Infeksioni i traktit urinar (ITU-të) tek foshnjat dhe fëmijët e vegjël

Tek foshnjat dhe fëmijët e vegjël, simptomat e infeksioneve të traktit urinar (ITU) përfshijnë nervozizëm, ushqyerje të dobët dhe temperaturë në shumë raste. Fëmija ose foshnja juaj duhet të kontrollohet nga një mjek sa më shpejt që të jetë e mundur nëse ka simptoma të ITU. Mjekët do të analizojnë urinën e fëmijës suaj për të diagnostikuar ITU-në. Antibiotikët zakonisht përdoren për të trajtuar ITU-në. Mjeku gjithashtu mund ta referojë fëmijën tuaj për një ekografi për t'u siguruar që nuk ka probleme në kanalet urinare.

Disa informacione rreth infeksioneve të traktit urinar (ITU-të) tek fëmijët

Infeksionet e traktit urinar (ITU) shfaqen kur bakteret që hyjnë në traktin urinar përmes uretrës ose përmes gjakut, futen në urinë dhe më pas rriten në fshikëz.

ITU-të janë mjaft të zakonshme tek foshnjat dhe fëmijët e vegjël. Rreth 4% e foshnjave preken nga ITU-të në 12 muajt e parë. Në këtë moshë, djemtë prekën më shumë nga ITU-të sesa vajzat.

Fëmijët që kanë anomali në strukturën e veshkave ose të traktit urinar kanë më shumë gjasa të preken nga ITU-të. Por nëse fëmija juaj i vogël prekët nga ITU-të, kjo nuk do të thotë domosdoshmërisht se ai/ajo ka një anomali të traktit urinar.

Simptomat e infeksioneve të traktit urinar tek foshnjat dhe fëmijët e vegjël

Tek foshnjat dhe fëmijët e vegjël, simptomat e infeksioneve të traktit urinar (ITU) mund të duken si simptoma të shumë problemeve të tjera shëndetësore. Nëse fëmija juaj është prekur nga një ITU, ajo/ai mund të:

ketë ethe të pashpjegueshme
të irritohet dhe të qajë shumë
të pakësojë ushqyerjen e saj/tij
të ketë vjella
të jetë jashtëzakonisht i/e përgjumur
të ketë shtim të dobët në peshë
të ketë pelenë me ngjyrë si p.sh gjak

ITU-të tek fëmijët më të rritur janë të ndryshme nga ITU-të tek foshnjat dhe të vegjlit. Nëse fëmija juaj më i madh ka një infeksion të traktit urinar, ai/ajo mund të ketë djegie gjatë urinimit, ose mund të ndjejë nevojë për të urinuar më shpesh.

A ka nevojë fëmija juaj që të vizitohet nga mjeku për infeksione të traktit urinar (ITU)?

Po. Ju duhet ta dërgoni fëmijën tuaj te mjeku ose të shkoni menjëherë në repartin e urgjencës pediatrike nëse fëmija juaj ka temperaturë të lartë, të pashpjegueshme ose nëse në përgjithësi nuk ndjehet mirë.

Analizat që duhen kryer për infeksionet e traktit urinar (ITU-ve)

Mjekët nuk mund të diagnostikojnë një infeksion të traktit urinar (ITU) vetëm sipas simptomave të fëmijës suaj. Ata duhet të ekzaminojnë edhe urinën e fëmijës suaj. Mjeku gjithashtu mund ta dërgojë fëmijën tuaj për një ekografi për t'u siguruar që nuk ka probleme në traktin urinar. Nëse identifikohen probleme, fëmija juaj mund të dërgohet për konsultë tek nefrologu ose mjeku i veshkave pediatër - domethënë një mjek i specializuar për problemet e veshkave në moshën fëminore.

Trajtimi i infeksioneve të traktit urinar (ITU)

Foshnjave nën tre muaj zakonisht duhet tu jepet antibiotikë drejtpërdrejtë në venë për të trajtuar infeksionin e traktit urinar (UTI). Kjo do të thotë se ata/ato duhet të trajtohen në spital.

Foshnjat më të mëdha se tre muaj ndonjëherë mund të trajtohen në shtëpi me antibiotikë me administrim oral.

Parandalimi i infeksioneve të traktit urinar (ITU-të)

Ju nuk mund të parandaloni infeksionet e traktit urinar (ITU-të) tek foshnjat dhe fëmijët e vegjël. Dhe nëse foshnja juaj ka nevojë për trajtim spitalor për një ITU, kjo mund të jetë mjaft shqetësuese. Mund tju ndihmojë që të dini se shumica e foshnjave dhe të vegjëlve i kalojnë shpejt ITU-të dhe nuk kanë nevojë për trajtim të vazhdueshëm.