Што такое павелічэнне лімфатычных вузлоў

Лімфатычныя вузлы (лімфавузлы) прадстаўлены ў арганізме паўсюдна. Яны з’яўляюцца часткай імуннай сістэмы і выступаюць у якасці фільтра супраць вірусаў і бактэрый.

Лімфатычныя вузлы таксама вядомыя як лімфатычныя залозы.

Павелічэнне лімфавузлоў магчыма па розных прычынах. Часцей гэта не з’яўляецца нагодай для хвалявання.

У большасці выпадкаў лімфавузлы павялічваюцца ў перыяд віруснай ці бактэрыяльнай інфекцыі, напрыклад пры ангіне ці інфекцыйным монануклеозе. Таксама гэта можа адбыцца нават пры нязначнай запаленчай рэакцыі ў арганізме, напрыклад у выніку ранкі, апёку ці ўкусу насякомага.

У некаторых выпадках, напрыклад пры экзэме, лімфавузлы ў дзіцяці могуць быць павялічаны ўвесь час. Гэта звязана са зніжэннем бар’ерных уласцівасцей скуры пры запаленні і пашкоджанні, такім чынам лімфавузлы павялічваюць сваю актыўнасць, рэагуючы на ​​пастаяннае пранікненне праз яе мікраарганізмаў.

У рэдкіх выпадках прычынай павелічэння лімфавузлоў у дзяцей могуць быць злаякасныя новаўтварэнні. Пры гэтым вузлы часцей не баляць, яны даволі шчыльныя навобмацак і не рухаюцца пры націсканні.

У дзяцей лімфавузлы звычайна павялічваюцца ў большай ступені і адбываецца гэта часцей, чым у дарослых, таму іх лягчэй вызначыць навобмацак. Часам іх можна намацаць з абодвух бакоў на шыі, у падпахавых западзінах і ў пахвіннай вобласці спераду на згібе нагі дзіцяці, нават калі яно здаровае. Калі дзіця худое, іх можна нават убачыць.

Сімптомы павелічэння лімфавузлоў

Лімфавузлы ў дзіцяці могуць павялічыцца па ўсім целе або толькі ў вобласці лакалізацыі інфекцыі ці запалення.

Напрыклад, калі ў дзіцяці танзіліт (ангіна), можна адзначыць прыпухласць, ушчыльненне і балючасць лімфавузлоў шыі. Калі ж у дзіцяці інфекцыйна-запаленчы працэс на пальцы рукі, то назіраюцца балючасць і ўшчыльненне лімфавузлоў, размешчаных у падпахавай вобласці пад рукой з боку запалення.

Лімфавузлы могуць заставацца павялічанымі на працягу 2–3 тыдняў пасля таго, як пройдзе інфекцыя.

Ці трэба паказваць дзіця педыятру пры павелічэнні лімфавузлоў

Варта звярнуцца да педыятра ў наступных выпадках:

• лімфавузлы павялічаны на працягу некалькіх дзён і для гэтага няма відавочнай прычыны, такой як боль у горле, насмарк, іншая лёгкая інфекцыя і г. д.;
• назіраецца значнае павелічэнне памераў (больш за 1 сантыметр у дыяметры) лімфавузла або адразу групы лімфавузлоў;
• назіраецца несіметрычнае павелічэнне лімфавузлоў (напрыклад, з аднаго боку шыі);
• павелічэнне лімфавузлоў на шыі суправаджаецца ўскладненнем глытання або дыхання;
• дзіця скардзіцца на боль або балючыя адчуванні вакол павялічаных лімфавузлоў;
• адзначаецца пачырваненне скуры ў вобласці павялічаных лімфавузлоў;
• павелічэнне лімфавузлоў суправаджаецца высокай тэмпературай або сыпам;
• лімфавузлы павялічаны, і пры гэтым адзначаецца пагаршэнне самаадчування дзіцяці.

Лячэнне павялічаных лімфавузлоў

Лячэнне пры павелічэнні лімфавузлоў залежыць ад прычыны.

Калі лімфавузлы ў дзіцяці павялічаны з-за віруснай інфекцыі, усё, што неабходна, — гэта лячыць сімптомы віруса, такія як боль у горле і высокая тэмпература.

Калі павелічэнне лімфавузлоў у дзіцяці выклікана бактэрыяльнай інфекцыяй у вобласці іх лакалізацыі або непасрэдна саміх вузлоў, тады дзіцяці могуць спатрэбіцца антыбіётыкі (па прызначэнні ўрача).

У рэдкіх выпадках пры падазрэнні на злаякасныя новаўтварэнні можа спатрэбіцца аперацыя па выдаленні часткі ці цэлага лімфатычнага вузла з мэтай пастаноўкі дакладнага дыягназу і планавання далейшага лячэння.