Diabeti i tipit 2

Simptomat e diabetit të tipit 2 përfshijnë lodhje, etje dhe urinim të shpeshtë. Fëmija juaj duhet të vizitojë mjekun për këto simptoma. Faktorët e rrezikut për diabetin e tipit 2 përfshijnë historinë familjare të diabetit të tipit 2, të qenit mbi një peshë të shëndetshme, të mos ushtroni mjaftueshëm dhe të mos hani një dietë të shëndetshme. Diabeti i tipit 2 mund të menaxhohet nëpërmjet mjekimit, dietës, humbjes së peshës dhe ushtrimeve fizike.

Rreth diabetit të tipit 2

Diabeti i tipit 2 shfaqet kur:

  • pankreasi nuk prodhon mjaftueshëm insulinë
  • insulina që prodhon pankreasi nuk funksionon siç duhet
  • organizmi bëhet rezistent ndaj insulinës.

Insulina është një hormon që normalisht ndihmon që glukoza të kthehet në energji për trupin. Glukoza është forma më e thjeshtë e sheqerit dhe burimi kryesor i energjisë së trupit. Insulina gjithashtu pengon zbërthimin e yndyrës.

Kur trupi nuk e kthen dot glukozën në energji, glukoza grumbullohet në gjak. Sheqeri i lartë në gjak krijon shumë probleme shëndetësore nëse nuk trajtohet. Gjithashtu, nivelet e ulëta të insulinës shkaktojnë akumulimin e acideve yndyrore në gjak.

Diabeti i tipit 2 është i lidhur me faktorët e rrezikut të stilit të jetesës, duke përfshirë:

  • të qenit mbi një peshë të shëndetshme, veçanërisht rreth barkut
  • duke mos ushtruar mjaftueshëm
  • të pasurit e një diete jo të shëndetshme, veçanërisht me shumë sheqer dhe yndyrë.

Faktorë të tjerë rreziku përfshijnë të pasurit anëtarë të tjerë të familjes me diabet të tipit 2 dhe të qënit nga një prejardhje etnike me rrezik më të lartë.

Shenjat dhe simptomat e diabetit të tipit 2

Shenjat dhe simptomat e diabetit të tipit 2 përfshijnë:

  • urinim të shtuar për disa javë
  •  rritje të etjes dhe konsumimit të pijeve për disa javë
  • shtim në peshë
  • lodhje
  • ndryshime të humorit
  • dehidratim.

Kur ka nivele të larta të sheqerit në gjak, veshkat përpiqen ta nxjerrin atë me anë të urinës. Kjo është arsyeja pse fëmijët me diabet të tipit 2 mund të jenë duke urinuar më shumë. Dhe për shkak se trupi prodhon shumë urinë në përpjekje për të hequr qafe sheqerin, ai gjithashtu përdor dhe humb shumë ujë. Kjo është arsyeja pse fëmijët mund të dehidratohen.

A ka nevojë fëmija juaj të vizitojë mjekun për simptomat e diabetit të tipit 1?

Po. Nëse fëmija juaj ka disa ose të gjitha shenjat dhe simptomat e diabetit të tipit 2 të listuara më sipër, konsultohuni me mjekun tuaj.

Analizat për diabetin e tipit 2

Mjeku mund të diagnostikojë diabetin tek fëmija juaj duke bërë një analizë gjaku duke shpuar gishtin dhe një analizë të urinës, dhe duke rishikuar simptomat e fëmijës suaj. Nëse ka glukozë në urinën e fëmijës tuaj dhe nivel të lartë të glukozës në gjakun e tij/saj, mjeku do t'ju dërgojë ju dhe fëmijën tuaj në departamentin më të afërt të emergjencës.

Mjekët në departamentin e emergjencës mund të bëjnë më shumë analiza nëse nuk janë të sigurt nëse fëmija juaj ka diabet të tipit 2 ose të tipit 1.

Trajtimi i diabetit të tipit 2

Nuk ka kurë të shpejtë për diabetin e tipit 2, por fëmija juaj mund ta menaxhojë këtë gjendje shëndetësore me sukses.

Qëllimi i menaxhimit të diabetit të tipit 2 është mbajtja e niveleve të sheqerit në gjak brenda kufijve të synuar.

Fëmija juaj me shumë mundësi do të ketë një plan menaxhimi që përfshin disa ose të gjitha trajtimet dhe strategjitë e mëposhtme:

  • barna
  • ndryshime në dietë
  • ushtrime fizike
  • humbje peshe
  • analiza të rregullta të glukozës në gjak
  • injeksione insuline nëse diabeti është i rëndë.

Ekipi i diabetit të fëmijës suaj do të punojë me ju dhe fëmijën tuaj për të zhvilluar një plan individual menaxhimi.

Parandalimi i komplikimeve nga diabeti i tipit 2

Nivelet e larta të sheqerit në gjak mund të çojnë në komplikime afatgjata si dëmtim nervor, dëmtim të veshkave, probleme me shikimin, dhimbje ose humbje të ndjeshmërisë në duar dhe këmbë dhe sëmundje të zemrës.

Fëmija juaj nuk ka gjasa të ketë këto komplikime, por ai/ajo duhet të menaxhojë me kujdes diabetin e tij/saj për të shmangur komplikimet në të ardhmen.

Nëse e gjithë familja juaj ha mirë dhe bën mjaftueshëm aktivitet fizik ditor, ju jepni një shembull të mirë për fëmijën tuaj dhe e bëni më të lehtë për të që t'i përmbahet planit të tij/saj të menaxhimit të diabetit.

Parandalimi i diabetit të tipit 2

Diabeti i tipit 2 ka një lidhje të fortë me historinë familjare, por varet edhe nga faktorët mjedisorë që mund t'i kontrolloni me sukses!

Një mënyrë jetese e shëndetshme mund të ndihmojë në parandalimin e diabetit të tipit 2, duke përfshirë aktivitetin e rregullt fizik dhe ushqimin e shëndetshëm.

Diabeti i tipit 2 prek më së shumti personat e moshuar. Është e pazakontë që fëmijët nën 10 vjeç të preken nga diabeti i tipit 2.