Ара төрөлгөн баланын дене тили

Ара төрөлгөн баланын дене тили жөнүндө Ара төрөлгөн жана ай-күнү жетип төрөлгөн ымыркайлардын дене тили бири-биринен айырмаланат. Себеби ара төрөлгөн ымыркайлар тийүүлөргө жана ызы-чууга дээрлик сезимтал болушат жана анча күчтүү эмес. Мисалы, ара төрөлгөн баланын абалын дем алуунун жыштыгынан, терисинин түсүнөн жана дене булчуңдарынын жыйрылышынан байкаса болот. Бул көрүнүштөр тез өзгөрүп кетиши мүмкүн, бирок сизге балаңыздын өзүн кандай сезип жаткандыгы тууралуу түшүнүк берет. Мындан тышкары, 24-жумада төрөлгөн ымыркайдын дене тили 34-жумада төрөлгөн ымыркайдын дене тилинен айырмаланат. Мисалы, ара төрөлгөн ымыркайлар ай-күнүнө аз эле жетпей төрөлгөн наристелердей көзүӊүзгө көпкө чейин же тез-тез карай албайт. Ара төрөлгөн балаңыздын дене тили жана реакциясы ал чоңойгон жана күч-кубатка толгон сайын өзгөрөт. Сиз балаңыздын жаӊсоо-ымдоолорун жакшыраак баамдап, ал өзүн кандай сезип жаткандыгын түшүнө баштайсыз. Мисалы, ара төрөлгөн ымыркайлар толук мөөнөттө төрөлгөн ымыркайлардай катуу үн чыгарып ыйлашпайт, бирок бир аз чоңойгондо көбүрөөк ыйлай баштаганын же көзүн албай көпкө чейин карап тура берерин байкасаңыз болот. Балаңыз чоңойгон сайын жүрүм-турумундагы өзгөрүүлөрдү байкайсыз, анан кээ бир “абалдары” түшүнүктүү боло баштайт. Мисалы, ай-күнү көбүрөөк жетпей төрөлгөн бала көп көзүн ача бербейт, ал эми чоңойгон сайын тез-тез ойгонуп турат. Ымыркай катуу уктап кетиши же куш уйку салышы, уйку-соонун ортосунда же ойгоо болушу мүмкүн, тынчы кетип, ыйлашы да ыктымал. Күн өткөн сайын балаңызды жакшыраак билип, түшүнө баштайсыз. Ара төрөлгөн ымыркай менен баарлашуунун эң жакшы учуру – анын ойгоо кези. Эгер балаңыз курсагы ток болсо жана эч нерседен кабатырланбаса, анда тынч жатып эс алат.

Ара төрөлгөн балаңыздын чаалыккандыгын билдирүүчү белгилер

Ара төрөлгөн ымыркайлар өзүн ыңгайсыз сезип, чарчаганын же стресс болгондо дене тили менен билдириши мүмкүн.

Төмөндө ара төрөлгөн баланын мындай абалынын айрым көрүнүштөрү келтирилди:

  • бала тез-тез ойгонуп, маанайы түшөт;
  • ойгонгондо ыңгайсызданганын көрсөтөт (ыңгыранат, чыргоолонот);
  • ымдоо-жаңсоо менен тынчсызданганын билдирет (чекесин тырыштырат);
  • колу-бутун башаламан жана капыстан кыймылдатып, колунун жана бутунун манжаларын ачып-жумат, колу менен бетин эрксиз жаап алат;
  • тез жана үстүртөн дем алат, баланын жүрөгүнүн согушу тездеши мүмкүн;
  • терисинин түсү өзгөрөт (кубарып, кызарып, көгүш тартып калат);
  • ымыркай оозун ачып эстейт, чүчкүрөт, ыктытат, какайт же кулгуйт.

Балаңызды колго алганда бул белгилерди байкасаңыз, үстүн жаап, аны кыймылдатпастан кармаңыз жана бир канча убакыт эч нерсе кылбаңыз. Ошенткенде ал оӊоюраак тынчтана алат.

Эгерде балаңыз инкубатордо болсо, кыймыл-аракетиндеги өзгөрүүлөрдү медайымга айтып, наристеге ыңгайлуу болуш үчүн айлана-чөйрөсүн өзгөртүүгө жардам берүүнү ойлонуӊуз. Мисалы, ызы-чууну, жарыкты басаӊдатуу же баланын абалын өзгөртүү керек болушу ыктымал.

Ара төрөлгөн ымыркайыңыздын беймарал болгондугунун белгиси

Ара төрөлгөн балаңыз эч кандай ыңгайсыздыктын белгилерин көрсөтпөсө эс алып, жайлуу жатат деп божомолдосоңуз болот.

Ара төрөлгөн наристе өзүн жакшы сезип жаткандыгын төмөнкү белгилерден да байкасаңыз болот:

  • ал тынч жана бир калыпта дем алат;
  • дене булчуңдары бош абалда;
  • колдору жана буттары жай кыймылдайт;
  • жагымдуу нерсени көргөндө кыймылдабай калат.

Балаңызга кызыктуу бир нерсени (мисалы, бетиңизди) тиктеп, тигилип кароо жагышы мүмкүн, бул учурда анын денеси кыймылсыз, дем алуусу жай болот. Бул анын кызыгып жаткандыгын көрсөтүү ыкмасы.

Ара төрөлгөн бала чоңойгон сайын сергек болуп, аз убакыт ойной алат. Бул учурларда ымыркай менен сүйлөшүп, ага кызыктуу оюнчук берип, колуңузга алып, ыр ырдап берсеңиз болот. Баланы чарчатпаш үчүн кыймылдуу оюндарды жайбаракат аракеттер менен айкалыштырганга аракет кылыңыз.