Ячмень павека (гардэолум)

Ячмень павека (гардэолум) — інфекцыйнае захворванне, якое развіваецца ў фалікулах веек каля іх кораня або ў залозах павека і характарызуецца з’яўленнем каля асновы веек чырвонага балючага ўшчыльнення невялікага памеру. Цёплыя кампрэсы і далікатны масаж дапамагаюць зняць запаленне. Калі ячмень не пройдзе на працягу некалькіх дзён, трэба паказаць дзіця педыятру. Ячмень павека заразны. Трэба рэгулярна мыць рукі і выкарыстоўваць асобныя ручнікі, каб спыніць распаўсюджванне інфекцыі.

Ячмень павека (гардэолум) — гэта інфекцыйнае захворванне, якое развіваецца ў валасяных мяшочках (фалікулах) веек каля іх кораня або ў залозах павека, часцей выклікаецца бактэрыямі залацістага стафілакока (Staphylococcus aureus).

Захворванне распаўсюджана сярод дзяцей.

Сімптомы

Ячмень выглядае як маленькая чырвоная прыпухласць каля асновы вейка, звычайна развіваецца на ніжнім павеку.

Ён можа выклікаць ацёк павека, якое яго акружае, і быць даволі балючым. Ён таксама можа быць прычынай раздражнення вока і павышанага слёзацячэння.

У большасці выпадкаў ячмень праходзіць на працягу некалькіх дзён.

Як правіла, ён не выклікае ніякага пастаяннага пашкоджання вока ці павека.

Калі звярнуцца да ўрача пры ячмені павека

Трэба паказаць дзіця медыцынскаму спецыялісту (педыятру або афтальмолагу), калі ячмень не знікае на працягу некалькіх дзён пасля пачатку лячэння згодна з прапанаванымі ніжэй рэкамендацыямі.

Таксама пракансультавацца з педыятрам варта пры пагаршэнні агульнага самаадчування і наяўнасці іншых агульных сімптомаў, у тым ліку пры павышэнні тэмпературы цела, галаўным болі і адсутнасці апетыту.

Калі праблема ўплывае на зрок дзіцяці, звярнуцца па медыцынскую дапамогу неабходна абавязкова.

Лячэнне ячменю павека

Для эфектыўнага адыходжання гною з запалёнага ўтварэння на павеку рэкамендаваны сухое цяпло і цёплыя кампрэсы на вобласць вока.

Каб зрабіць кампрэс, вазьміце чысты ручнік, акуніце яго ў цёплую ваду і прыкладзіце да павека на дзве хвіліны. Паўтарайце працэдуру не радзей за тры разы на дзень. Далікатнае масіраванне падчас цёплага кампрэсу спрыяе адыходжанню гною. Не спрабуйце парушаць цэласнасць ячменю і выціскаць яго змесціва.

Таксама ўрач можа назначыць мазь з антыбіётыкамі, а часам нават антыбіётыкі для прыёму ўнутр. У рэдкіх выпадках патрабуецца выдаленне вейка ў месцы пашкоджання. Гэта спрыяе адыходжанню гною і паскарэнню працэсу гаення.

Для прадухілення распаўсюджвання інфекцыі кантралюйце, каб дзіця і іншыя члены сям’і рэгулярна мылі рукі. Дзіцяці неабходна даць асобны ручнік для рук і мяняць яго штодня.