Эмоциялар жана оюндар: кичинекей балдар

Сиздин бала көбүнчө оюн аркылуу эмоцияларын билдирип, үйрөнөт. Бул жерде балаңызга сезимдерин билдирүүгө жана аны курчап турган дүйнөнү изилдөөгө жардам берүү үчүн бир нече оюн идеялары бар.

Балдардын эмоциялары жана оюндары

Ымыркайлар эмоцияларын жана аларды кантип билдирүүнү жаңыдан үйрөнө башташты. Оюн — бул балдардын үйрөнүүсүнүн жана өнүгүүсүнүн кадимки ыкмасы жана аларга бакыт же көңүл калуу сыяктуу сезимдерди ачууга жана билдирүүгө мүмкүнчүлүк берет.

Бул процессте сиз өзгөчө ролду ойнойсуз. Балаңыз менен ойноп, ага эмоцияны билдирүүгө үйрөнүүгө жардам берсеңиз болот.

Балаңыз менен ойноо — бул ортоңордогу өз ара аракеттенүү. Оюнчуктар – негизги нерсе эмес. Жөн гана кыйшактасаңыз — кичинекей балаңыз үчүн оюн болот. Жана бири-бириңердин көзүңөрдү карасаңар, бири-бириңер менен болгон байланышты да бекемдейсиңер.

Ымыркайлар дене тили аркылуу сезимдери жөнүндө көп нерсени айтып бере алышат. “Ымыркайлардан белгилер” окутуучу видеосубузда кичинекей балаңыз эмне “айтып” жатканын түшүнүүгө жардам бере турган жалпы “сигналдар” көрсөтүлгөн.

Баланын эмоциясынан эмнени күтүүгө болот

Сиздин кичинекей балаңыз төмөнкүлөрдү кылыш мүмкүн:

2-4 айлык кезинде катуу күлөт;
сегиз айдан баштап бейтааныш адамдарга этият мамиле кылат жана жаңы адамдардан корко баштайт — бул чоочун адамдардан коркуу деп аталат;
сизди башка чоңдордон артык көрөт жана сегиз айдан баштап дайыма сиз менен болгусу келет;
сегиз айдан баштап үйүңүздөгү бөлмөдөн чыгып кетсеңиз да, ажырашуудан коркуу белгилерин көрсөтөт;
10 айдан баштап сизди сүйүү менен кучактайт.

Баланын эмоциясын стимулдаштыруу үчүн оюндардын идеялары

Кичинекей балаңызга эмоцияны ачууга жана билдирүүгө жардам берген бир нече оюндун идеялары:

Балаңыз менен музыка жаратыңыз. Оюнчуктар же жөнөкөй аспаптар менен ырдоо же үн чыгаруу сыяктуу музыкалык оюндар балдарга эмоцияларын сыртка чыгарууга жардам берет.
Балаңыз менен ойноп жатканда ага тийиңиз. Бул ага эмоцияны билдирүүгө жардам берет. “Каз-каз, га-га-га” сыяктуу ырларды колдонуп көрүңүз жана ырдап жатканда балаңыздын бутун кытыгылаңыз.
Кирдеп калуудан коркпоңуз — кум, ылай, боёк, пластилин, туздуу камыр, чопо менен ойногула. Бул чоңойгон балага материалдар кармаганда ар кандай болорун билүүгө жардам берет. Мисалы, кичинекей балаңыз колу менен ылайды кармалашы же сууну катуу чачыратышы мүмкүн. Жөн гана байкаңыз.
Жөнөкөй сезимдерди түшүндүрүү үчүн куурчактарды же оюнчуктарды колдонуңуз. Мисалы, сиз куурчактарды же оюнчуктарды колдонуп, мындай деп айта аласыз: “Унаа кубанууда, анткени автобус аны менен кошо бара жатат” же “Чычкан капланып жатат, ошондуктан мышык аны кучактады”.

Оюн үйрөнүү жана өнүгүү үчүн маанилүү болсо да — көңүл ачуу маанилүү. Эгер көңүлдүү болбосо, анда бул оюн эмес. Ошондуктан, оюнга келгенде балаңыздын жолун жолдоо маанилүү. Балаңыздын дене тили анын качан ойногусу келгенин жана качан тажаганын айтат.

Кичинекей бала эмоциясын билдирүүдө көйгөйлөрү бар деп ойлосоңуз, качан жардам сураш керек

Балдар ар кандай темпте өсүшөт жана өнүгүшөт. Адатта, баланын өнүгүүсүндөгү негизги учурлар бирдей тартипте болот, бирок алар болгон курак ар бир конкреттүү балада ар кандай болушу мүмкүн. Бир үй-бүлөдөгү балдар да ар кандай өнүгүшөт.

Сиз педиатрга кайрылгыңыз келиши мүмкүн, эгерде:

кичинекей балаңыз сизден дайыма жүзүн буруп, көзүңүздү карабайт;
кичинекей балаңыздын жүзү анын сезимдерин сейрек чагылдырат —мисалы, ал көңүлү ачык экенин же капаланганын сизге көрсөтпөйт.