Малюю на паперы!

Што спатрэбіцца: крэйда, алоўкі ці фламастары (па магчымасці некалькі); вялікія аркушы паперы (можа быць, нават шпалеры або адваротны бок якіх-небудзь друкаваных матэрыялаў).

У чым заключаецца гульня. У гэтым узросце большасць дзяцей яшчэ не ўмеюць маляваць што-небудзь «рэалістычнае», але вельмі любяць крэмзаць па паперы чым заўгодна. Магчыма, ваша дзіця пачало спрабаваць рабіць нешта на паперы некалькі месяцаў таму, і цяпер самы час яшчэ больш заахвочваць яго да творчасці. Не абмяжоўвайце дзіця ў часе, проста пакладзіце для яго вялікі аркуш паперы на роўную цвёрдую паверхню і дайце тое, чым можна маляваць або пісаць. Дзіця само пацягнецца за крэйдай або алоўкам і пачне крэсліць па паперы.

Няхай робіць што і як захоча колькі заўгодна па часе. Можаце каментаваць, што ў яго атрымалася: «О, глядзі, як ты расфарбаваў/расфарбавала гэты ліст крэйдай. Тут вось вялікі круг, а вунь там доўгая-доўгая лінія!». Можаце павесіць вынік творчасці на сцяну, каб іншыя члены сям'і таксама бачылі, чым сёння займалася дзіця.

Чаму пры гэтым вучыцца дзіця. Гэты досвед — першыя крокі да малявання і пісьма. Ваша дзіця пачынае лепш кантраляваць дробныя мышцы пальцаў рук. Яшчэ яно пачынае ўсведамляць сувязь паміж тым, пра што думае (правесці доўгую-доўгую лінію), і тым, што робяць яго пальцы. Акрамя таго, прагаворваючы, што робіць дзіця і што вы бачыце, вы стымулюеце яго моўнае развіццё.