Афтозны стаматыт

Афтозны стаматыт — гэта стан, пры якім на слізістай абалонцы поласці рота ўтвараюцца невялікага памеру акруглыя ўчасткі болек (афтаў, язвачак). Яны могуць размяшчацца на языку, паднябенні, унутраным баку шчок, вуснаў ці на дзяснах.

Прычынамі афтознага стаматыту могуць быць:

• вірусныя інфекцыі, напрыклад просты герпес або хвароба «рука-нага-рот» (вірус Каксакі);
• кандыдоз поласці рота (малочніца);
• механічныя пашкоджанні, траўмы, укусы, апёкі;
• дэфіцыт некаторых вітамінаў;
• алергічныя рэакцыі;
• некаторыя генетычныя захворванні;
• захворванні стрававальнай сістэмы, напрыклад негатыўная рэакцыя на глютэн або запаленчае захворванне кішэчніка;
• карыес і іншыя захворванні зубоў і дзяснаў;
• захворванні сістэмы крывятварэння (у вельмі рэдкіх выпадках язвы з’яўляюцца іх прыкметай).

Часам язвы могуць з’яўляцца без якой-небудзь відавочнай прычыны.

Сімптомы афтознага стаматыту

Язвы ў роце звычайна выглядаюць як круглыя ​​белыя кропкі на ўнутранай паверхні слізістай абалонкі рота або на паверхні дзяснаў ці языка.

Яны могуць быць балючымі, асабліва калі дзіця есць салёную ці вострую ежу. Яно можа нават адмаўляцца ад ежы да таго часу, пакуль язвы не пачнуць гаіцца.

Калі прычына з’яўлення язваў — інфекцыя, у дзіцяці можа падняцца тэмпература.

Калі звярнуцца да педыятра пры афтозным стаматыце

Пры падазрэнні на тое, што прычынай узнікнення афтаў стала інфекцыя поласці рота, трэба звярнуцца да педыятра.

Неабходна неадкладна пракансультавацца з урачом, калі язвы ў роце назіраюцца ў немаўляці ва ўзросце да 3 месяцаў, а таксама калі ў дзіцяці старэйшага ўзросту яны павялічыліся і з’явіліся іншыя сімптомы, напрыклад:

• страта вагі;
• боль у жываце;
• невытлумачальнае павышэнне тэмпературы цела;
• кроў або слізь у кале;
• скаванасць мышцаў шыі і стамляльнасць;
• язвы вакол ануса.

З’яўленне язваў у роце часам можа быць выклікана негатыўнай рэакцыяй на глютэн, запаленчым захворваннем кішэчніка і іншымі захворваннямі.

Лячэнне афтознага стаматыту

Простыя язвы пры афтозным стаматыце звычайна не патрабуюць лячэння і праходзяць на працягу тыдня.

Калі дзіця адчувае боль, можна паспрабаваць наносіць на балючае месца абязбольваючы гель для поласці рота. Такія гелі прадаюцца ў аптэках без рэцэпта. Калі дзіця ўжо дастаткова вялікае і ўмее прамываць ці паласкаць рот вадкасцю, не глытаючы яе, то можна паласкаць рот цёплай салёнай вадой.

У гэты перыяд трэба піць прахалодную ваду — патроху, але часта. Гэта дапаможа прадухіліць абязводжванне.

Існуюць спецыяльныя метады лячэння інфекцый поласці рота, выкліканых грыбамі роду Candida (малочніца) і вірусам простага герпесу. Педыятр раскажа пра іх, калі гэта будзе неабходна.