Tуберкулоза

Туберкулозата е заразна болест предизвикана од бактеријата Mycobacterium tuberculosis. Болеста најчесто ги зафаќа белите дробови, но може да се прошири и на други делови од телото: бубрези, коски, мозок, црева итн., кога симптомите и знаците на болеста се поврзани со зафатениот орган. Една третина од светското население ја носи оваа бактерија и нема симптоми на болеста (латентна форма). Сепак, 10% од заразените лица ќе се разболат во одреден момент од нивниот живот, кога ќе се намали нивната отпорност.

Извор на инфекција

Изворот на инфекцијата е болно лице кое со кивање, кашлање и плукање, исфрла капки со бактерии во околниот воздух. Кога друго лице ги вдишува тие капки, се заразува. Брзо се шири во сиромашни и пренатрупани области, така што членовите на семејството и блиските пријатели на заразено лице се во поголем ризик да ја добијат болеста. Фактори на ризик за развој на болеста вклучуваат фактори на животната средина, како што се пушење, употреба на алкохол и дрога и имунодефициенција (како кај ХИВ/СИДА).

Период на инкубација

Болеста може да се појави неколку недели по инфекцијата или години подоцна.

Симптоми и знаци на белодробна туберкулоза се:

• Кашлица која трае три или повеќе недели
• Кашлање крв или гноен спутум
• Болка во градите при дишење и кашлање
• Замор
• Треска
• Ноќно потење
• Губење на апетит
• Слабеење

Ако овие знаци и симптоми на болеста се појават кај вашето дете, неопходно е да се консултирате со лекар, особено ако детето било во контакт со лице кое боледува од туберкулоза.

Третман на туберкулоза

Оваа болест се третира со лекови против туберкулоза, а третманот е долготраен. Децата под 2 -годишна возраст се особено подложни и склони кон тешки, широко распространети форми на болеста, кои тешко се откриваат и третираат, кои можат да бидат фатални.

Третман на латентна туберкулоза

Ако дете или постари лица биле заразени со туберкулоза по изложеност на болно лице, многу често треба да се лекуваат дури и ако немаат симптоми за искоренување на бактериите и за да се спречи реактивирање на болеста кога ќе се намали имунолошкиот одговор. Откривање на претходна инфекција се врши со кожен тест наречен Манту - туберкулински тест или испитување на крвта.  Тестот за кожа се изведува со инјектирање на мала количина течност во кожата на долниот дел од раката. Лицето на кое му е даден туберкулински тест мора да се врати во рок од 48 до 72 часа за резултатот да го прочита обучено лице според реакцијата на кожата на раката. Резултатот зависи од големината на отокот.

Превенција

За заштита на доенчињата од туберкулоза, за превенција се користи жива вакцина BCG (Bacillus Calmette Guerin). Тоа е ослабен тип на туберкулозна бактерија која предизвикува инфекција на крави, но не и на луѓе. Тоа е важна вакцина за бебиња бидејќи може да ги спречи поголем дел од мозочните инфекции и речиси половина од белодробните компликации со туберкулоза. Новородените бебиња ја примаат оваа вакцина во левата надлактица пред да бидат отпуштени од болница. Во случај да не ја примило поради некоја причина (породување надвор од родилиште или друго), неопходно е да се даде вакцината до возраст од 2 месеци и најдоцна до 12 месеци. 

Во превенција од туберкулоза и нејзино ширење, најважна здравствена мерка е вакцинацијата на децата, но и раното откривање и лекување на заразените лица.