Кан’юктывіт нованароджаных і закупорка слёзнага канала

Лёгкае раздражненне вачэй ці выдзяленні з іх, звужэнне або закупорка слёзнага канала, а таксама кан’юктывіт з’яўляюцца найбольш частымі праблемамі, якія суправаджаюцца інфекцыямі вачэй у нованароджаных і немаўлят.

Слізістая абалонка вока

Слізістая абалонка вока, або злучальная абалонка (кан’юктыва), — празрыстая гладкая бліскучая структура, якая злучае тыльную паверхню павека і вочны яблык. Інфекцыя і запаленне слізістай абалонкі вока, якія ўзнікаюць у першы месяц жыцця дзіцяці, называюцца кан’юктывітам нованароджаных (Ophthalmia neonatorum). Інфекцыя, якая далучылася падчас родаў, гэта значыць у момант праходжання плода па родавых шляхах, можа выклікаць гнойнае запаленне. Прычынай узнікнення такой інфекцыі могуць быць бактэрыі ці вірусы. Найбольш частымі ўзбуджальнікамі з’яўляюцца ганакок (ганарэя), стрэптакок, хламідыі і вірус герпесу.

Сімптомы праяўляюцца ў перыяд ад 5 дзён да 2 тыдняў пасля нараджэння. Да іх адносяцца: балючасць, інтэнсіўныя гнойныя выдзяленні з вачэй, пачырваненне павекаў і склер, раздражненне слізістай абалонкі вока.

Пры наяўнасці дадзенай сімптаматыкі трэба правесці дыягностыку (пасеў выдзяленняў з вока) і неадкладна пачаць лячэнне.

Закупорка слёзнага канала

Сляза выцякае праз вузкі слёзны канал, адтуліна якога знаходзіцца ва ўнутраным вугалку вока. У кожнага дваццатага дзіцяці здараецца закупорка слёзнага канала ў адным або абодвух вачах.

Сімптомы закупоркі слёзнага канала могуць праявіцца ўжо ў першыя дні жыцця ці пазней на працягу першага месяца. Калі вочы слязяцца ці маюцца гнойныя выдзяленні з іх, гэта можа паказваць на закупорку слёзнага канала. Часам могуць назірацца прыпухласць і пачырваненне ў паглыбленні ўздоўж насавой косці ніжэй за ўнутраны вугалок вока. Часцей за ўсё закупорка праходзіць самаадвольна, аднак варта прыняць пэўныя меры, каб прадухіліць далучэнне інфекцыі.

Што можна зрабіць

Выконвайце масаж слёзных каналаў — асцярожныя масажныя рухі вобласці ўнутранага вугалка вока дапамагаюць адтоку назапашаных выдзяленняў са слёзных каналаў.
Пры з’яўленні прыкмет інфекцыі звярніцеся да ўрача-спецыяліста (педыятра або афтальмолага), які прызначыць дзіцяці кроплі для вачэй з антыбіётыкам.
Калі ў дзіцяці інфекцыі нячастыя і вочы не слязяцца пастаянна, набярыцеся цярпення, праблема звычайна праходзіць самастойна па меры фарміравання структур вока, прыкладна да ўзросту аднаго года. Навучыцеся правільна чысціць вочкі дзіцяці.
Калі сімптомы ўзнікаюць паўторна і не праходзяць да года, афтальмолаг правядзе працэдуру па пашырэнні канала з дапамогай тонкага зонда, што ліквідуе праблему.