Абарона немаўлят і старэйшых дзяцей ад сонца

Бяспека падчас знаходжання на сонцы: чаму гэта важна

Занадта працяглае знаходжанне на сонцы можа прывесці да сонечных апёкаў, пашкоджання скуры і зроку, раку скуры і паслаблення імуннай сістэмы.

Вашаму дзіцяці патрэбна сонца. Яно дапамагае арганізму выпрацоўваць вітамін D, важны для таго, каб косці і мышцы былі моцнымі. Але вы павінны быць уважлівыя да таго, як доўга сонечныя промні ўздзейнічаюць на скуру вашага дзіцяці.

Абарона ад сонца ў розныя поры года і час сутак

Абараняць сваё дзіця ад уздзеяння сонца ў розныя поры года і ў розны час сутак неабходна па-рознаму. Гэта абумоўлена тым, што ультрафіялетавае (УФ) выпраменьванне змяняецца на працягу года ў залежнасці ад сезону.

Самы высокі ўзровень УФ-выпраменьвання прыпадае на перыяд з 9:00 да 16:00 і залежыць ад пары года і ад таго, дзе вы знаходзіцеся. Вашаму дзіцяці неабходна абарона, калі яно знаходзіцца на сонцы пры ўзроўні УФ-выпраменьвання 3 і вышэй.

Праверце ўзровень УФ-выпраменьвання ў тым месцы, дзе вы знаходзіцеся, скарыстаўшыся адпаведнымі данымі з метэаралагічных справаздач.

Летам лепш за ўсё хадзіць на дзіцячую пляцоўку, у парк або на пляж раніцай ці бліжэй да вечара.

Цень

Цень забяспечвае вам і вашаму дзіцяці некаторую абарону ад УФ-выпраменьвання. Найбольш надзейнае такое сховішча, якое стварае цёмны цень.

Але нават у цені вы не будзеце цалкам абаронены ад ультрафіялетавага выпраменьвання. Таму ў любым выпадку выбірайце адзенне, якое абараняе вас і дзіця, у тым ліку сонцаахоўныя акуляры і капялюш з шырокімі палямі. А на адкрытыя ўчасткі скуры наносьце сонцаахоўны крэм.

Каб стварыць цень у дзіцячай калясцы, накрыйце яе тканінай, якая прапускае паветра. У некаторых дзіцячых калясак ёсць рэгулюемыя  казыркі, якімі можна ствараць цень пры змяненні становішча сонца.

Калі вы не можаце знайсці цень, выкарыстоўвайце парасон ці сонцаахоўны казырок. Для абароны дзіцяці ад сонца, калі вы едзеце з ім у машыне, заўсёды ўстанаўлівайце на бакавыя вокны шторкі на ліпучках.

Вы можаце падвяргацца ўздзеянню УФ-выпраменьвання, нават калі дзень нясонечны. Гэта значыць, што вы можаце згарэць і ў пахмурны ці прахалодны дзень або калі сонца адбіваецца ад будынкаў, вады, пяску ці снегу.

Ахоўнае адзенне, галаўныя ўборы і сонцаахоўныя акуляры

Вось некаторыя моманты, пра якія варта памятаць, выбіраючы сонцаахоўнае адзенне для свайго дзіцяці:

• Шчыльная тканіна дапамагае абараніць скуру вашага дзіцяці ад сонца. Паднясіце тканіну да святла і паглядзіце, колькі сонечных прамянёў праз яе праходзіць. Калі тканіна прапускае многа святла, яна таксама прапускае і шмат ультрафіялету.
• Доўгія рукавы і штаніны закрываюць большую частку скуры вашага дзіцяці. Калі для адзення, якое цалкам закрывае рукі і ногі, занадта горача, падыдуць шорты да каленяў і футболкі з рукавамі да локця.
• Сонцаахоўнае адзенне для плавання — гэта выдатны спосаб абараніць дзіця ад уздзеяння сонца, калі яно купаецца ці знаходзіцца ў вадзе.
• Адзенне з бавоўны халаднейшае, чым адзенне са штучных матэрыялаў.
• У свабодным адзенні будзе не так горача.

