Игра на имагинација
Потребни материјали: Не се потребни.
Што можете да направите заедно: Одговорете на некој начин секогаш кога вашето бебе негодува. Нека биде вистински мал „разговор“ - разговарајте со бебето со нежен глас и насмевнете му се додека му зборувате. Додека разговарате, од време на време правете кратки паузи за да му дадете шанса на вашето бебе да се вклучи; во одреден момент, бебето ќе започне да испушта едноставни звуци. Зборувајте со висок или низок тон, обидете се со шепот и пеење. Направете го тоа наизменично со бебето. Повторете ги звуците што ги прави.
Поставете го бебето лице в лице со вас - бебето ќе ве гледа додека ги правите тие звуци. Бебето во оваа позиција може да ве гледа како го менувате изразот на лицето (голема насмевка, испружен јазик, широки очи, подигнати веѓи, подуени образи или дување). Набљудувајте го бебето и доколку забележите дека некои од овие изрази го плашат, брзо променете го изразот на лицето и по некое време обидете се повторно со помек израз на лицето. Запомнете дека секое бебе е различно и реагира на различни начини. Во оваа игра, чувајте го изразот на лицето некое време за да му дадете на вашето бебе шанса да се обиде да создаде нов израз на лицето гледајќи и имитирајќи ве. Повторете го она што го прави бебето.
Друга идеја е да му покажете на бебето кукла, или само ставете мало чорапче на прстот. Кажете го името на бебето додека ја поместувате куклата или чорапата горе-долу. Бидете сигурни дека бебето го следи тоа движење. Потоа движете го прстот наоколу. Секој пат кога ќе го видите вашето бебе како ги следи движењата на куклата, обидете се со ново движење.
Овие се многу удобни рутини при промена на пелени, но исто така може да се користат во секој слободен момент што го поминувате со бебето.
Што учи вашето дете: Во оваа фаза, најдобрата играчка - што најмногу го фасцинира бебето - сте вие! Вашето лице, вашиот глас, вашите раце, вашето тело. Вашето бебе учи да комуницира со вас и внимателно и детално ги набљудува лицата на луѓето, одржува долг контакт со очите.
