Кал і мача

Ключавыя моманты: вялікая колькасць празрыстай бясколернай або светла-жоўтай мачы сведчыць пра тое, што ваша дзіця здаровае і атрымлівае дастаткова вадкасці; частата спаражнення кішэчніка, колер, кансістэнцыя і пах фекалій у немаўлят моцна адрозніваюцца; характар калу вызначаецца харчаваннем дзіцяці; праблемы з мочаспусканнем або дэфекацыяй (уключаючы запор і дыярэю) могуць узнікнуць у дзіцяці як прыкметы якога-небудзь захворвання. У выпадку праблем з дэфекацыяй і мочаспусканнем лепш пракансультавацца з педыятрам.

Мочаспусканне: што вам трэба ведаць

Вялікая колькасць вільготных падгузнікаў — добрая прыкмета: гэта паказвае, што ваша дзіця атрымлівае дастаткова малака і іншага харчавання. Па меры сталення дзіцяці выпадкі нетрымання мачы стануць радзейшымі, але па-ранейшаму гэта можа адбывацца не менш за 6–8 разоў на дзень.

Кожны раз, калі дзіця мочыцца, старайцеся за гэтым назіраць: характар струменьчыка ці колер плямы на падгузніку могуць многа сказаць пра здароўе вашага дзіцяці.

Вялікая колькасць празрыстай бясколернай ці светла-жоўтай мачы — гэта нармальна. Цяжкі падгузнік — прыкмета таго, што мачы многа. Рэдкае мочаспусканне ці больш цёмны колер мачы сведчаць пра тое, што ў вашага дзіцяці можа быць абязводжванне ці што яно атрымлівае недастаткова вадкасці.

Вам няма пра што турбавацца пры светла-ружовых ці аранжавых плямах. Яны выкліканы слабой рэакцыяй на хімічныя рэчывы ў падгузніках і даволі распаўсюджаны. Акрамя таго, часам на ўнутранай паверхні аднаразовага падгузніка могуць быць невялікія «крышталікі». Яны з’яўляюцца з падгузніка, а не ад вашага дзіцяці.

Калі плямы мачы чырвоныя або карычневыя і вы думаеце, што ў іх можа быць кроў, ці ваша дзіця не адчувае сябе добра, неадкладна звярніцеся да педыятра.

Кал: што вам трэба ведаць

Першыя фекаліі вашага нованароджанага дзіцяці — цёмна-зялёнае смалістае рэчыва, якое называюць меконіем. Гэта нармальная з’ява, вынік спаражнення страўніка і кішэчніка вашага дзіцяці пасля дзевяці месяцаў знаходжання ва ўлонні маці. Вы можаце назіраць кал цёмна-зялёнага колеру на працягу некалькіх дзён.

Наступныя этапы развіцця прадугледжваюць мноства разнастайных нармальных значэнняў, якія характарызуюць колер, форму, кансістэнцыю, пах і частату спараженняў немаўляці.

Адны немаўляты спаражняюцца некалькі разоў на дзень, іншыя — усяго некалькі разоў на тыдзень. Гэта нармальная з’ява.

Выдзяленне калу — звычайная з’ява падчас кармлення ці неўзабаве пасля яго. Гэта называецца страўнікава-колікавым рэфлексам.

Праз тыдні і месяцы вы можаце чакаць змены ў наступных характарыстыках дэфекацыі дзіцяці:

  • частата;
  • колер;
  • кансістэнцыя — яна можа быць цвёрдай, вадкай і якой-небудзь сярэдняй паміж першымі дзвюма;
  • пах — звычайна пах становіцца мацнейшым, калі дзіця пачынае есці цвёрдую ежу.

Як дыета ўплывае на характарыстыкі фекалій

Знешні выгляд фекалій вашага дзіцяці можа залежаць ад яго харчавання.

Асаблівасці калу пры грудным выкормліванні:

  • даволі мяккі ці нават вадкі, крыху падобны на гарчыцу, часта жоўта-аранжавага колеру, магчыма, зялёнага;
  • адыходзіць радзей, але будзе заставацца даволі мяккім, пакуль дзіця не пачне есці цвёрдую ежу;
  • не мае выражанага рэзкага паху, на што можа ўплываць тое, чым харчуецца маці.

Кал пры штучным выкормліванні:

  • звычайна больш шчыльны, але можа моцна адрознівацца па колеры і кансістэнцыі;
  • можа быць шэра-жоўтым (ці нават шэра-блакітным) або з адценнямі карычневага.

Пераход на іншую малочную сумесь можа прывесці да змены знешняга выгляду і кансістэнцыі фекалій.

Кал пры харчаванні дзіцяці цвёрдай ежай:

  • больш шчыльны, з рэзкім пахам;
  • можа ўтрымліваць неперавараныя часцінкі некаторых прадуктаў. Гэта звязана з тым, што стрававальная сістэма вашага дзіцяці ўсё яшчэ развіваецца. Звычайна гэта нармальна.

Праблемы з дэфекацыяй

Запор

Запор — гэта сітуацыя, калі фекаліі ў дзіцяці цвёрдыя і сухія, падобныя на маленькія шарыкі ці каменьчыкі. Дзіцяці складана выштурхнуць такі кал, што можа выклікаць у яго хваляванне.

Запор часцей за ўсё ўзнікае ў дзяцей, якія знаходзяцца на штучным выкормліванні. Звычайна гэта адбываецца, калі малочная сухая сумесь была прыгатавана з выкарыстаннем малой колькасці вады.

У немаўлят таксама можа ўзнікнуць запор пры ўвядзенні ў рацыён харчавання цвёрдай ежы — звычайна гэта адбываецца праз некалькі тыдняў пасля пачатку.

Калі ў вашага дзіцяці напружаная дэфекацыя цвёрдым сухім «каменепадобным» калам ці калі ў спаражненнях прысутнічае кроў, трэба звярнуцца па кансультацыю да педыятра.

Дыярэя

Дыярэя — гэта калі ў вашага дзіцяці вельмі вадкі ці нават вадзяністы стул, прычым больш часты, чым звычайна. Калі пры гэтым назіраецца яшчэ і рвота, то можна меркаваць пра наяўнасць кішэчнай інфекцыі. У гэтай сітуацыі важна неадкладна звярнуцца да педыятра, каб пераканацца, што ў вашага дзіцяці не развіваецца абязводжванне.

Бледныя фекаліі

Калі ў дзіцяці бледна-жоўтыя, белыя ці шэрыя фекаліі, асабліва пры спадарожнай жоўтай афарбоўцы скурнага покрыва, неадкладна звярніцеся да ўрача — гэта можа быць прыкметай рэдкага захворвання печані. Для ўдакладнення прычыны дадзенай сітуацыі спатрэбіцца дадатковае абследаванне. Таксама можна зрабіць фотаздымкі стулу і ўзяць узоры фекалій вашага дзіцяці для аналізу.