Абязводжванне

Абязводжванне назіраецца ў выпадках моцнай дыярэі і/або рвоты, а таксама калі дзіця недастаткова п’е, шмат трэніруецца ці моцна пацее. Варта звярнуцца да педыятра пры ўзнікненні ў дзіцяці прыкмет абязводжвання. Апошняе можна лячыць, павялічыўшы колькасць вадкасці, якая спажываецца дзіцем. У цяжкіх выпадках для аднаўлення ўзроўню вадкасці ў арганізме дзіцяці можа спатрэбіцца шпіталізацыя.

Што такое абязводжванне

Калі дзіця губляе шмат вадкасці ці не п’е яе ў дастатковай колькасці, у яго можа ўзнікнуць абязводжванне.

Самай частай прычынай абязводжвання з’яўляецца гастраэнтэрыт. З-за яго дзіця можа хутка страціць вялікую колькасць свабоднай вадкасці, наяўнай у арганізме. Любое захворванне, якое суправаджаецца працяглай дыярэяй, рвотай або зніжэннем спажывання вадкасці, можа прывесці да абязводжвання.

Таксама яго прычынай можа стаць моцнае потавыдзяленне, асабліва ў малых дзяцей у вельмі гарачае надвор’е або ў дзяцей падлеткавага ўзросту пры актыўных фізічных нагрузках.

Сімптомы абязводжвання

Прыметы абязводжвання ў дзіцяці:

  • больш рэдкае мочаспусканне: у дзіцяці малодшага ўзросту можа быць менш мокрых падгузнікаў або падгузнікі не такія цяжкія, як звычайна;
  • змардаваны выгляд і бледнасць;
  • хуткая стамляльнасць, млявасць ці раздражняльнасць;
  • менш плачу;
  • смага;
  • запалыя вочы ці сінякі пад вачыма;
  • налёт на языку і сухасць у роце.

Калі звяртацца да педыятра з нагоды абязводжвання

Звярнуцца да педыятра трэба ў наступных выпадках:

  • вы занепакоеныя станам дзіцяці і падазраяце абязводжванне;
  • у дзіцяці частая рвота і вадкасць пры гэтым не засвойваецца;
  • у дзіцяці працяглая дыярэя;
  • дзіцяці менш за шэсць месяцаў, і ў яго сімптомы абязводжвання.

Трэба неадкладна выклікаць хуткую медыцынскую дапамогу, калі ў дзіцяці:

  • сімптомы моцнага абязводжвання — яно не мочыцца, бледнае і схуднелае, соннае і капрызнае, яго вочы запалыя, а рукі і ногі халодныя;
  • моцны боль у жываце;
  • рвотныя масы зялёнага колеру або з прысутнасцю слядоў крыві;
  • назіраецца дрэннае самаадчуванне, якое выклівае ў вас трывогу.

Вы лепш за ўсіх ведаеце сваё дзіця, таму даверцеся ўласнай інтуіцыі, калі вам здаецца, што яно адчувае сябе дрэнна. Да прыкмет небяспечнага для жыцця дзіцяці стану, які патрабуе тэрміновай медыцынскай дапамогі, адносяцца моцны боль, санлівасць, бледнасць ці сінюшнасць скуры, абязводжванне, цяжкае дыханне, сударгі і затарможаная рэакцыя.

Лячэнне абязводжвання

Пры прыкметах абязводжвання лёгкай ступені трэба прапаноўваць дзіцяці больш вадкасці.

Адным з варыянтаў з’яўляецца выкарыстанне раствораў для аральнай рэгідратацыі. Іх можна купіць у аптэцы без рэцэпта.

Іншымі варыянтамі з’яўляюцца вада, негазіраваныя напіткі, разведзеныя вадой (фруктовы сок, кампот). Пры выкарыстанні для лячэння абязводжвання салодкага напітка неабходна разводзіць яго вадой: змяшаць адну частку напітка з чатырма часткамі вады.

У дзіцяці можа адсутнічаць жаданне піць. У гэтым выпадку трэба паспрабаваць угаварыць яго піць больш, можна прапанаваць вадкасць праз шпрыц, з лыжачкі ці лёд у кубіках.

Пры рвоце трэба даваць вадкасць часта, але патроху: прапануйце па некалькі глыткоў кожныя 15 хвілін.

Калі дзіця старэйшае за шэсць месяцаў, але яшчэ знаходзіцца на грудным выкормліванні, трэба працягваць карміць яго грудзьмі, але рабіць гэта часцей. Паміж кармленнямі дадаткова можна прапаноўваць вадкасць для аральнай рэгідратацыі.

Калі дзіцяці больш за шэсць месяцаў і яно знаходзіцца на штучным выкормліванні, трэба даваць яму вадкасць для аральнай рэгідратацыі на працягу першых 12–24 гадзін, а затым зноў уводзіць паўнацэнны аб’ём сумесі. Пры гэтым трэба карміць яго меншымі порцыямі, але часцей, дадаткова паміж кармленнямі прапаноўваць вадкасць для аральнай рэгідратацыі.

У цяжэйшых выпадках дзіцяці можа спатрэбіцца шпіталізацыя ў стацыянар з мэтай аднаўлення ўзроўню вадкасці ў арганізме.

У стацыянары магчыма ўнутрывенная рэгідратацыя (увядзенне вадкасці непасрэдна ў вену), а таксама прымяненне насавога катэтара: невялікую трубачку ўводзяць у нос дзіцяці, а далей у яго страўнік — гэта бяспечны і хуткі спосаб падачы вадкасці для аднаўлення яе нармальнага ўзроўню.

Прафілактыка абязводжвання

Лепшы спосаб пазбегнуць значнага абязводжвання — звярнуцца да педыятра, калі дзіця занядужала і з-за гэтага губляе шмат вадкасці ці зусім перастае піць.

У гарачыя дні ці пры павышанай фізічнай актыўнасці дзіцяці неабходна шмат піць. Сачыце за тым, каб у яго з сабой заўсёды было дастаткова вады для спаталення смагі. Таксама варта нагадваць дзіцяці пра тое, што трэба рэгулярна рабіць перапынкі, каб папіць.