Уяўленне, творчасць і гульня: дашкольнікі

Гульня дашкольнікаў: чаму гэта важна для творчага развіцця і ўяўлення

Гульня развівае творчыя здольнасці і ўяўленне ў дашкольнікаў, а гады перад школай могуць быць адным з самых творчых перыядаў у жыцці дзіцяці.

Па меры развіцця іх уяўлення гульня дае дашкольнікам магчымасці:

• умацоўваць давер;
• выказваць пачуцці;
• вучыцца наладжваць зносіны;
• развіваць, практыкаваць і паляпшаць каардынацыю і маторыку;
• вучыцца прыняццю рашэнняў, вырашэнню праблем і крытычнаму мысленню;
• даследаваць навакольны свет у бяспечнай абстаноўцы.

Усё гэта вельмі важныя навыкі для дашкольнікаў і больш старэйшых дзяцей.

Чаго чакаць па меры развіцця ўяўлення дашкольніка

Прыкладна з трох гадоў ваша дзіця можа любіць гуляць з лялькамі і апранацца ў розныя ўборы, расказваць вам вельмі падрабязныя гісторыі пра тое, чаго ніколі не было насамрэч, або мець уяўнага сябра. Дзіця можа прыкінуцца дарослым, урачом, касманаўтам і г. д.

Дашкольнік, верагодна, будзе вельмі зацікаўлены ў любой магчымасці што-небудзь маляваць, размалёўваць і наклейваць. Прыкладна ў чатыры гады ваша дзіця можа маляваць месцы, прадметы і людзей з вялікай колькасцю дэталяў згодна са сваім уяўленнем.

Прыкладна ва ўзросце 5 гадоў ваша дзіця здольна выказваць думкі і ідэі з дапамогай малявання. Яно таксама можа пачаць выкарыстоўваць уяўленне, каб расказваць гісторыі, выяўляць пачуцці, апісваць тое, што бачыла.

Памятайце, дзеці ў гэтым узросце не заўсёды могуць адрозніць, што рэальнае, а што выдуманае. Гэта можа значыць, што любыя страшныя монстры з казак стануць для вашага дзіцяці рэальнымі. Калі вашаму дзіцяці сняцца кашмары, запэўніце яго, што яно ў бяспецы: монстры —  гэта ўсяго толькі выдумка.

Ідэі для гульняў і творчыя заняткі для дашкольнікаў

Дазвольце вашаму дзіцяці гуляць па-свойму, без вашага ўдзелу. Але памятайце, што яму ўсё роўна трэба, каб вы падтрымлівалі яго і дапамагалі, калі ўзнікнуць цяжкасці.

Вось некалькі ідэй гульняў, якія дапамогуць развіць уяўленне вашага дзіцяці:

• Расказвайце гісторыі і чытайце кнігі. Вашаму дашкольніку можа падабацца прыдумваць новыя канцоўкі для знаёмых гісторый.
• Таксама паспрабуйце складаць вершыкі і загадкі. Дашкольнікі асабліва любяць слоўныя гульні, ім падабаецца прыдумваць уласныя жарты або вершыкі.
• Выпраўцеся на прагулку на прыроду або пагуляйце на свежым паветры ў рознае надвор'е. Гэта просты спосаб даць вашаму дзіцяці магчымасць выпрабаваць новае стымулюючае асяроддзе, нават калі гэта ўсяго толькі ваш двор.

• Знайдзіце час для гульняў на свежым паветры.
• Папрасіце дзіця дапамагаць вам з простымі хатнімі справамі. Яно можа быць афіцыянтам, які дапамагае збіраць на стол. Ці можа прыкінуцца шэф-поварам і дапамагчы вам з прыгатаваннем ежы.
• Уладкуйце адмысловую гульнявую пляцоўку ў сваёй хаце. Вялікія кардонныя скрынкі ці анучы, накінутыя на крэслы, даюць бязмежныя магчымасці для гульні.
• Знайдзіце час, каб адпачыць і памарыць. Знаходзячыся на прыродзе, разам ляжце на спіну і глядзіце на неба. Уявіце сабе, на што падобныя аблокі.

Вы таксама можаце прыдумаць для свайго дзіцяці простыя гульні. Напрыклад:

• Дайце дзіцяці крэйду ці алоўкі для малявання і крамзоляў.
• Зрабіце «цікавую скрынку», поўную такіх рэчаў, як каляровая папера, стужачкі, клей і іншыя прадметы, напрыклад кавалачкі кардону і пластыкавыя бутэлькі. У адмысловую каробку таксама можна пакласці прыродны матэрыял, знойдзены на вуліцы (галінкі, пялёсткі, камяні ці пер’е). Вынікам гульняў са скрыняй стануць шматлікія творчыя праекты.
• Збярыце каробку са старым адзеннем, туфлямі, джэмперамі, ботамі, сумкамі і іншымі рэчамі для гульняў-пераапрананняў.
• Захоўвайце старыя часопісы і каталогі. Ваша дзіця можа выразаць выявы людзей, жывёл і прадметаў і выкарыстоўваць іх для стварэння калажу.
• Арганізуйце ўласны лялечны тэатр. Усё, што вам трэба для пачатку, — гэта шкарпэтка ці нават звычайны папяровы пакет. Атрымлівайце асалоду ад сумеснага баўлення часу!
• Слухайце музыку ці рабіце музычныя інструменты з паўсядзённых прадметаў, такіх як пустыя пластыкавыя бутэлькі з-пад малака, напоўненыя сырым рысам ці галькай.

Час перад экранам тэлевізара/камп’ютара/тэлефона і творчая гульня

Дашкольнікі павінны праводзіць перад экранам не больш за гадзіну на дзень. Пры гэтым ёсць спосабы, як выкарыстаць гэты час творча.

Напрыклад, маляванне па экране можа развіць у вашага дзіцяці здольнасць творча абыходзіцца з формай і колерам. Таксама дзіця можа запазычыць новыя ідэі для гульняў з таго, што яно бачыць у навучальным мультфільме.

У цэлым ключавыя падзеі ў развіцці праходзяць у адным і тым жа парадку, але ўзрост, у якім яны адбываюцца, можа быць розным для кожнага дзіцяці. Калі вас турбуе які-небудзь аспект развіцця вашага дзіцяці, пагаварыце з урачом ці выхавацелем.