Што е шарлах

Шарлах е болест која се карактеризира со типичен осип што може да се случи кога детето има инфекција предизвикана од бактеријата Стрептококус пиогени (стрептокок група А). Обично станува збор за инфекција на грлото, но понекогаш може да биде и инфекција на кожата. Симптомите на шарлах се развиваат кога бактериите ослободуваат токсини што се шират низ телото на детето.

Стрептококната бактерија од групата А може да се пренесе од човек на човек преку кивање, кашлање или допирање на рани на некој со инфекција на кожата.

Симптоми на шарлах

Децата со шарлах речиси секогаш имаат:

• воспалено грло
• осип
• болни и отечени лимфни жлезди на вратот
• треска
• повраќање

 Осип

Осипот изгледа како изгореници од сонце, а на допир е како рапава хартија. Обично започнува на лицето или вратот и се шири на телото, рацете и нозете. Ако се притисне зацрвенетата кожа, таа станува бледа.

Наборите на кожата околу препоните, пазувите, лактите, колената и вратот обично се потемно црвени од околниот осип.

 Лицето може да изгледа црвено со блед прстен околу устата

Јазикот на детето исто така станува светло црвен и се нарекува „јазик како јагода“.

По исчезнувањето на инфекцијата, кожата може да се излупи, обично на врвовите на прстите на рацете и нозете.

Ако вашето дете има шарлах, тоа е заразно само 1-2 дена по започнување на лекувањето. Но, детето може да биде заразно 10-21 дена ако не се лекува.

Дали вашето дете треба да оди на лекар за шарлах?

Да. Треба да го однесете вашето дете на лекар доколку покажува симптоми на шарлах.

Тестови за шарлах

Матичниот лекар или педијатар може да ве упати да направите брис за грло за да потврди дека вашето дете има инфекција со пиоген стрептокок.

Лекување на шарлах

Шарлахот изгледа драматично, но обично лесно се лекува со антибиотици од групата пеницилин. Ако вашето дете е алергично на пеницилин, лекарот ќе ви препише друг вид антибиотик.

Со лекување, вашето дете обично ќе се подобри во рок од 24-48 часа.

Компликации на шарлах

Доколку не се лекува, овој вид инфекција може да предизвика компликации како што е тешка стрептококна инфекција, а понекогаш и компликации како што се ревматска треска и оштетување на бубрезите (гломерулонефритис).

Превенција на шарлах

Не постои вакцина за шарлах.

За да спречите ширење на стрептокок од група А, вие, вашето дете и другите членови на семејството треба редовно да ги миете рацете со топла вода со сапун. Сите треба да се обидете да ги држите рацете подалеку од очите, носот и устата.