Насавыя крывацёкі

Насавыя крывацёкі — гэта вельмі распаўсюджаная з’ява, але не нагода для занепакоенасці. У выпадку крывацёку неабходна шчыльна заціснуць нос дзіцяці на 10 хвілін. Калі крывацёк з носа не спыніўся, патрымайце нос заціснутым яшчэ 10 хвілін. Калі спыніць крывацёк не ўдалося, звярніцеся з дзіцем да ўрача або ў аддзяленне хуткай медыцынскай дапамогі.

Насавыя крывацёкі ў дзяцей

Насавыя крывацёкі з’яўляюцца распаўсюджанай з’явай у дзяцей. У некаторых яны ўзнікаюць дастаткова часта.

Прычыны насавых крывацёкаў у дзяцей вельмі разнастайныя:

  • пашкоджанне або траўміраванне слізістай абалонкі носа пальцам (пры калупанні ў носе);
  • моцны ўдар носам або празмернае напружванне падчас інтэнсіўнага смаркання;
  • засоўванне старонніх прадметаў у нос;
  • алергія;
  • далучэнне інфекцыі верхніх дыхальных шляхоў (поласці носа, насаглоткі) і пазух носа;
  • няправільнае выкарыстанне лекавых прэпаратаў, напрыклад спрэю для носа;
  • моцнае напружванне падчас дэфекацыі пры яе цяжкасці (запоры);
  • сухасць і раздражненне слізістай абалонкі носа з-за нізкай вільготнасці паветра ў памяшканні.

Да менш распаўсюджаных прычын насавых крывацёкаў адносяцца: парушэнні згусальнасці крыві, рэдкія парушэнні работы крывяносных сасудаў і іншыя захворванні ў дзіцяці.

Важна памятаць, што пры насавым крывацёку страта крыві не такая значная, як гэта можа выглядаць.

Калі трэба звярнуцца да ўрача пры насавых крывацёках

Звярніцеся да педыятра або спецыяліста-отарыналарынголага, калі:

  • крывацёк не спыняецца праз 20 хвілін, нават калі нос быў моцна заціснуты ўвесь гэты час;
  • насавы крывацёк суправаджаецца пагаршэннем агульнага самаадчування дзіцяці, яно выглядае бледным або ў яго невытлумачальныя сінякі на целе;
  • дзіцяці менш за два гады;
  • насавыя крывацёкі ў дзіцяці рэгулярныя.

Лячэнне насавога крывацёку

Самае галоўнае — захоўвайце спакой. Гэта дапаможа дзіцяці супакоіцца, калі яно засмучана выглядам і смакам крыві. Плач можа пагоршыць крывацёк з носа.

Шчыльна зацісніце ноздры (мяккая частка носа) указальным і вялікім пальцамі па баках і ўтрымлівайце іх так на працягу 10 хвілін. Пры гэтым дзіця павінна сядзець роўна і трымаць галаву нерухома, злёгку нахіліўшы яе наперад. Не ўкладвайце дзіця і не закідвайце яго галаву назад. Пачакайце поўныя 10 хвілін. Не правярайце, ці спыніўся крывацёк.

Калі па сканчэнні 10 хвілін, на працягу якіх нос дзіцяці быў заціснуты, у яго ўсё яшчэ ідзе кроў, варта паўтарыць працэдуру яшчэ на працягу 10 хвілін.

Калі крывацёк спыніўся

Сачыце за дзіцем, каб яно не смаркалася і не калупала ў носе на працягу прыкладна 24 гадзін. Гэта дапаможа сфарміраваць у носе згустак крыві, які спыняе крывацёк.

У дзіцяці можа з’явіцца рвота падчас або пасля крывацёку з носа пры праглынанні крыві. Гэта распаўсюджаная з’ява, дзіцяці трэба выплёўваць кроў.

Калі крывацёк не спыніўся

Калі спыніць крывацёк з выкарыстаннем вышэйапісаных рэкамендацый не атрымалася на працягу 20 хвілін, неабходна неадкладна звязацца з урачом або адвезці дзіця ў арганізацыю аховы здароўя для аказання тэрміновай медыцынскай дапамогі.

Для спынення крывацёку медыцынскі спецыяліст можа прымяняць лекавыя прэпараты, напрыклад раствор, крэм або мазь, у тым ліку насычаць імі тампон пры тампанадзе.

Тампанада носа

Гэта распаўсюджаны спосаб лячэння насавых крывацёкаў, калі ўрач устаўляе спецыяльны ватна-марлевы тампон у нос дзіцяці. Можа спатрэбіцца яшчэ раз прывезці дзіця да ўрача праз 24–48 гадзін, каб дастаць тампон.

У вельмі рэдкіх выпадках отарыналарынголаг можа накіраваць дзіця на лячэнне ў стацыянар.

Хірургічныя метады лячэння

Пры адсутнасці эфекту ад тампанады прымяняюцца іншыя распаўсюджаныя віды лячэння насавых крывацёкаў. Пры гэтым выкарыстоўваюцца спецыяльныя склеразуючыя прэпараты, электракаагуляцыя і крыядэструкцыя сасудаў слізістай абалонкі носа. Пры такіх працэдурах звычайна прымяняецца абязбольвальны сродак.

Пасля насавога крывацёку

Выконвайце меры засцярогі пасля насавога крывацёку ў дзіцяці:

  • Забяспечце спакой дзіцяці на працягу наступных 24 гадзін.
  • Не дазваляйце дзіцяці прымаць гарачую ванну.
  • Сачыце, каб дзіця не калупалася ў носе і не смаркалася.

Урач можа парэкамендаваць выкарыстанне солевых раствораў у выглядзе кропель ці назальнага спрэю, а таксама алейныя растворы і мазі для ліквідацыі сухасці слізістай абалонкі носа дзіцяці.