Djegiet e fëmijëve dhe si të parandalohen ato - situata të veçanta

Uji i ngrohtë, objektet e nxehta ose produktet piroteknike janë shkaqe të zakonshme të djegieve te fëmijët. Megjithatë, duhet të merret parasysh edhe mundësia e djegies si pasojë e rrezatimit në diell.

Kujdesi i veçantë gjatë gatimit:

Kur gatuani, gjithmonë qëndroni pranë sobës/furrës dhe mos e lini kurrë pa mbikëqyrje ushqimin që është duke u gatuar! Dorezat e tenxhereve, të enëve, tiganëve, xhezveve të kafesë duhet të kthehen gjithmonë drejt murit kur janë sipër sobës, për t'i bërë ato të paarritshme për fëmijën. Çfarë tjetër mund të bëni:

Monitoroni dhe kufizoni përdorimin e sobës, mikrovalës dhe pajisjeve tjera të ngrohjes nga fëmijët më të rritur.
Sa herë që është e mundur, gatuani ushqim në pllakën e sobës që është më larg.
Fëmijët e vegjël dhe foshnjat nuk duhet të jenë pranë sobës ose në kuzhinë!

Asnjëherë mos mbani në të njëjtën kohë edhe fëmijën edhe një enë me lëng ose ushqim të nxehtë!
Kurrë mos lini pranë fëmijëve ushqim të nxehtë dhe lëngje pa mbikëqyrje.
Asnjëherë mos vendosni ushqim të nxehtë në një tavolinë me mbulesë, të cilën fëmija mund të tërheqë!
Mos e lini fëmijën e vogël pa mbikëqyrje në dhomë ku ka burim të hapur të nxehtësisë (p.sh. një hekur i ndezur) ose në të cilin diçka po gatuhet!
Mësojini fëmijët më të rritur se si duhet të merren me pajisjet e ngrohjes dhe ta kufizojnë përdorimin

Kujdes i veçantë kur e lani fëmijën:

Kontrolloni temperaturën e ujit para se të fusni fëmijën në vaskë!
Kufizoni temperaturën maksimale të ujit në ngrohësin e ujit — vendosni termostatin maksimum në 60^oC.
Nëse do lani foshnjën ose fëmijën, gjithmonë hapni fillimisht ujin e ftohtë dhe pastaj ujin e ngrohtë.
Para se ta vendosni fëmijën në vaskë, sigurohuni që ta kontrolloni temperaturën e ujit dhe mos e lini fëmijën pa mbikëqyrje!

Pajisjet piroteknike nuk janë për fëmijët!

Mos lejoni që fëmijët të luajnë vetë me objekte që çlirojnë shkëndija, ndërsa përdorimi i fishekzjarrëve është diçka që ju nuk duhet t’ua lejoni fëmijëve tuaj!

Bëjeni të sigurt kohën që fëmija e kalon në diell!

Mbroni fëmijën duke shmangur ekspozimin në diell nga ora 10:00 deri në 17:00, duke përdorur mbrojtje adekuate të kokës (kapuç ose kapelë të gjerë), veshje me ngjyra të lehta, syze dielli me mbrojtje 100% UVA dhe UVB dhe mbrojtje me faktor të lartë nga dielli (mbi 30), dedikuar posaçërisht për lëkurën e fëmijëve, i cili duhet të përdoret në përputhje me udhëzimet e prodhuesit.