Вообичаено однесување кај бебе: плачење

Бебињата се раѓаат со способност да плачат. За бебето плачењето е основен начин да комуницира со околината и да ви пренесе дека е гладно, уморно, му е непријатно, нешто го боли, но и дека му треба нежност, друштво или утеха.

Плачењето на бебето се менува како што расте. Во просек, малите бебиња плачат до три часа дневно, а 1 од 10 бебиња и подолго. Бебињата на возраст од 6-8 недели најмногу плачат, а како што растат, должината на плачење треба да се намалува. Пред шестиот месец, бебињата најинтензивно ќе плачат доцна попладне и навечер. Можеби е утешно да се знае дека овој вид на плачење обично престанува до петтиот месец од животот на бебето. Како што расте бебето, плачењето ќе се јавува во текот на денот, но ќе биде пократко и помалку интензивно и најмногу ќе биде поврзано со нешто што бебето сака да ви каже.

Што да направите кога бебето плаче? Првото нешто што можете да го направите е да проверите дали е гладно, уморно или му е непријатно. Тогаш ќе ви биде лесно да одговорите на плачењето: ќе го нахраните, ќе го заспиете или ќе му ја промените пелената. Еве уште неколку работи што можете да ги направите:

Нежно нишкајте го. Нежните движења и блискоста со родителите можат да имаат смирувачки ефект.
Одете на прошетка (ако не сте премногу уморни за тоа).
Избањајте го или нежно масирајте го. Допирот и масажата можат да бидат смирувачки и да ја зајакнат врската меѓу вас. Прашајте ја вашата патронажна сестра како безбедно да го масирате вашето бебе.
Разговарајте со вашето бебе тивко, пејте му или пуштете тивка музика додека го нишате или гушкате. Понекогаш музиката и звуците на апаратите како што се фен за коса или правосмукалка може да го смират бебето.
Смирете го вашето бебе со намалување на стимулацијата - пригушете ги на пример светлата.

Плачот на бебето може да биде многу вознемирувачки за родителите и тие може да се чувствуваат исплашени, лути или под стрес. Обидете се да најдете време за прошетка, читање книга, уживање во вежбање или капење - барем накратко. Кога вашето бебе плаче и чувствувате дека повеќе не можете да издржите, ставете го бебето на безбедно место и излезете од собата. Никогаш не го тресете бебето - тоа може да доведе до опасни повреди на мозокот.

Побарајте помош и отворено разговарајте за вашите чувства. Иако е важно да верувате дека правите се што можете и дека плачењето ќе помине, кога бебињата плачат долго и интензивно, многу родители ќе се чувствуваат уморни и нервозни. Затоа, важно е да побарате совет и да разговарате за тоа што доживувате и како реагирате.