Млоснасць

Млоснасць — гэта стан дыскамфорту, што суправаджаецца непрыемным адчуваннем, якое папярэднічае рвоце. Калі ў дзіцяці млоснасць, ваду ці іншую вадкасць трэба даваць яму невялікімі порцыямі, можна выкарыстоўваць растворы для пераральнай рэгідратацыі, прапаноўваць лёгкую ежу. У выпадку, калі млоснасць у дзіцяці захоўваецца больш за 24 гадзіны, варта неадкладна звярнуцца да педыятра.

Што такое млоснасць

Млоснасць — гэта непрыемнае, цяжкае адчуванне, якое папярэднічае рвоце.

Млоснасць у дзіцяці могуць справакаваць наступныя фактары:

  • захворванне, напрыклад гастраэнтэрыт;
  • прыём якіх-небудзь лекавых прэпаратаў;
  • негатыўная рэакцыя арганізма на некаторыя прадукты харчавання;
  • умовы, калі яго ўкалыхвае.

Сімптомы млоснасці

Дзеці старэйшага ўзросту і падлеткі, верагодна, будуць скардзіцца, што яны дрэнна сябе адчуваюць ці ім здаецца, што іх вось-вось вырве.

Меншыя дзеці, магчыма, не змогуць сказаць, што іх рве, але яны, як правіла, выглядаюць бледнымі і нездаровымі.

Часам млоснасць узнікае і праходзіць сама па сабе, у некаторых выпадках дзіця сапраўды можа вырваць.

Ці трэба паказаць дзіця педыятру пры млоснасці

Варта звярнуцца да педыятра, калі стан дзіцяці выклікае занепакоенасць, калі млоснасць захоўваецца больш за 24 гадзіны або ёй спадарожнічае любая з наступных з’яў:

  • рвота;
  • нядаўняя траўма галавы;
  • боль у жываце або ўздуцце жывата;
  • павышэнне тэмпературы.

Неадкладна выклічце хуткую дапамогу (па тэлефоне 103), калі млоснасць у дзіцяці суправаджаецца любым з наступных сімптомаў:

  • галаўны боль або скаванасць мышцаў шыі;
  • цяжкае дыханне або ацёк вакол твару ці рота;
  • невыразны зрок;
  • зблытанасць свядомасці і санлівасць.

Калі ў дзіцяці млоснасць і яго стан пры гэтым выклікае занепакоенасць, трэба неадкладна звярнуцца да педыятра ці ў бальніцу.

Лячэнне млоснасці

Калі ў дзіцяці млоснасць, спачатку трэба высветліць, чым яна выклікана, затым ліквідаваць яе прычыну.

Да прыкладу, пры млоснасці, выкліканай гастраэнтэрытам, варта выключыць з рацыёну дзіцяці тлустую або цяжкую ежу. Важна разнастаіць харчаванне дзіцяці ежай, якая лёгка засвойваецца, і павялічыць аб’ём спажывання вадкасці, уключаючы растворы для пераральнай рэгідратацыі; піць варта невялікімі порцыямі.

Старэйшым дзецям пры млоснасці можа дапамагчы рассмоктванне салодкіх ледзянцоў.

Не трэба даваць лекавыя прэпараты для прадухілення млоснасці маленькім дзецям — гэта пагражае небяспечнымі і непрыемнымі пабочнымі эфектамі.