Општи препораки за мали деца со прекумерна тежина и дебелина од втора година натаму
Вишокот телесна тежина најчесто се јавува како последица на прекумерно внесување храна или недоволна физичка активност, ретко е од генетски нарушувања. Промените во животната средина и начинот на згрижување на детето исто така може да влијаат на телесната тежина и треба внимателно да се земат предвид. Прекумерната тежина доведува до бројни здравствени проблеми: деформации на коските и зглобовите, болести на срцето и крвните садови, ендокрини заболувања, депресија, слаба самодоверба и пониски академски достигнувања подоцна во животот и важно е да се открие овој вишок на време и да се преземат мерки за враќање на телесната тежина во типичните трендови на раст.
Ако видите дека вашето дете започнало да добива вишок килограми, можете да го однесете на лекар / педијатар на подетален преглед, но има некои мерки што можете сами да ги преземете.
Препораки за мало дете:
- Бидете сигурни дека вашето дете има соодветен број на оброци и внес на храна што е во количина и содржина во согласност со препораките за оптимална исхрана соодветна на возраста;
- Охрабрете го да јаде повеќе шарен зеленчук (особено темно зелен, црвен и портокалов) и разновидно свежо овошје;
- Можете да дадете природен исцеден овошен сок само како дел од оброкот, а не во поголема количина од 120 -180 мл;
- Понудете му на детето чиста вода кога е жедно наместо засладени течности (засладени чаеви, газирани пијалоци, сокови);
- Изберете да дадете леб, тестенини и житни култури направени од цели зрна;
- Изберете здрави протеини: пилешко, мешунки, сирења со малку маснотии, итн;
- Може да дадете полномасно пастеризирано млеко на деца на возраст од 1-2 години и обезмастено млеко на деца постари од 2 години;
- Обезбедете разновидна и врамнотежена исхрана со минимална преработка;
- Избегнувајте да му давате на вашето дете високо калорична и солена храна (масни колачи, закуски, чипс), што ќе го засити и ќе му го намали апетитот за повеќе хранлива храна;
- Избегнувајте да му нудите на вашето дете засладена храна: слатки, колачиња, чоколадо, чоколадно млеко;
- Разговарајте со вашето дете за да му дадете до знаење дека го поддржувате;
- Фокусирајте се на постепено менување на нивото на физички активности и навики во исхраната на целото семејство, така што детето не се чувствува осамено;
- Бидете позитивен пример за вашето дете;
- Воспоставете рутини во исхраната, активностите и спиењето, оставете му доволно време да спие;
- Ограничете го времето на седење пред екран (таблет, ТВ, телефон) на помалку од 1 час;
- Вклучете го вашето дете, ако е постаро од 2 години, во умерени и интензивни физички активности поделени во пократки интервали, во кои ќе ужива заедно со целото семејство и кои не му се премногу тешки (брзо одење, пливање, скокање, игри со топка, возење велосипед) најмалку 60 до 90 минути во текот на денот.
Прифатете ги промените и новите навики што ќе го направат целото семејство активно и здраво!
