Fillimi i dërgimit të fëmijës në qendrat e kujdesit (çerdhet) për fëmijë: ndjenjat

Ndjenjat e fëmijës suaj për qendrat e kujdesit për fëmijë: ankthi i ndarjes dhe frika nga të huajt

Shumë foshnja dhe fëmijë janë të lumtur dhe të kënaqur me fillimin e qëndrimit në qendrat e kujdesit për fëmijët.

Mirëpo shumë foshnja dhe fëmijë kanë edhe disa reagime më pak pozitive:

• Ankthi i ndarjes: kjo ngjan kur fëmijët mërziten kur i lini në qendrat e kujdesit. Ankthi i ndarjes e arrin kulmin rreth moshës 14-18 muajve, edhe pse edhe fëmijët më të mëdhenj mund ta përjetojnë atë.
• Frika nga të huajt: kjo është kur fëmijët mërziten rreth njerëzve të tjerë. Zakonisht arrin kulmin rreth moshës 7-10 muajsh.

Ankthi i ndarjes dhe frika nga të huajt janë pjesë normale të zhvillimit të fëmijës, andaj shumë foshnja dhe fëmijë deri diku i përjetojnë këto ndjenja. Kjo ngjan pavarësisht nëse shkojnë ose nuk shkojnë fëmijët në qendrat për kujdesin e fëmijëve (çerdhet).   

Këto situata bëhen të vështira pasi gjatë zhvillimit të fëmijës, koha kur ndodh ankthi i ndarjes dhe frika nga të huajt është shpesh koha kur prindërit po planifikojnë të kthehen në punë dhe ta fillojnë dërgimin e fëmijëve në qendrat e kujdesit (çerdhet).

Pra, nëse foshnja ose fëmija juaj e fillon qëndrimin në qendrën e kujdesit (çerdhe) dhe përjeton ankthin e ndarjes dhe frikën nga të huajt, nuk është faji juaj - është vetëm mënyra se si zhvillohen foshnjat.

Ankthi i ndarjes dhe frika nga të huajt në qendrën e kujdesit (çerdhe): çfarë mund të bëni

Përpiquni të mos shqetësoheni. Fëmijët zakonisht përshtaten kur fytyrat e reja në mjedisin e tyre të çerdhes bëhen të njohura. Thjesht mund të duhen disa fëmijë pak më shumë se të tjerët.

Ju mund ta ndihmoni fëmijën tuaj t’i tejkalojë ankthet duke kaluar kohë së bashku në mjedisin e ri të çerdhes kur jeni duke u përgatitur për ta filluar dërgimin e fëmijës në çerdhe.

Po ashtu është mirë të kaloni pak kohë me fëmijën tuaj para se ta lini vetëm. Në javët e para të dërgimit të fëmijës në qendrën e kujdesit, nëse është e mundur, përpiquni ta lini fëmijën tuaj për periudha të shkurtra derisa të arrini ta lini aty deri në një ditë të tërë.

Si ndihen fëmijët për fillimin e qëndrimit në qendrën e kujdesit për fëmijë: faktorë të tjerë

Ka disa gjëra të tjera që ndikojnë në mënyrën se si fëmija juaj mund të ndiejë dhe ti përgjigjet fillimit të qëndrimit në qendrën e kujdesit:

• Marrëdhënie të beueshmërisë, kujdesit me edukatorët dhe kujdestarët: këto marrëdhënie e ndihmojnë fëmijën tuaj t’i përgjigjet mirë kujdesit të fëmijëve.
• Ambienti i qendrës së kujdesit për fëmijë: nëse mjedisi është si vendet e tjera, me të cilat fëmija juaj është i njohur, fëmija juaj mund të ndihet më rehat.
• Përvojat e fëmijës suaj për t’u kujdesur jashtë familjes suaj të ngushtë: këto përvoja i japin fëmijës suaj praktikë në ndërtimin e marrëdhënieve dhe e ndihmojnë atë të mësojë se gjithmonë do të ktheheni.
• Temperamenti i fëmijës suaj: kjo ndikon në mënyrën se si fëmija juaj përgjigjet ndaj ndryshimeve, duke përfshirë mjedisin e ri si qendrën e kujdesit për fëmijë.
• Preferencat personale të fëmijës suaj: për shembull, fëmija juaj mund të ndihet më komod nëse rutinat e ambientit janë të përshtatshme për mënyrën se si i pëlqen të ushqehet, rehatohet dhe qetësohet.
• Mosha dhe faza e zhvillimit të fëmijës suaj: për shembull, foshnjat më të vogla se gjashtë muaj janë shpesh të lumtur që lihen me edukatorë sepse nuk e kanë zhvilluar ende ankthin e ndarjes ose frikën nga të huajt.
• Numri i ditëve që fëmija juaj është në qendrën e kujdesit: fëmijët që qëndrojnë më pak ditë në javë në qendër të kujdesit (çerdhe) kanë më pak kohë për t’u adaptuar dhe rehatuar në mjedisin e tyre të ri.

Nëse mendoni se fëmija juaj me të vërtetë nuk po rehatohet në qendrën e kujdesit për fëmijët, është e rëndësishme të shkëmbeni informacione dhe ide me edukatorët.

Ndjenjat tuaja për fillimin e qëndrimit në qendrën e kujdesit për fëmijët

Fillimi i dërgimit të fëmijës në qendrën e kujdesit për fëmijë është një ndryshim i madh. Mund të jetë një kohë emocionuese dhe emocionale për familjet - si për fëmijët ashtu edhe për prindërit.

Edhe nëse keni ndjenja të përziera për ndryshimet në jetën tuaj familjare, është e rëndësishme për ju që të jeni pozitiv në lidhje me qendrën për kujdesin e fëmijëve me fëmijën tuaj. Fëmijët kanë një aftësi të mahnitshme për të mësuar kur prindërit e tyre janë të brengosur ose të shqetësuar, kështu që përpiquni të mos ndani shqetësimet ose ndjenjat e shqetësuara me fëmijën tuaj. Nëse fëmija juaj ndjen se ju pëlqen shërbimi dhe u besoni edukatorëve, ai ka më shumë gjasa t’i ndiejë edhe këto gjëra.

Kjo nuk do të thotë që ju nuk mund t’i shfaqni ndjenjat tuaja. Ju mund të dëshironi t’i ndani ato me partnerin tuaj, një mik ose një anëtar të familjes që mund t’ju japë një mbështetje gjatë kësaj kohe emocionale.