Звычайныя паводзіны дашкольніка (3–6 гадоў): чаго чакаць

Дзеці, старэйшыя за тры гады, — ужо вопытныя даследчыкі навакольнага свету. Яны вельмі цікаўныя і часта задаюць многа пытанняў. Акрамя таго, зараз яны ўмеюць канцэнтравацца, засяроджвацца на рэчах, што прыцягваюць іх увагу: напрыклад, могуць сачыць за мурашамі, якія рухаюцца па дрэве або па дарозе, дзе вы ідзяце.

Вельмі важна даваць дзіцяці дастаткова часу для вывучэння таго, што выклікае ў яго цікавасць: пайсці на прагулку ці крыху раней адправіцца туды, куды вам трэба, каб ваш дашкольнік мог усё даследаваць у сваім тэмпе і без перашкод. Акрамя таго, дзеці гэтага ўзросту часта хочуць большай незалежнасці як у паводзінах, так і ў прыняцці рашэнняў. Ім вельмі патрэбна ваша падтрымка, а таксама магчымасць самастойна рабіць нешта ці прымаць рашэнні адносна таго, што для іх важна (напрыклад, што падарыць сябру на дзень нараджэння, што надзець у дзіцячы сад, куды пайсці пагуляць днём). І ваша падтрымка, і гэтыя магчымасці ўмацоўваюць у дзіцяці ўпэўненасць у сабе. Калі яно адчувае пазітыўную ўвагу, падтрымку, разумее, што побач з вамі бяспечна, гэта стварае цудоўнае асяроддзе для развіцця наяўных навыкаў і выпрацоўкі новых.

У гэтым узросце гульня становіцца вельмі насычанай і творчай: дзіця ўмела даследуе і перажывае сітуацыі, з якімі сутыкаецца кожны дзень, пераносіць чалавечыя паводзіны на жывёл і цацкі, аналізуе розныя адносіны і дзеянні і робіць вывады пра гэта ў гульні — прыдумвае розныя наступствы, разыгрывае пачуцці і многае іншае.

Дзеці ва ўзросце 3–6 гадоў працягваюць імкліва вучыцца. Звычайныя хатнія справы (напрыклад, прыгатаванне ежы, планаванне вольнага часу, паходы ў госці або ў магазін, сервіроўка стала) нясуць у сабе мноства стымулюючых магчымасцей для навучання; залогам поспеху тут з’яўляецца ўдзел дзіцяці і станоўчая ўвага да яго — гэта значыць здольнасць падтрымліваць і нарошчваць вопыт дашкольніка, пахвала яго за ўдзел, цікаўнасць, знаходлівасць і спрыт.

Для дзіцяці ў гэтым узросце вельмі карысная сумесная дзейнасць з аднагодкамі. Гульні з равеснікамі, а таксама ў змешаных групах (групах рознага ўзросту) адкрываюць мноства магчымасцей для вывучэння і спазнання сябе і свету і асабліва міжасобасных адносін. Таму дзецям важна пачынаць наведваць дашкольную ўстанову менавіта ў гэтым узросце. Калі ваша дзіця пойдзе ў дзіцячы сад, майце на ўвазе, што яму будзе патрэбна ваша падтрымка, каб зразумець і прыняць сваю новую ролю, новы распарадак, пазнаёміцца з дарослымі і аднагодкамі і штодня пераключацца з рэальнасці, якая існуе ў дзіцячым садзе, на хатнюю.

У гэтым узросце ваша дзіця адчувае вельмі моцныя эмоцыі, якія хутка мяняюцца, і яно ўсё яшчэ вучыцца разумець іх і кіраваць імі. Такім чынам, дзіцяці па-ранейшаму можа быць вельмі складана рэгуляваць свае паводзіны ў цяжкіх сітуацыях — калі яго нешта хвалюе, палохае ці злуе. Вы можаце дапамагчы яму справіцца з гэтай вялікай і важнай задачай, адкрыта размаўляючы пра пачуцці: выказваючы і прагаворваючы свае розныя эмоцыі, а таксама тлумачачы і называючы перажыванні дзіцяці і яго аднагодкаў.