Si t'i parandalojmë pickimet e insekteve?

Në disa raste, pickimi i bletës, grerëzës ose arëzës mund të shkaktojë reaksione alergjike kërcënuese për jetën, ndërsa mushkonjat janë bartëse të mundshme të sëmundjeve të ndryshme infektive. Shmangni vendet, në të cilat grumbullohen insektet - ujë të ndenjur në natyrë ose në oborre (pishina, shatërvanë), kopshte me lule, përzierje plehrash, kazanë dhe kontenierë plehrash. Zbrazni enët dhe zbrazni pellgjet e panevojshme të ujit përreth shtëpisë. Ja çfarë tjetër mund të bëni për t’u mbrojtur nga pickimi i insekteve:

• Keni kujdes në trafik: insektet mund të hyjnë në makinë nga dritaret e hapura dhe të shqetësojnë shoferin dhe pasagjerët.
• Instaloni rrjeta sigurie në dritaret dhe dyert e oborrit/ballkonit dhe kontrolloni rregullisht gjendjen e tyre.
• Gjeni dhe hiqni foletë e insekteve me ndihmë profesionale, veçanërisht pranë vendeve ku fëmijët kalojnë kohë dhe luajnë.
• Gjithashtu hiqni insektet e ngordhura. Thumbat e tyre janë po aq të rrezikshëm, pavarësisht nga fakti se insekti është i ngordhur.
• Bëni zgjedhjen e duhur të këpucëve për fëmijët. Në vend që të ecin zbathur ose të veshin këpucë të hapura (sandale, pantofla), këpucët e mbyllura sigurojnë mbrojtje më të mirë kundër pickimit të insekteve.
• Përshtasni rrobat e fëmijëve. Ngjyrat e ndezura tërheqin insektet, ndërsa nuancat e bardha, të gjelbra dhe ngjyra kafe e hapur janë më të papëlqyeshme për to.
• Shmangni përdorimin e produkteve kozmetike dhe të kujdesit personal që përmbajnë aroma të forta.
• Disa ushqime dhe pije tërheqin insektet. Ëmbëlsirat, akulloret, frutat, pijet e ëmbla, shalqini dhe peshku ton janë shembuj të ushqimeve që i tërheqin insektet. Shmangi ato ose mbulojini kur hani jashtë.
• Shpjegojini fëmijës si të sillet kur has insekte të rrezikshme. Nëse ka një insekt të rrezikshëm në afërsi, mos u përpiq ta largosh duke e tundur, goditur ose duke ikur, por ngadalë largohu nga vendi.
• Mbrojini fëmijët nga mushkonjat dhe rriqrat. Mëngët e gjata dhe pantallonat e gjata, çorapet dhe kapelja sigurojnë një shkallë më të madhe mbrojtjeje nga mushkonjat gjatë periudhave të aktivitetit të tyre (në mbrëmje), si dhe nga rriqrat kur fëmija lëviz nëpër pyje, bimë të larta ose bar. Pasi të ktheheni nga natyra, sigurohuni t’i kontrolloni flokët, kokën, qafën, dhe lëkurën në të gjithë trupin e fëmijës për të zbuluar ndonjë rriqër.
• Kontrolloni edhe kafshët e shtëpisë pas një shëtitjeje në natyrë, pasi rriqrat mund të barten edhe në lëkurën (qimet) e tyre.

Në rast se fëmija juaj ka pasur ndonjëherë një reaksion alergjik ndaj pickimit të insekteve, në konsultim me mjekun, bëni një plan veprimi në rast se ai/ajo pickohet përsëri dhe informoni këdo që kujdeset për fëmijën ose është përkohësisht përgjegjës për të (të afërmit, edukatoret e çerdhes/mësuesit e shkollës etj.).