Патніца

Прычыны патніцы

Потавыя залозы ў дзіцяці недастаткова развітыя. Патніца ўзнікае, калі дзіцяці становіцца занадта горача. У такім выпадку назапашванне поту можа справакаваць утварэнне невялікіх падскурных бугаркоў або пухіроў.

У нованароджаных патніца часта ўзнікае летам ці ва ўмовах гарачага вільготнага клімату. Яна таксама можа праявіцца, калі дзіця апранута не па сезоне.

Патніца часцей сустракаецца ў малых дзяцей, але можа ўзнікаць і ў дзяцей старэйшага ўзросту.

Сімптомы патніцы

На твары, шыі і ў складках скуры дзіцяці, асабліва ў зоне шчыльнага прылягання адзення, з’яўляюцца маленькія ружавата-чырвоныя або празрыстыя пухіры.

У выпадку трапляння інфекцыі пухіры могуць нагнойвацца.

Калі неабходна звяртацца да педыятра ў выпадку патніцы

Трэба звярнуцца да педыятра ў наступных выпадках:

• напаўненне пухіроў змесцівам жоўтага або зялёнага колеру — гэта значыць, што ў іх, хутчэй за ўсё, патрапіла інфекцыя і патрабуецца лячэнне;
• захаванне сыпу на працягу больш чым трох дзён;
• пагаршэнне агульнага самаадчування дзіцяці: акрамя сыпу, назіраецца павышэнне тэмпературы цела, зніжэнне апетыту.

Не ўсякі сып з’яўляецца ўсяго толькі патніцай. Калі ў вас ёсць якія-небудзь сумненні ці занепакоенасць, варта пракансультавацца з педыятрам.

Лячэнне патніцы

Звычайна пазбегнуць патніцы можна, калі сачыць за тым, каб дзіцяці не было горача і яно не пацела. Выкарыстоўвайце кандыцыянер, калі пражываеце ва ўмовах гарачага клімату; важна, каб дзіця было апранута ў адпаведнасці з тэмпературай навакольнага асяроддзя, пажадана ў лёгкае свабоднае адзенне з баваўнянай тканіны.

Калі вы накрываеце дзіця, пераканайцеся, што яму не занадта горача.

Каб дзіця адчувала сябе больш камфортна, можна купаць яго ў цёплай вадзе. Не трэба выкарыстоўваць мыла, бо яно можа выклікаць раздражненне скуры дзіцяці. Таксама на сып можна нанесці ласьён для абароны ад сонечных апёкаў.

Сып павінен прайсці праз 2–3 дні, але можа спатрэбіцца і больш часу.

Пры наяўнасці свербу ў месцах высыпанняў трэба пракансультавацца з педыятрам ці медыцынскай сястрой на прадмет таго, якімі сродкамі можна яго зняць.

Прафілактыка патніцы

Апранайце дзіця ў адпаведнасці з умовамі надвор’я і не надзявайце на яго занадта шмат рэчаў. Калі вам здаецца, што можа стаць холадна, вазьміце на прагулку дадатковую вопратку для дзіцяці.

Пасля кожнага купання насуха выцірайце ўсе скурныя складкі дзіцяці (у пахвіне, у падпахавай вобласці, на шыі).