Përgatitja e qumështit formulë dhe higjiena e enëve

Nëse e ushqeni fëmijën tuaj me formulë, ndiqni udhëzimet për përgatitjen dhe ruajtjen e formulës, si dhe ruajtjen e higjienës së enëve. Sistemi imunitar i foshnjës nuk është aq i fortë sa të luftojë infeksionet dhe qumështi është një mjet ideal për shumimin e baktereve.

Përgatitja e ujit për formulën

  • Kur përgatitni formulën për fëmijën tuaj, hapi i parë është që të lani gjithmonë duart me sapun dhe ujë, është gjithashtu e rëndësishme që sipërfaqja e punës që përdorni të jetë e pastër.
  • Zjeni ujë të freskët në sobë ose në cajnikun elektrik. Lëreni të ftohet për jo më shumë se 30 minuta në temperaturën e dhomës, (kështu uji arrin në temperaturën e duhur për përgatitjen e sigurt të formulës - 70 gradë)
  • Mund të derdhni ujin e zier të ftohur në shishe sterile dhe ta mbani në frigorifer derisa të keni nevojë. Shishet duhet të jenë të mbyllura fort, me një unazë dhe një kapak të përshtatshëm.

Përgatitja e formulës

  • Lexoni udhëzimet e përgatitjes në paketimin e formulës; kontrolloni që nuk ka skaduar.
  • Derdhni sasinë e kërkuar të ujit të zier, të ngrohtë në temperaturën 70 gradë, në shishe.
  • Duke përdorur kupën matëse nga paketa e formulës, shtoni sipas instruksioneve të përgatitjes numrin e kërkuar të lugëve sipas sasisë së ujit:
  • është e rëndësishme që të matni saktësisht sasinë e pluhurit (mbushni kupën matëse me majë, niveloni sipërfaqen e sipërme me një spatul plastike); qumështi i përgatitur në këtë mënyrë do të përmbajë të gjithë përbërësit në sasinë e parashikuar të treguar në etiketë. Mos e holloni ose trashni formulën vetë.
  • Mbyllni fort shishen me një unazë dhe kapak.
  • Shkundni shishen ose prekni butësisht pjesën e poshtme të saj në tryezë për ta bërë pluhurin të bjerë në fund; pastaj tundeni shishen fuqishëm për të shpërndarë pluhurin.
  • Hiqeni kapakun dhe zëvendësojeni me një biberon
  • Para se të filloni të ushqeni fëmijën tuaj, kontrolloni temperaturën duke pikuar disa pika në pjesën e brendshme të kyçit tuaj. Qumështi duhet të jetë i vakët, asnjëherë i nxehtë.

Nëse fëmija juaj nuk e përfundon shishen, hidhni qumështin e mbetur menjëherë pas vaktit, ose më së voni pas një ore. Mos e mbani qumështin e mbetur për më vonë ose për vaktin tjetër, sepse bakteret fillojnë të shumëzohen shpejt në shishen e përdorur. Mos shtoni formulë në shishen e përdorur. Përgatitni çdo vakt veç e veç.

A mund të përgatitet formula paraprakisht?

E mira është të përgatitni formulën menjëherë para se të ushqeni fëmijën. Nëse keni nevojë të përgatitni formulën paraprakisht, ftoheni dhe vendoseni në frigorifer në një shishe të mbyllur fort, jo më vonë se një orë pas përgatitjes; përdoreni atë brenda 24 orëve. Mbajeni shishen në pjesën e pasme të frigoriferit, ku temperatura është më e ulët dhe konstante, jo në derë. Nëse jeni duke udhëtuar ose planifikuar një qëndrim më të gjatë jashtë shtëpisë, mënyra më e sigurt është të merrni ujë të zier dhe formulë pluhur në kontejnerë të veçantë. Nëse planifikoni të sillni formulë tashmë të përgatitur, përgatiteni paraprakisht, ftoheni në frigorifer dhe mbajeni në një qese më të ftohtë me pako akulli. Ju mund ta ktheni formulën e përgatitur dhe të ruajtur në këtë mënyrë në frigorifer nëse nuk kanë kaluar më shumë se dy orë; sigurohuni që ta përdorni brenda 24 orëve.

Ngrohja dhe ftohja e formulës së qumështit

Mënyra më e sigurt për të ngrohur formulën është zhytja e shishes në një tas me ujë të nxehtë. Ngrohësit e veçantë të shisheve mund të përdoren nëse termostati i tyre është në rregull. Mos e mbani shishen në ngrohës për më shumë se 10 minuta, për të shmangur rritjen e baktereve në qumështin ose formulën tuaj. Pas ngrohjes, shkundni butësisht shishen për të barazuar temperaturën e qumështit dhe kontrollojeni në dore. Nëse e mbingrohni aksidentalisht qumështin, ftoheni nën një rrjedhë me ujë të ftohtë.

Mos e ktheni qumështin e ngrohur në frigorifer për përdorim të mëvonshëm. Mos e ngrohni qumështin në mikrovalë; do të nxehet në mënyrë të pabarabartë dhe mund të djegë gojën e foshnjës!

Higjiena e enëve

  • Për të parandaluar infeksionet e foshnjës tuaj, kujdesuni për higjienën e enëve të ushqimit. Lani enët me ujë të ngrohtë dhe detergjent pas çdo vakti. Përdorni një furçë për shishe; mbajeni biberonin nën ujë të rrjedhshëm për të pastruar hapjen e ngushtë. Hidhni biberonat e dëmtuara menjëherë.
  • Hapi tjetër është sterilizimi. Nëse sterilizoni enët me ujë të nxehtë, duhet t'i zjeni në sobë për 5 minuta; pastaj prisni që të ftohen plotësisht, nxirrini dhe thajini. Ju gjithashtu mund të përdorni një sterilizues me avull. Mos i vendosni enët në mikrovalë për t'i sterilizuar ato; do të dëmtohen ose shkrihen.
  • Ruajini veglat e sterilizuara në një enë të pastër dhe të mbyllur dhe përdorini brenda 24 orëve.
  • Sterilizimi i enëve të ushqimit kërkohet deri në moshën 12 muajsh.