Исчашувања, истегнување, дислокации, фрактури
Превенцијата од повреди на мускулите и мускулно -скелетниот систем е важна поради нивната висока фреквенција и вклучува безбеден престој на детето во куќата, на игралиште, во возило, употреба на заштитна опрема за време на спортски и рекреативни активности, како и избегнување на прекумерен напор.
Body
Најчестите знаци и симптоми на повреди на мускулите, коските или зглобовите се:
- болка и непријатност што се засилуваат при движење;
- оток на местото на повредата;
- облик на зглоб или коска што отстапува од нормалното;
- неприродна положба на повредениот дел од телото;
- неможност за користење или поместување на повредениот дел од телото;
- повредениот дел од телото е ладен и нечувствителен.
Што да направите ако детето се повреди?
- Обидете се да го утешите детето и кажете му да не се движи.
- Имобилизирајте го повредениот дел од телото во положбата во која е пронајден - можете да го поддржите со нешто меко (перница, итн.) или да го држите со раката.
- Обезбедете го повредениот дел од телото со шина само кога треба да го преместите детето поради непосредна опасност или состојба која бара итен транспорт до медицинска установа.
- Ако кожата не е оштетена, ставете пластична кеса или крпа со мраз на повредениот дел од телото и чувајте ја најмалку 20 минути. (Можете да ги нанесувате овие облоги секој час во текот на следните 48 часа и да ги чувате околу 20 минути.)
- Чувајте го повредениот дел од телото на ниво на срцето или подигнете го малку, но само ако ова движење не предизвикува дополнителна болка кај детето.
Што да не се прави?
- Не мрдајте и не се обидувајте да го наместите повредениот дел од телото, бидејќи тоа може да ги оштети крвните садови и нервите!
- Не ставајте мраз директно на кожата!
Кога да повикате брза помош?
- Ако се повредени бутната коска или карлицата
- Ако делот од телото под повредата е вкочанет, блед, модар или студен
- Ако има отворена фрактура на коските (искршена коска која излегува од кожата)
- Ако не можете безбедно да го преместите детето
Ако детето е во несвест и не покажува знаци на живот, потребно е веднаш да се започне со кардиопулмонална реанимација и што е можно поскоро да се повика итна медицинска помош (194).
