Глядзім на зоркі

Што спатрэбіцца: цёплы напітак, цёплы світар і добры настрой.

У чым заключаецца гульня. Назіраць за зоркамі можна непасрэдна з ганка вашага дома, але яшчэ лепш будзе адправіцца ў цёмнае, ціхае і бяспечнае месца ўдалечыні ад святла горада.

Яснай ноччу прыгатуйце гарачы шакалад і закускі. Цёпла апраніцеся і вазьміце некалькі коўдраў ці спальных мяшкоў, калі яны ў вас ёсць.

Зручна ўсядзьцеся або ляжце на спіну і глядзіце на касмічны дыван над сабой. Няхай дзіця разгледзіць Месяц. Можа, ён яму нешта нагадвае? А дзіця зможа знайсці самую яркую зорку? Спытайце, колькі, на яго думку, ёй гадоў? Прапануйце выбраць адну з зорак і загадаць жаданне.

Дзіцяці старэйшага  ўзросту спадабаецца шукаць сузор’і (зорныя карты лёгка знайсці ў інтэрнэце і ўзяць з сабой), а весці зорны дзённік і запісваць, што бачыш, будзе цікава дзіцяці любога ўзросту. У пэўную пару года, калі пашанцуе, можна ўбачыць знічку.

Назіранне за зоркамі — выдатны занятак, для якога не патрабуецца ніякіх прыстасаванняў. Усё, што вам трэба, — гэта ясная ноч.

Чым карысная гульня. Дадзены занятак знаёміць дзяцей з Сонечнай сістэмай, а яшчэ гэта выдатны спосаб расказаць пра навуку, прыроду, гісторыю, космас і, вядома ж, іншапланецян.