Паводзіны немаўлят і малых дзяцей, якія могуць вас турбаваць: боязь незнаёмых людзей
Ваша дзіця можа адчуваць дыскамфорт, калі незнаёмы чалавек падыходзіць, звяртаецца да яго або бярэ на рукі. Такія паводзіны чаканыя і звычайна ўзнікаюць ва ўзросце ад 7 да 10 месяцаў. Як правіла, гэта доўжыцца некалькі месяцаў, але можа працягвацца і больш. Звычайна праходзіць ва ўзросце 18–24 месяцаў.
Body
Што можна зрабіць
Хоць з’яўленне боязі незнаёмых людзей у працэсе развіцця цалкам чаканае, вы можаце дапамагчы свайму дзіцяці адчуваць сябе менш дыскамфортна.
- Не ігнаруйце і не адмаўляйце факт таго, што дзіця адчувае дыскамфорт. Яно можа плакаць і рэагаваць больш напружана, калі даводзіцца больш інтэнсіўна паказваць вам, што яно ў дадзены момант адчувае.
- Бярыце дзіця за руку або трымайце яго на каленях, калі знаёміце яго з новым чалавекам. Па магчымасці знаёмце дзіця з новымі людзьмі ў прывычным для яго становішчы, напрыклад у сябе дома.
- Калі дзіцяці вельмі няўтульна ў кампаніі новага чалавека, паспрабуйце цалкам супакоіць дзіця і толькі потым прапануйце, напрыклад, пагуляць усім разам. Для пачатку адыдзіце з дзіцем далей ад новага чалавека.
- Праяўляйце цярпенне і пяшчоту. Не настойвайце на кантакце дзіцяці з новым чалавекам. Не турбуйцеся пра пачуцці дарослых — папрасіце незнаёмца пачакаць, перш чым браць дзіця на рукі. Скажыце, што яно вучыцца знаёміцца з новымі людзьмі, і дайце яму час, каб прывыкнуць і захацець кантактаваць з новым чалавекам.
- Калі знаёміце дзіця з новымі людзьмі, паводзьце сябе спакойна — не занадта радасна, усхвалявана або нервова. Дзіця будзе назіраць за вашымі паводзінамі і ацэньваць сітуацыю, грунтуючыся на вашай рэакцыі.
- Не адмаўляйцеся ад зносін з новымі людзьмі. Наадварот, дапамагайце вашаму дзіцяці знаёміцца. Заўсёды шчыра вітайце новых людзей, даючы яму зразумець (усмешкай, прыемным вясёлым голасам, зрокавым кантактам), што кантактаваць з гэтымі людзьмі прыемна.
Надзвычай моцны страх перад незнаёмымі людзьмі можа прывесці да сацыяльнай трывогі і дыскамфорту ў сацыяльных адносінах, калі дзіця падрасце. Таму важна звярнуцца па кансультацыю да спецыяліста, калі вас турбуе, што ваша дзіця пры знаёмстве з новым чалавекам адчувае занадта моцны дыскамфорт ці што яно не супакойваецца, нават калі гэтага чалавека больш няма побач. Таксама трэба звярнуцца па кансультацыю, калі боязь незнаёмых людзей захоўваецца па дасягненні дзіцем узросту двух гадоў.
