|
Sindroma e Vdekjes së Papritur të Foshnjave (SVPF/SIDS)
Ndodh te fëmijët deri në një vit, kryesisht gjatë gjumit. Më së shpeshti ndodh midis muajit të dytë dhe të katërt të jetës, është më e zakonshme te djemtë, në dimër dhe te fëmijët që nuk ushqehen me gji.
Sindroma e vdekjes së papritur të pashpjegueshme në fëmijëri
Ndodh te fëmijët më të mëdhenj se një vjeç, gjithashtu ndodh më shpesh në gjumë, por është më e rrallë sesa te foshnjat.
Shkaku i vërtetë i kësaj gjendjeje ende nuk është përcaktuar, por shkencëtarët besojnë se një kombinim i karakteristikave të zhvillimit të fëmijës, faktorëve e lidhur me nënën dhe mjedisin shpien në shfaqjen e kësaj sindrome.
Faktorët më të zakonshëm të rrezikut
- pozicioni – fjetja me bark,
- fjetja në sipërfaqe shumë të buta
- fjetja në të njëjtin shtrat me prindërit
- vendosja e lodrave të buta dhe jastëkut në krevatin e fëmijës
- lindja e parakohshme ose pesha e ulët në lindje
- paaftësia e trupit për të zbuluar dioksidin e tepërt të karbonit në gjak
- vështirësi në zgjimin e fëmijës
- mbinxehja e trupit
- ekspozimi ndaj tymit të duhanit gjatë shtatzënisë dhe pas lindjes
- kujdes jo adekuat para lindjes
- kushte të këqija socio-ekonomike të jetesës
- foshnjat nga shtatzënitë binjake ose të shumëfishta
- intervali i shkurtër midis shtatzënive
- mosha e nënës nën 20 vjeç
- infeksionet e traktit respirator.
Si t’i zvogëloni gjasat e shfaqjes së kësaj gjendje?
- Foshnja duhet të flejë me shpinë (sepse është pozicioni më i sigurt – e zvogëlon probabilitetin për vdekje të papritur me 50%).
- Foshnja duhet të flejë në krevatin e tij/saj.
- Foshnja nuk duhet të flejë në të njëjtin shtrat me prindërit, por duhet të flejë në të njëjtën dhomë me ta.
- Në krevatin e foshnjës nuk duhet të ketë lodra (veçanërisht ato prej pelushi (kadife)), jastëkë ose mbulesa të rënda (jorganë, batanije të rënda, etj.).
- Shmangni mbinxehjen e dhomës ku fle fëmija dhe veshjen e fëmijës shumë trashë. Temperatura e dhomës duhet të jetë 18-22 ° C)
- Mos e ekspozoni foshnjën ndaj tymit të duhanit - mos pini duhan në dhomën ku qëndron fëmija, madje është mirë që ta shmangni plotësisht pirjen e duhanit në shtëpi.
- Përdorni një aparat alarmi për bebe - për monitorimin e vazhdueshëm të fëmijës dhe gjendjen e tij/saj.
- Ushqejeni me gji foshnjën për të paktën gjashtë muaj, sepse e zvogëlon mundësinë e infeksioneve të rrugëve të frymëmarrjes, të cilat janë një nga faktorët e rrezikut për zhvillimin e kësaj gjendje.
- Tek fëmijët më të mëdhenj është e rëndësishme një dietë e përshtatshme dhe regjimi i gjumit - fëmija nuk duhet të shkojë në shtrat menjëherë pasi të ushqehet.
- Nëse fëmija ka vështirësi të zgjohet - si dhe çrregullime të ngjashme, duhet t'i raportohen pediatrit.
Aktualisht nuk ka produkte ose agjentë në treg, përdorimi i të cilave mund të parandalojë sindromën e vdekjes së papritur. Njohja me bazat dhe teknikat e ndihmës së parë dhe reanimimi kardiopulmonar janë thelbësore për parandalimin e vdekjeve, prandaj prindërve u rekomandohet t’i mësojnë këto aftësi.
|