Звяртайце ўвагу на сонцаахоўнае адзенне з каэфіцыентам абароны ад ультрафіялету (UPF) 50+. Такі каэфіцыент забяспечыць найлепшую абарону ад сонца для вашага дзіцяці.

Галаўныя ўборы

Галаўны ўбор абараняе твар, шыю і вушы вашага дзіцяці ад ультрафіялетавага выпраменьвання. Лепшай абаронай будуць панамкі, шыракаполыя капелюшы і кепкі-легіянеркі. Звычайныя кепкі не рэкамендуюцца.

Для немаўлят падбярыце мяккую шапачку, каб дзіцяці было зручна ў ёй ляжаць. Завязкі дапамогуць утрымліваць шапачку на галаве. Павяжыце зашпількі з гузікамі ці доўгія завязкі за галавой дзіцяці або абрэжце іх, каб яны не пераціскалі шыю.

Многім немаўлятам і малым дзецям не падабаецца насіць галаўныя ўборы — не пераставайце апранаць іх, будзьце настойлівыя, і з часам галаўныя ўборы стануць звычайнай з’явай для вашага дзіцяці.

Сонцаахоўныя акуляры

Сонцаахоўныя акуляры і галаўны ўбор могуць дапамагчы абараніць вочы вашага дзіцяці. Выбірайце сонцаахоўныя акуляры, якія шчыльна прылягаюць да галавы і мацуюцца вакол яе. Працяглае ўздзеянне ультрафіялету з’яўляецца фактарам рызыкі для развіцця катаракты.

Уважліва сачыце за сваім дзіцем, яго галаўным уборам і адзеннем, каб пераканацца, што дзіця не трапляе пад прамыя сонечныя прамяні і знаходзіцца ў бяспецы.

Сонцаахоўны крэм

Наносьце водатрывалы сонцаахоўны крэм, які засцерагае ад абодвух тыпаў прамянёў (UVA і UVB), з каэфіцыентам абароны ад сонца (SPF) 30 ці вышэй на твар, рукі і любыя адкрытыя ўчасткі скуры. Не шкадуйце сонцаахоўнага крэму — звычайна людзі наносяць недастатковую колькасць, таму не атрымліваюць неабходнай абароны.

Наносьце сонцаахоўны крэм не менш чым за 20 хвілін да выхаду на вуліцу, а затым абнаўляйце кожныя дзве гадзіны, нават калі на цюбіку пазначана, што неабходна рабіць гэта радзей.

Пераканайцеся, што тэрмін прыдатнасці сонцаахоўнага крэму не скончыўся, і захоўвайце цюбік у прахалодным цёмным месцы пры тэмпературы ніжэй за 30 °C.

Памятайце пра тое, што сонцаахоўны крэм затрымлівае УФ-выпраменьванне, але не блакіруе яго цалкам. Вам па-ранейшаму неабходна хавацца ад сонца і апранаць дзіця ў сонцаахоўнае адзенне.

Сонцаахоўны крэм і немаўляты

Калі вашаму дзіцяці менш за шэсць месяцаў, лепш не наносіць на яго скуру сонцаахоўны крэм — цень, адзенне і галаўныя ўборы будуць для яго найлепшай абаронай.

Сонцаахоўныя крэмы з паметкай «для дзяцей» ці «для адчувальнай скуры» з меншай верагоднасцю выклічуць раздражненне скуры. Каб праверыць, ці не ўзнікне якіх-небудзь непажаданых рэакцый, заўсёды спачатку наносьце сонцаахоўны крэм на невялікі ўчастак скуры дзіцяці.

Узор для пераймання

Для свайго дзіцяці вы самы важны ўзор для пераймання, і яно капіруе тое, што вы робіце. Калі вы самі будзеце абараняцца ад сонца, то і ваша дзіця, хутчэй за ўсё, будзе рабіць тое ж самае.