Пашырэнне рацыёну харчавання немаўляці

Дадатковае харчаванне груднога дзіцяці (прыкорм) — гэта цвёрдая ці паўцвёрдая ежа, якую даюць немаўляці ў дадатак да груднога малака, калі яго ўжо недастаткова для задавальнення ўсіх патрэб у харчаванні (або ў дадатак да сумесі для дзяцей, якія знаходзяцца на змешаным ці штучным выкормліванні).

Увядзенне цвёрдай ежы дапамагае дзіцяці навучыцца есці, знаёміць з новымі смакамі і тэкстурамі. Ужыванне цвёрдай ежы спрыяе развіццю зубоў, сківіц і фарміраванню прыкусу, а таксама дапамагае выпрацоўваць навыкі, якія спатрэбяцца пасля для развіцця маўлення.

Гэта пераходны этап ад харчавання малаком да ежы за сямейным сталом. Да яго дзеці, як правіла, гатовы з 1 года.

Увядзенне цвёрдай ежы напрамую ўплывае на рост і развіццё не толькі на працягу першага года жыцця. З’яўляецца ўсё больш навуковых даных і пра доўгатэрміновае ўздзеянне гэтага этапу на здароўе на працягу ўсяго жыцця. Здаровае харчаванне спрыяе росту дзіцяці, вызначае развіццё мозгу, узмацняе патэнцыял да навучання, павялічвае прадуктыўнасць у дарослым узросце.

Калі дзеці своечасова не набываюць звычкі здаровага харчавання і не ўжываюць разнастайную ежу, у будучыні яны могуць быць схільны есці толькі пэўныя прадукты. Гэта можа негатыўна адбіцца на здароўі (недахоп гародніны ў рацыёне прыводзіць да дэфіцыту вітамінаў, мікраэлементаў, антыаксідантаў; пустыя калорыі значна павышаюць рызыку развіцця атлусцення і сардэчна-сасудзістых захворванняў, парушэнняў абмену рэчываў, дыябету).

Калі ў рацыён немаўляці ўводзяць цвёрдую ежу?

У адпаведнасці з рэкамендацыямі Сусветнай арганізацыі аховы здароўя і ЮНІСЕФ, немаўля, якое знаходзіцца на натуральным выкормліванні, павінна пачаць ужываць цвёрдую ежу ва ўзросце прыкладна шасці месяцаў. Аптымальна, калі да гэтага ўзросту дзіця знаходзіцца выключна на грудным выкормліванні. Увядзенне цвёрдай, паўцвёрдай ежы ў рацыён харчавання дзіцяці, якое не дасягнула ўзросту 17 тыдняў, павялічвае рызыку атлусцення, а таксама алергіі.

Немаўляты, якія знаходзяцца на грудным выкормліванні і атрымліваюць дакорм сумессю, павінны ўжываць цвёрдую ежу з 5-га месяца жыцця (не раней за 17-ы і не пазней за 24-ы тыдзень). З 5-га месяца функцыі органаў стрававання і выдзялення становяцца дастаткова сталымі, як і рухальныя функцыі, што дазваляе карміць дзіця паўцвёрдай і цвёрдай ежай.

Як даведацца, што дзіця гатова да ўвядзення цвёрдай ежы ў рацыён?

Дзеці растуць і сталеюць з рознай хуткасцю. Прыкметы таго, што дзіця гатова да ўжывання цвёрдай ежы, звычайна відавочныя ва ўзросце каля шасці месяцаў, калі яно:

• можа заставацца ў сядзячым становішчы без падтрымкі, нахіляцца наперад і вяртацца ў вертыкальнае становішча (мышцы яго плячэй і шыі пры гэтым дастаткова моцныя, каб падтрымліваць галаву);
• спрабуе кантраляваць рухі рук, каб здолець мэтанакіравана ўзяць невялікі прадмет і пакласці яго ў рот;
• імкнецца выштурхоўваць ежу з рота языком, хоць і ў стане яе праглынуць;
• пачынае кантраляваць глытанне сліны.

Знакі ці сігналы, якія НЕ з’яўляюцца паказчыкамі гатоўнасці, паколькі могуць азначаць нешта іншае:

• дзіця часцей прачынаецца ноччу або неспакойнае;
• дзіця лёгка пераключае ўвагу падчас кармлення грудзьмі;
• у дзіцяці рэжуцца зубы, назіраецца слінацёк, яно грызе кулачкі;
• дзіця выяўляе цікавасць да таго, што ядуць іншыя, гуляе з ежай (але не глытае яе);
• дзіця бярэ ежу, калі дарослы кладзе яе яму ў рот.

Вы можаце памылкова прыняць такія паводзіны за гатоўнасць дзіцяці есці цвёрдую ежу. Часам бацькі проста жадаюць асвоіць з дзіцем новы занятак і імкнуцца дасягнуць чарговага этапу ў яго развіцці.

Калі дзіця вучыцца есці, яму патрэбна не толькі ежа, але і ўсмешкі і цярпенне. Разглядайце кармленне як час, калі вы наладжваеце сувязь са сваім дзіцем, замест таго, каб канцэнтравацца выключна на колькасці з’едзенага.

Няхай дзіця ўдзельнічае ў сямейных трапезах, давайце яму тое ж, што ядуць астатнія члены сям’і, каб яно магло бачыць, як паводзяць сябе падчас ежы іншыя.