Sfidat gjatë gjidhënies

Thuhet se gjidhënia është e lehtë, mirëpo ajo kërkon kohë dhe praktikë si për nënat ashtu edhe për foshnjat. Shumë nëna përjetojnë sfida me gjidhënie, por mbështetja e duhur mund t’i ndihmojë në tejkalimin e këtyre problemeve. 

Nëse përballeni me probleme me gjidhënie, kërkoni mbështetje nga ofruesi i kujdesit shëndetësor.

Këtu janë disa nga problemet më të zakonshme të gjidhënies dhe këshillat tona që mund t’ju ndihmojnë të gjeni zgjidhje.

1. Si të sigurohem që foshnja ime të jetë e puthitur mirë?

• Arritja e puthitjes së duhur është çelësi për t’u siguruar që ushqyerja me gji të jetë një përvojë e rehatshme si për ju ashtu edhe për foshnjën tuaj. Për t’u siguruar që foshnja juaj është puthitur mirë:
• Foshnja duhet të ketë hundën drejtpërsëdrejti përballë majës së gjirit tuaj.
• Lëreni kokën e foshnjës të anojë pak mbrapa në mënyrë që buza e sipërme të mund të ngjitet për majën e gjirit. Kjo mënyrë do t’ia hapë gojën.
• Kur goja e foshnjës është shumë e hapur, afrojeni shpejt te gjiri me kokën prapa dhe mjekrën përpara. Në këtë mënyrë, foshnja juaj mund të kapë pjesën më të madhe të gjirit dhe jo vetëm majën e gjirit.
• Gjiri juaj do të futet thellë në gojën e foshnjës tuaj dhe maja e gjirit tuaj do të vendoset përsëri në pjesën e butë të gojës së foshnjës suaj. Kështu do të jeni e sigurt që nuk do të lëndoheni (pezmatoheni) dhe foshnja juaj mund të thithë gjithë qumështin që i nevojitet.

Shenjat e lidhjes së mirë përfshijnë:

• Një përvojë e rehatshme pa dhimbje
• Areola më shumë është e dukshme mbi gojën e foshnjës tuaj sesa poshtë
• Goja e foshnjës suaj është e hapur gjerësisht
• Buza e poshtme e foshnjës është e kthyer jashtë
• Mjekra e foshnjës është duke prekur – ose pothuajse duke prekur – gjirin tuaj

2. Çfarë mund të bëj kur nuk kam qumësht mjaftueshëm?

Mund të jetë frustruese nëse ndiheni sikur nuk po keni qumësht të mjaftueshëm për foshnjën tuaj. Nëse jeni e shqetësuar për sasinë e qumështit, kontaktoni ofruesin e kujdesit shëndetësor. Në shumicën e rasteve, ka ndonjë arsye pse ndodh kjo dhe ata do t’ju ndihmojnë ta identifikoni.

Disa shkaqe të zakonshme të sasisë së ulët të qumështit përfshijnë:

• Vonesa në fillimin e ushqyerjes me gji
• Nuk ka fare ose ka shumë pak kontakt lëkurë me lëkurë
• Vonesa në ardhjen e qumështit për shkak të komplikimeve të lindjes, sëmundjes ose diabetit
• Afërsi e mangët
• Të ushqyerit në kohë të caktuara (fikse)
• Ushqyerjet e shkurtra
• Nuk ka ushqyerje gjatë natës
• Ushqyerjet e rralla
• Shqetësimi dhe stresi
• Mungesa e vetbesimit
• Mungesa e lidhjes emocionale
• Mospëlqimi i ushqyerjes me gji
• Lodhja

Për të ndihmuar në parandalimin e qumështit të pamjaftueshëm dhe për ta mbajtur një sasi të shëndetshme të qumështit të gjirit për foshnjën tuaj:

• Praktikoni kontaktin e hershëm lëkurë me lëkurë menjëherë pas lindjes dhe filloni ushqyerjen me gji sa më shpejt të jetë e mundur.
• Kërkoni mbështetje profesionale për ushqyerjen me gji pas lindjes për të siguruar lidhje të mirë dhe thithje efektive.
• Ushqeni vetëm me gji, përveç nëse plotësimi i furnizimit me qumësht është i nevojshëm nga pikëpamja mjekësore, ashtu siç ju udhëzon ofruesi i kujdesit shëndetësor.

