. Kur është koha për të ushqyer me gji, ndaloni makinën.

Udhëtim me aeroplan

Gjatë ngritjes dhe uljes, për shkak të ndryshimit të presionit të ajrit, ndiejmë presion mbi veshët (daullen e veshit). Fëmija juaj mund të jetë i shqetësuar për shkak të kësaj. Ushqyerja me gji do ta ndihmojë atë të zvogëlojë sikletin dhe dhimbjen. Foshnja juaj duhet të ketë një rrip sigurie për foshnje gjatë ushqyerjes me gji.

Nëse planifikoni të sillni qumështin e shtrydhur të gjirit tuaj, kontrolloni me linjën ajrore nëse ka ndonjë kufizim për sjelljen e lëngjeve në aeroplan; ndiqni rekomandimet për ruajtjen dhe transportimin e qumështit të shtrydhur të gjirit.

Ushqyerja me gji në vende të tjera

Nëse udhëtoni jashtë vendit, është e dobishme të mësoni rreth pikëpamjeve mbi ushqyerjen me gji në vendin e destinacionit. Ju mund të merrni informacione online ose nga një agjenci udhëtimi.

Ushqyerja me gji në publik është e pranueshme në shumicën e vendeve, por në disa vende nëna pritet të mbulohet gjatë dhënies së gjirit; merrni me vete një shall ose batanije për të mbuluar veten gjatë gjidhënies.

Sasia e reduktuar e qumështit

Gjatë udhëtimit, mund të vëreni se sasia e qumështit zvogëlohet, për shkak të stresit, lodhjes, dehidrimit. Çfarë duhet të bëni për të parandaluar këtë:

• Pushoni sa më shumë që të jetë e mundur, duke përfshirë edhe pushimet gjatë ditës;
• Pini shumë lëngje, mundësisht ujë;
• Hani rregullisht, më shpesh se zakonisht;
• Shmangni kafe, çaj dhe pije të tjera me përmbajtje kafeine.

Medikamentet dhe ushqyerja me gji

Nëse jeni duke marrë ndonjë medikament gjatë udhëtimit, për vjellje, ënjtje të këmbëve ose për arsye të tjera, konsultohuni me mjekun tuaj nëse është e sigurt t'i merrni ato barëra gjatë gjidhënies.

Ushqyerja me gji në bregdet

• Uji i ftohtë i detit nuk do të ndikojë në ushqyerjen me gji, uji i detit nuk përmban asnjë përbërës që do të ndikonte në prodhimin e qumështit;
• Ju do të kënaqeni me notin edhe më shumë se zakonisht; noti do të lehtësojë dhimbjen e shpinës që çdo nënë ndjen, dhe gjithashtu mund të kontribuojë në humbjen e peshës së tepërt.
• Banjot e diellit (rrezitjet) nuk kanë efekt në ushqyerjen me gji; kujdesuni që gjinjtë tuaj ose areolat të mos digjen nga dielli, sepse mund të jetë shumë e dhimbshme.
• Kremrat e diellit nuk hyjnë në qarkullimin e gjakut në sasi të mëdha; megjithatë, rekomandohet përdorimi i një kremi bimor. Kur aplikoni kremërat, kini kujdes që të mos e aplikoni atë në zonat nga ku fëmija mund ta gëlltisë.
• Mos përdorni produkte vetë-nxirëse gjatë dhënies së gjirit.
• Pas notit, hiqeni kostumin tuaj të lagur të banjos; lagështia e mbajtur rreth thithkave në një kostum sintetik, është e favorshme për zhvillimin e infeksioneve fungale (mykotike).
• Nëse jeni duke ushqyer me gji në plazh, lani gjinjtë me ujë të freskët para se të ushqeni me gji, për të larë djersën, rërën dhe kripën e detit. Uluni të qetë në hije me fëmijën tuaj, nëse do t'ju bëjë të ndiheni më rehat, mbuloni veten me një shall të lehtë.

A duhet ta ushqej me gji fëmijën tim më shpesh gjatë pushimeve verore?

Në nxehtësinë e verës, foshnjave gjithashtu u rritet nevoja për lëngje. Një foshnje e ushqyer ekskluzivisht me gji merr ujë vetëm nga qumështi i gjirit, kështu që asaj duhet t'i ofrohet për të thithur sa më shpesh. Fëmija vetë do të kërkojë të thithë më shpesh; mos u habisni nëse këto vakte janë të shkurtra; fëmija juaj ka etje, jo uri, prandaj qumështi i fillimvaktit, me përmbajtje më të lartë të ujit, i mjafton. Nëse fëmija juaj tashmë është duke marrë ushqim të ngurtë, pas moshës 6 muajshe, jepni atij/saj ujë për të pirë më shpesh.