Аўтызм
Аўтызм — гэта складанае псіхічнае расстройства, якое ўключае ў сябе шэраг асаблівасцей паводзін дзіцяці, якія выяўляюцца ў раннім дзяцінстве.
Body
Не існуе аднолькавых людзей, таксама і няма падобных дзяцей з аўтызмам. Аднак для гэтага стану характэрны некаторыя сімптомы:
- дэфіцыт сацыяльна-эмацыянальнай узаемнасці, які выяўляецца ў парушэнні сацыяльнай дыстанцыі, цяжкасцях ініцыявання і падтрымання зносін, у зніжэнні здольнасці дзяліцца інтарэсамі, эмоцыямі, пачуццямі з навакольнымі людзьмі;
- дэфіцыт вербальнай і невербальнай камунікацыі: дзеці не ўстанаўліваюць або не падтрымліваюць візуальны кантакт, не разумеюць і не выкарыстоўваюць сацыяльныя або агульнапрынятыя жэсты, часта не карыстаюцца маўленнем;
- стэрэатыпныя формы паводзін і абмежаванасць інтарэсаў — напрыклад, дзіця часта і/або доўга кружыцца вакол сваёй восі, збірае толькі палкі, круціць колы ў машынках;
- сэнсарныя праблемы — напрыклад, дзіця можа быць звышадчувальным да гуку або святла, да пахаў і смакаў або, наадварот, у яго можа быць прыкметна зніжаны болевы парог.
Часта ўзнікаюць дадатковыя складанасці, такія як:
- цяжкасці з прыёмам ежы;
- праблемы са сном;
- трывожныя расстройствы;
- эпілепсія;
- дэпрэсія;
- праблемы з увагай;
- праблемы з каардынацыяй рухаў;
- самаразбуральныя паводзіны або прычыненне шкоды навакольным.
