Детето се гуши - што да правам?

Симптомите зависат од природата на предметот и местото каде што е заглавен во дишните патишта. Кога предмет ќе влезе во дишните патишта, може да се случи драматична сцена: одеднаш дишењето станува тешко, детето се гуши, кашла, поцрвенува. Додека детето кашла и дише, тоа не е во непосредна опасност од смрт. Меѓутоа, ако кашлицата стане послаба, отежнато дишење, свирење во градите, лицето помодрува, а детето ја губи свеста, тогаш предметот целосно ги блокира дишните патишта.

Охрабрете го вашето дете прво да кашла!

Спонтаната кашлица е најдобриот начин за отстранување на туѓи предмети од горниот респираторен тракт. Ако детето не е во состојба да кашла, ако не дише, веднаш отстранете го предметот од дишните патишта и започнете со реанимација.

ВНИМАНИЕ Предметот може да се извлече само со прсти доколку е достапен и видлив!

За исфрлање на вдишан предмет се користат две техники: а) удирање по грбот или притисок врз градите и б) постапка Хајмлих.

Удирање по грб и притисок врз градите

Може да се изведат на неколку начини, во зависност од возраста на детето:

  • Држете го доенчето на подлактицата, свртено „наопаку“ и свртено кон подот. Држете ја главата со дланката на раката на која е поткрепено бебето. Со другата рака, со шаката, удирајте го детето со умерена сила 5 пати на грбот, во пределот помеѓу лопатките.
  • Потоа свртете го детето на грб и поддржете го со подлактицата. Држете ја главата на детето со дланката на таа рака и држете ја главата малку пониско од телото. Слично на масажа на срцето, притиснете ја градната коска 5 пати по ред, но потешко и побавно отколку за време на масажа на срце (еден притисок треба да трае 3 секунди). Ако предметот стане видлив по овие постапки, отстранете го.

За мало дете, извршете ја оваа постапка седејќи на стол: 

Ставете го детето на колена, свртено кон подот и држете ја главата пониско од другите делови на телото. Со дланката, удрете 5 пати силно на грбот, во пределот помеѓу лопатките. 

За постаро дете, постапката извршете ја во стоечка положба:

Кажете му на детето да кашла со сета своја сила. Свиткајте го напред и удрете помеѓу лопатките 5 пати со дланката. Ако ова не помогне или се појават потешки симптоми, ставете ги двете раце околу неговите гради, ставете ги рацете на долниот дел од градната коска и притиснете на градната коска до 5 пати.

Класичниата постапка Хајмлих се изведува кај деца постари од една година: 

Техниките за изведување на оваа постапка се разликуваат во зависност од положбата на детето.

  • Ако детето стои или седи, пријдете му одзади и ставете ги двете раце околу градите на детето, под пазувите. Ставете ја едната рака, стисната во тупаница, во средината на стомакот, веднаш над папокот, и ставете ја другата рака околу стиснатата тупаница. Потоа притиснете нагоре 5 пати по ред, внимавајќи да не го притиснете врвот на градната коска и долниот раб на ребрата. Заземете ја позицијата што најмногу ви одговара - можете да го кренете детето, да клекнете зад него или да го ставите на стол.
  • Ако детето лежи (без свест), постапката Хајмлих се изведува на следниов начин: детето се става да лежи на грб, а главата е исправена, така што лицето е свртено нагоре. Повлечете ги нозете на детето, ставете ја едната дланка во средината на стомакот (над папокот, под врвот на градната коска), ставете ја другата рака преку првата и притиснете нагоре 5 пати по ред. Ако предметот стане видлив по овие постапки, отстранете го и продолжете со вештачко дишење. Ако вештачкото дишење не доведе до подигнување на градниот кош, повторете ја истата постапка за да го исфрлите предметот или да користите друга постапка.

Во случај на тешка опструкција, каде што не сте во можност да го исфрлите предметот со удирања по грбот или со Хајмлиховата постапка, веднаш започнете со кардиопулмонална реанимација (КПР), без одлагање! Дајте 5 вдишувања, и ако протокот на воздухот е се уште блокиран, продолжете со КПР само со притискање на градите. Јавете се на итна медицинска помош една или две минути по започнувањето на реанимацијата!

Што да не се прави

Не обидувајте се да отстраните некој предмет од устата на детето ако предметот не може да се види! Постои сериозен ризик предметот да се истурка уште подлабоко во душникот и со тоа да се влоши состојбата на детето.