Dehidratimi

Çfarë është dehidratimi?

Nëse fëmija juaj humbet shumë lëngje trupore ose nuk pi mjaftueshëm, ai/ajo mund të dehidratohet.

Gastroenteriti është shkaktari më i shpeshtë i dehidratimit. Kjo ndodh sepse mund ta bëjë fëmijën tuaj të humbasë shpejt shumë lëngje trupore. Çdo sëmundje me diarre të vazhdueshme, të vjella ose marrje të reduktuar të lëngjeve mund të rezultojë në dehidratim.

Djersitja e madhe gjithashtu mund të rezultojë në dehidratim, veçanërisht tek foshnjat në mot shumë të nxehtë, ose tek fëmijët adoleshentë që janë duke bërë aktivitet energjik.

Simptomat e dehidratimit

Një fëmijë që është i dehidratuar mund të:

• urinojë më rrallë - një fëmijë më i vogël mund të ketë më pak pelena të lagura ose pelenat e tij/saj mund të mos jenë aq të lagura si zakonisht
• duket i/e dobët dhe i/e zbehtë
• jetë i/e lodhur, letargjik/e ose nervoz/e
• ketë më pak lot
• jetë i/e etur
• ketë sy të lodhur dhe të errët
• ketë një gjuhë dhe gojë të bardhë dhe të thatë.

Kur duhet të vizitoni mjekun për shkak të dehidratimit

Ju duhet të vizitoni mjekun nëse:

• jeni të shqetësuar se fëmija juaj mund të jetë i/e dehidratuar
• fëmija juaj vjell shpesh dhe nuk mund të mbajë asnjë lëng
• fëmija juaj ka shumë diarre
• fëmija juaj është më i/e vogël se gjashtë muaj dhe ka simptoma dehidratimi.

Dërgojeni fëmijën tuaj menjëherë në emergjencën e spitalit nëse:

• fëmija juaj ka simptoma të dehidratimit të rëndë - ai/ajo nuk po urinon, është i/e zbehtë dhe i/e hollë, ka sy të lodhur, duar dhe këmbë të ftohta dhe është i/e përgjumur ose nevrik,
• nëse fëmija juaj ka dhimbje të forta stomaku,
• të vjellat e fëmijës tuaj janë ngjyrë jeshile ose kanë gjak në të,
• nëse jeni të shqetësuar se fëmija juaj është shumë i/e sëmurë.

Ju e njihni fëmijën tuaj më së miri, kështu që besoni instinkteve tuaja nëse fëmija juaj nuk duket mirë. Shenjat që tregojnë se fëmija juaj ka një sëmundje serioze që kërkon kujdes urgjent mjekësor përfshijnë dhimbje të forta, përgjumje, lëkurë të zbehtë ose të kaltër, dehidratim, frymëmarrje të trazuar, konvulsione dhe reagim të reduktuar.

Trajtimi i dehidratimit

Ju mund t’i trajtoni rastet e lehta të dehidratimit duke i dhënë fëmijës tuaj më shumë lëngje.

Një alternativë është lëngu rihidratues oral. Këto lëngje mund t'i blini pa recetë në farmaci.

Opsione të tjera përfshijnë ujë, limonadë të holluar, shurup ose lëng frutash. Nëse jeni duke pirë një pije me sheqer, është e rëndësishme ta holloni atë - pini një pjesë të limonadës, shurupit ose lëngut në katër pjesë të ujit.

Fëmija juaj mund të mos ketë dëshirë të pijë. Mund të përpiqeni ta bëni atë të pijë më shumë duke i dhënë pije me anë të një shiringe ose luge, ose duke e lënë të thithë akullore të bërë nga lëngjet. 

Nëse fëmija juaj po vjell, zakonisht është më mirë t'i ofroni sasi të vogla, por shpesh në kohë. Për shembull, jepini fëmijës disa gllënka çdo 15 minuta.

Nëse keni një foshnjë më të madhe se gjashtë muaj në gji, vazhdoni ta ushqeni me gji, por ushqejeni më shpesh. Ju mund t'i jepni fëmijës suaj lëng shtesë për rihidratim oral ndërmjet vakteve.

Nëse foshnja juaj është më e madhe se gjashtë muaj dhe ushqehet me shishe, jepini atij/asaj lëng për rihidratim oral për 12-24 orët e para dhe më pas rifutni formulën e plotë në vakte më të vogla dhe më të shpeshta. Ju ende mund të ofroni lëngje shtesë për rihidratimin oral midis vakteve.

Në raste më të rënda, fëmija juaj mund të ketë nevojë të shkojë në spital për ta monitoruar humbjen e lëngjeve.

Në shumë raste, mënyra më e sigurt dhe më e shpejtë për ta bërë këtë është nëpërmjet një tubi të vogël që futet në hundën e fëmijës tuaj dhe më pas në stomakun e tij/saj. Lëngjet rihidratuese kalojnë nëpër këtë tub. Në të kundërt, fëmijës suaj do t'i jepen lëngje në mënyrë intravenoze (drejtpërsëdrejti në venë).

Parandalimi i dehidratimit

Mënyra më e mirë për të shmangur dehidratimin e konsiderueshëm është ta vizitoni mjekun tuaj nëse fëmija juaj ka një sëmundje që e bën atë të humbasë shumë lëngje ose të ndalojë së piri.

Në ditët e nxehta ose kur fëmija juaj është duke bërë aktivitet fizik, ai/ajo duhet të qëndrojë i/e hidratuar. Sigurohuni që të ketë mjaftueshëm ujë në dispozicion në mënyrë që fëmija juaj të mund të pijë nëse ka etje. Mund t'ju duhet t'u kujtoni disa fëmijëve që të kenë pushime të rregullta për pije.