Dalja e dhëmbëve - si të ndihmoni fëmijën tuaj?

Për prindërit, shfaqja e dhëmbit të parë shpesh është shkak për festë, por mund të jetë edhe burim stresi dhe netë pa gjumë. Dhëmbët e disa foshnjave rriten pa asnjë vështirësi, ndërsa të tjerë dhëmbin e parë e nxjerrin me shumë lot dhe shqetësim.

Rritja e dhëmbëve zakonisht fillon ndërmjet muajit të 3-të dhe të 6-të. Disa foshnja lindin me një dhëmb, disave ju del dhëmbi i parë vetëm kur fillojnë të ecin.

Problemet e daljes së dhëmbëve përfshijnë: rritjen e jargëzimit, futjen e duarve në gojë, refuzimin e ushqimit të fortë, mishrat e dhëmbëve të fryrë, të skuqur dhe të lënduar, nervozizëm, ankth, zgjim gjatë natës, shfaqjen e jashtëqitjeve disi të lëngshme (pa diarre) dhe ndonjëherë një temperaturë të lehtë (jo më shumë se 38 gradë).

Si ta ndihmoni fëmijën:

Duke ftohur mishrat e dhëmbëve - përdorni dhëmbëzues që mund të ftohen në frigorifer, mos i mbani në ngrirje të thellë, sepse foshnja mund të lëndohet nga dhëmbëzuesi i ngrirë. Dhëmbët janë bërë zakonisht prej gome ose plastike të veçantë, në forma dhe dizajne të ndryshme miqësore për fëmijët. Përdorni gjithmonë dhëmbëzues të çertifikuar nga prodhues të verifikuar.
Masazhi për mishrat e dhëmbëve – lani duart tërësisht dhe masazhoni mishrat e dhëmbëve të fëmijës tuaj me gishtin tregues. Në treg gjenden xhel ose lëngje të ndryshme për aplikimin dhe masazhimin e mishrave të dhëmbëve të foshnjave. Këto xhele përmbajnë barëra medicinale, acid hialuronik ose një anestezik lokal. Përdorini ato sipas udhëzimeve të prodhuesit, sipas moshës së fëmijës.

Rritja e jargëzimit mund të shkaktojë acarim ose skuqje rreth buzëve, të cilat mund të shkaktojnë infeksion. Për të shmangur këtë, lani rregullisht fytyrën e foshnjës, thani zonën rreth buzëve, aplikoni një krem mbrojtës neutral. Vendosni një pelenë pambuku nën kokën e tij/saj gjatë gjumit dhe ndërrojini shpesh për të mbajtur fytyrën dhe faqet e foshnjës të thata gjatë gjithë kohës.

Shqetësimi që lidhet me daljen e dhëmbëve është i përkohshëm dhe butësia, vëmendja dhe rehatia juaj janë të domosdoshme gjatë kësaj periudhe.