3. Cilat trajtime janë në dispozicion për gjinjtë e fryrë?

Kur keni gjinj të fryrë, kjo mund të jetë jashtëzakonisht e dhimbshme. Ndërsa gjinjtë e mbushur mund t’ju bëjnë të ndiheni jo rehat, fryrja është një problem tjetër.

Shkaqet e zakonshme dhe mënyrat për të parandaluar fryrjen e gjinjve përfshijnë:

Kontaktoni ofruesin e kujdesit shëndetësor nëse i keni gjinjtë e fryrë.

4. Si mund ta parandaloj çarjen e majave të gjirit gjatë ushqyerjes me gji?
Majat e lënduara ose të çara të gjinjve zakonisht janë shenjë se foshnja juaj nuk është e puthitur siç duhet në gji kur ushqehet. Sigurohuni që foshnja juaj të ketë puthitje të mirë. Nëse njëra ose të dy majat e gjinjve tuaja fillojnë të çahen ose rrjedhin gjak, kontaktoni për mbështetje ofruesin e kujdesit shëndetësor sa më shpejt të jetë e mundur. Në shtëpi, provoni t’i lyeni me pak qumësht gjiri të shtrydhur pas ushqyerjes. Qumështi i gjirit ka veti shëruese që ndihmojnë në lehtësimin e dhimbjeve.

5. Çfarë e shkakton mastitin dhe bllokimin e kanaleve të qumështit? Si t’i parandaloj ato?
Qumështi i gjirit rrjedh nëpër një sistem kanalesh në gjinjtë tuaj për të arritur tek foshnja juaj. Ndonjëherë, një zonë e këtyre kanaleve mund të bllokohet, gjë që ndalon qumështin të rrjedhë lehtësisht. Kanalet e bllokuara mund të shkaktojnë dhimbje. Mastiti, inflamacioni i gjirit, mund të ndodhë kur një kanal i bllokuar nuk pastrohet ose kur grumbullimi i qumështit në gjirin tuaj shkakton ënjtje ose inflamacion. Flisni me ofruesin e kujdesit shëndetësor nëse po ndjeni dhimbje nga kanalet e bllokuara.

Disa shkaqe të bllokimit të kanaleve dhe mastitit përfshijnë:

• Ushqyerje të shkurtra ose të rralla me gji
• Mos heqja e qumështit nga një pjesë ose i gjithë gjiri si duhet
• Indet e dëmtuara të gjirit
• Bakteret që hyjnë në gji përmes një çarjeje në majat e gjinjve.

Për të ndihmuar në lehtësimin e dhimbjes dhe trajtimin e simptomave tuaja, provoni:

• Përmirësimin e heqjes së qumështit
• Forcimin e lidhjes së dobët emocionale
• Veshjen e rrobave të gjera
• Të ushqyerit me gji më shpesh
• Të masazhoni butësisht në drejtim të majave të gjinjve
• Vendosjen e një komprese të ngrohtë në zonën me dhimbje
• Pozicionet e ndryshme të të ushqyerit

Ushqyerja me gji nuk është punë që i takon vetëm 'një gruaje' dhe është shumë e zakonshme të hasësh në pengesa gjatë rrugës. 

Kontaktoni ofruesin e kujdesit shëndetësor për çdo shqetësim dhe flisni me familjen, miqtë dhe më të dashurit tuaj për t'ju mbështetur gjatë rrugës. Ju mund ta bëni këtë!