Раптоўная смерць немаўляці, сіндром раптоўнай дзіцячай смерці і няшчасныя выпадкі, якія прыводзяць да смерці ў сне

Аб раптоўнай смерці немаўляці

Калі дзіця ва ўзросце да аднаго года нечакана памірае ў сне, гэта апісваецца як раптоўная смерць немаўляці (РСН). Гэтае паняцце ўключае сіндром раптоўнай дзіцячай смерці (СРДС) і няшчасны выпадак са смяротным зыходам.

РСН часта тлумачаць няшчаснымі выпадкамі ўдушэння ў сне, калі дзеці задыхаюцца або аказваюцца заціснутымі. Прычынай становіцца  няправільна арганізаванае месца для сну дзіцяці.

Аднак бываюць выпадкі, калі высветліць дакладную прычыну смерці немаўляці немагчыма.

Часам прычынай РСН з'яўляецца сур'ёзнае захворванне або стан здароўя ў дзіцяці з нараджэння.

Прычыны раптоўнай смерці немаўляці дакладна не ўстаноўлены, але вядома, што ва ўсіх дзяцей існуе небяспека яе ўзнікнення. Акрамя таго, вызначаны тры фактары, якія павышаюць рызыку РСН.

Уразлівасць. Яна можа быць абумоўлена наступнымі прычынамі:

• падвержанасць плода ўздзеянню тытунёвага дыму або наркотыкаў у перыяд развіцця ва ўлонні маці;
• неданошанасць або нізкая маса цела пры нараджэнні.

Узрост. Рызыка РСН, у тым ліку СРДС і няшчасных выпадкаў, якія прыводзяць да смерці ў сне, найбольш высокая ва ўзросце ад 1 да 4 месяцаў, хоць небяспека захоўваецца на працягу першых 12 месяцаў жыцця.

Умовы. Пэўныя ўмовы сну дзіцяці павялічваюць рызыку РСН. Небяспека ўзрастае, калі яму занадта горача ці ў памяшканні, дзе знаходзіцца немаўля, кураць.

Дзеці, якія знаходзяцца ў групе рызыкі па ўзросце або з-за асаблівасцей развіцця, падвяргаюцца большай небяспецы РСН.

Вы не ўладныя над фактарамі ўразлівасці і ўзростам дзіцяці, але вы можаце знізіць рызыку РСН, у тым ліку СРДС і няшчасных выпадкаў, якія прыводзяць да смерці ў сне, калі будзеце прытрымлівацца простых рэкамендацый па арганізацыі бяспечнага сну вашага немаўляці.

Рызыка, якой можна пазбегнуць

Да ўмоў сну адносіцца, дзе і як спіць дзіця, а таксама тое, што знаходзіцца вакол яго як падчас сну, так і ў перыяды няспання.

Каб мінімізаваць рызыку РСН, выконвайце наступныя рэкамендацыі:

• Не кладзіце дзіця спаць на жываце ці на баку. Правільна, калі дзіця ранняга ўзросту спіць на спіне! (Класці дзіця на жывоцік карысна — гэта спрыяе развіццю мышцаў яго шыі і плячэй, аднак дапушчальна практыкаваць гэта ў перыяд яго няспання і пад назіраннем.)
• Не дапускайце, каб дзіця спала з накрытым тварам ці галавой.
• Стварыце аптымальныя ўмовы для сну дзіцяці; каб яму не было горача, не апранайце на яго перад сном вялікую колькасць адзення, чэпчык або шапачку.

Звярніце ўвагу на тое, дзе спіць немаўля. Выконвайце наступныя рэкамендацыі:

• не кладзіце дзіця спаць на мяккай паверхні (напрыклад, на пярыне ці на вадзяным матрацы) або на канапе (як з бацькамі, так і без іх);
• немаўлятам не варта спаць разам з мамай ці іншымі членамі сям'і;
• выключыце магчымасць захрасання дзіцяці паміж матрацам і часткамі дзіцячага ложачка або паміж ложкам і сцяной падчас сну.

Звярніце ўвагу на тое, што знаходзіцца побач з дзіцем. Выконвайце наступныя правілы:

• не курыце, знаходзячыся ​​побач або ў адным пакоі з дзіцем;
• не кладзіце немаўля спаць на мяккай, напрыклад пуховай, пасцелі (у тым ліку з аўчыны ці шэрсці), на падушках; падчас сну побач з ім не павінна быць мяккіх цацак; ложачак павінен быць без борцікаў і балдахіна;
• прыбярыце любыя прадметы, якія могуць прывесці да ўдушша, напрыклад завязкі, тасёмкі, рамяні ці шнуркі на дзіцячых калясках, аўтакрэслах або жалюзі.

Спіце з немаўлём у адным пакоі: уладкуйце яму месца для сну побач з вашым спальным месцам. Спаць з вамі ў адным пакоі немаўляці лепш да таго часу, пакуль яму не споўніцца мінімум 1 год.

Калі ў сям'і адбылася раптоўная смерць немаўляці

Раптоўная смерць немаўляці — гэта самы цяжкі і сумны вопыт, з якім даводзіцца сутыкацца некаторым бацькам. Яны часта адчуваюць гнеў, віну, адчай і, перш за ўсё, смутак.

Калі вы хочаце абмеркаваць гэта, звярніцеся ў спецыяльную службу псіхалагічнай дапамогі для бацькоў і сем'яў, якія сутыкнуліся з такой сітуацыяй.