Развіццё ўяўлення, творчых здольнасцей падчас гульні ў малых дзяцей

Чаму гульні важныя для развіцця ўяўлення і творчых здольнасцей у малых дзяцей

У малых дзяцей уяўленне і творчыя здольнасці развіваюцца імклівымі тэмпамі. Роля гульні тут вельмі важная. Уяўленне і творчыя здольнасці дапамагаюць вашаму дзіцяці ў наступным:

• даследаваць свет і разумець сваё месца ў ім;
• лепш разумець сябе і іншых людзей;
• пазнаваць і выказваць пачуцці;
• увасабляць у жыццё розныя ідэі і знаходзіць спосабы вырашэння праблем.

Чаго чакаць па меры развіцця ўяўлення ў вашага дзіцяці

Прыкладна ва ўзросце 15–18 месяцаў дзіця пачынае гуляць у гульні «не папраўдзе» або з пераадзяваннем. Вашаму дзіцяці спадабаецца прыкідвацца дарослым, выкарыстоўваючы старое адзенне і галаўныя ўборы. Напрыклад, яно можа ўявіць, што водзіць аўтобус ці працуе ў краме.

Ваша дзіця вучыцца, капіруючы тое, што робяць іншыя. Напрыклад, ва ўзросце двух гадоў дзіця можа рабіць выгляд, што гатуе вячэру з лісця і травы, якія знайшло ў двары.

Таксама ваша дзіця можа пачаць прыдумваць свае ўласныя гісторыі і гульні, у якія можна гуляць «не папраўдзе». Такія гульні могуць быць заснаваны на кнігах, якія вы разам чыталі, або на атрыманым раней досведзе, напрыклад на паходзе да ўрача.

Любая музыка можа прымусіць ваша дзіця ўяўляць фантастычныя рэчы, напрыклад, што яно лётае, як птушка. І яно будзе выяўляць сябе рознымі спосабамі: спяваць, танцаваць і рухацца пад свае любімыя песенькі і пацешкі.

Малым дзецям асабліва падабаецца гуляць у гульні, у якіх можна выпацкацца. Яны з задавальненнем капаюцца ў пяску ці працуюць з пластылінам.

Ваша дзіця, верагодна, таксама з задавальненнем будзе гуляць і плёскацца ў ванне. Яно можа правяраць, на што здольны яго цацкі, пераліваючы ваду з адной у іншую ці апускаючы іх пад ваду. Заўсёды сачыце за сваім дзіцем, калі побач ёсць вада. Маленькія дзеці цікаўныя ад прыроды і часта не адчуваюць страху, таму ім асабліва пагражае небяспека патануць. Сачыце за іх бяспекай!

Вы ўбачыце, як ваша дзіця трэніруе сваё ўяўленне і ўвасабляе задумы, выкарыстоўваючы разнастайныя творчыя ідэі.

Гульні і творчыя заняткі для развіцця ўяўлення ў малых дзяцей

Дазваляйце свайму дзіцяці самому прыдумваць гульні. Гэта карысна і дае яму выдатную магчымасць задзейнічаць сваё ўяўленне.

Паспрабуйце наступныя ідэі гульняў дома для развіцця ўяўлення ў вашага дзіцяці:

• Разам чытайце кнігі і расказвайце гісторыі пра чароўныя месцы і незвычайных істот. Абмяркоўвайце гэтыя гісторыі з дзіцем або пытайцеся ў яго, што, на яго думку, можа адбыцца далей.
• Спявайце пацешкі, якія вы памятаеце з дзяцінства. Калі дома вы размаўляеце на мове, што адрозніваецца ад мовы, на якой размаўляе большасць людзей у краіне, то выдатна выкарыстоўваць яе і ў зносінах з дзіцем.
• Утварайце гукі і стварайце рытмы з дапамогай імправізаваных ці набытых музычных інструментаў.
• Размалёўвайце паперу крэйдай. Няхай дзіця малюе ўсё, што хочацца. Зусім няважна, на што гэта падобна.
• Дазваляйце дзіцяці даследаваць любімыя ці новыя месцы ў вас дома, напрыклад шуфляду з каструлямі або шафу для посуду.
• Стварыце дома спецыяльнае месца для гульняў. Гэта вельмі проста: можна накінуць тканіну на два крэслы або выразаць у вялікай кардоннай каробцы бакавую адтуліну. Дайце дзіцяці адзенне, у якое можна пераапранацца, або паболей кубікаў, каб заахвоціць яго прыдумваць гісторыі і гульні.

Нават калі вы абмежаваны ў выбары месцаў у сваім раёне, куды можна пайсці гуляць з дзіцем, ёсць шмат ідэй для гульняў на свежым паветры, якія дадуць штуршок уяўленню вашага дзіцяці:

• Хадзіце гуляць на прыроду, нават калі гэта будзе ваш уласны двор — знайдзіце месца, дзе будуць цікавыя краявіды і гукі, якія натхняць ваша дзіця.
• Паглядзіце ўверх. Апішыце ўсё, што вы бачыце ў небе: месяц, зоркі і аблокі будуць зачароўваць ваша дзіця.
• Зрабіце для свайго дзіцяці шкатулку скарбаў, якую можна напоўніць прыроднымі матэрыяламі, якія ваша дзіця магло б мацаць, перабіраць і з якімі магло б гуляць. Вы можаце пакласці ў яе лісцікі, каляровыя каменьчыкі ці арэхі і насенне. Толькі сачыце за тым, каб дзіця не вырашыла паспрабаваць іх.
• Гуляйце ў гульні, падчас якіх можна выпацкацца, напрыклад, гульні з пяском, пластылінам ці фарбамі. Толькі пераканайцеся ў нетаксічнасці гэтых матэрыялаў, таму што на нейкім этапе гульні пальцы вашага дзіцяці могуць апынуцца ў яго ў роце.
• Арганізуйце для дзіцяці гульні з вадой. Вядро з вадой і некалькі пластыкавых кубачкаў — гэта ўсё, што трэба. Асабліва яго могуць развесяліць бурбалкі. Заўсёды сачыце за сваім дзіцем, каб забяспечваць яго бяспеку падчас гульняў з вадой.

Час перад экранам для малых дзяцей і гульні для развіцця ўяўлення

У адпаведнасці з дзеючымі нацыянальнымі і міжнароднымі правіламі дзецям, малодшым за два гады, не рэкамендуецца бавіць час перад экранам, калі гэта не датычыцца відэасувязі з блізкімі людзьмі. Для дзяцей дашкольнага ўзросту трэба абмежаваць час знаходжання перад экранам, а таксама забяспечыць выкарыстанне імі толькі якаснага кантэнту. Гэта звязана з тым, што малыя дзеці лепш за ўсё вучацца і развіваюцца, атрымліваючы вопыт з рэальнага жыцця, напрыклад, падчас актыўных гульняў, гульняў на вуліцы, творчых заняткаў і зносін з сям’ёй і сябрамі, — менавіта так у іх развіваецца ўяўленне.