Fillimi i hershëm i ushqyerjes me gji -menjëherë pas lindjes

Kontakti lëkurë me lëkurë me nënën e mban të sapolindurin në mënyrë optimale ngrohtë dhe inkurajon instinktet e tij/saj të të ushqyerit. Ai/ajo merr ushqimin e parë, kulloshtrën, qumështin e pasur me një rol mbrojtës. Thithja ndihmon mitrën të tkurret, përshpejton daljen e placentës dhe parandalon gjakderdhjen. Edhe ushqyerja e hershme me gji ndihmon për të krijuar një lidhje të fortë mes nënës dhe foshnjës.

Shtrirë mbi kraharorin dhe barkun e nënës, i tharë dhe i ngrohtë, pas fazës së pushimit dhe të mësuarit me mjedisin e ri, i sapolinduri vendos dorën në gojën e tij/saj dhe bën lëvizje dhe tinguj thithës. Ai/ajo lëviz drejt thithkës, e gjen atë dhe e merr atë në gojën e tij/saj të hapur. Gjidhënia e parë duhet parë më shumë si një prezantim me gjirin; i sapolinduri nuk duhet të detyrohet duke ia shtyrë gjoksin në gojë. Nëna nuk duhet të ndjejë presion për sa i përket shpejtësisë së fillimit të ushqyerjes me gji dhe kohëzgjatjes së saj.

Përfitimet e qëndrimit në një dhomë të nënës dhe fëmijës:

Instinkti natyror i nënës dhe i të sapolindurit është të jenë së bashku pas lindjes; nuk ka arsye për të ndarë një të sapolindur të shëndetshëm nga nëna e tij/saj. Qëndrimi në një dhomë i lejon nënës të zhvillojë instinktet mëmësore në një kohë kur hormonet e trupit të saj po e programojnë atë për këtë rol. Vonimi dhe kufizimi i qëndrimit së bashku mund të ketë pasoja të dëmshme për të vendosur një lidhje emocionale dhe sukses në ushqyerjen me gji.

• Kur i sapolinduri juaj është me ju, ai/ajo fle më mirë dhe qan më pak;
• Ushqyerja me gji është më e suksesshme dhe zgjat më shumë; fëmija fiton peshë më shpejt;
• Ushqyerja me gji sipas kërkesës është më e lehtë kur fëmija është afër, dhe kjo gjithashtu stimulon shtimin e prodhimit të qumështit;
• Do të fitosh vetëbesimin e nevojshëm duke u kujdesur për fëmijën tënd;
• Do të shihni se foshnja është mirë dhe nuk do të shqetësoheni nëse ai/ajo qan, ndërsa qëndron në një pjesë tjetër të maternitetit;
• Fëmija rrezikohet më pak ndaj infeksioneve;
• Mund të kesh frikë se nuk do të jesh në gjendje të pushosh, në fakt, rezulton se nëna fle më mirë kur fëmija është në një shtratth pranë saj.

Rreziqet e shtesave të panevojshme

Një sasi e vogël kulloshtre është e mjaftueshme për të përmbushur nevojat e një të sapolinduri të shëndetshëm të lindur në kohë, në ditët e para të jetës. Foshnjat fillimisht kanë nevojë për një sasi shumë të vogël qumështi. Sasia e kulloshtrës që foshnja thith gjatë një seance të ushqyerjes me gji ditën e parë është 2 deri në 10 ml, në ditën e dytë - 5 deri në 15 dhe në ditën e tretë - deri në 30 ml. Gjëndrat mamare prodhojnë një sasi të mjaftueshme qumështi për ditët e para; ndërsa nevojat për sa i përket sasisë së qumështit rriten, foshnja i siguron vetes sasinë e nevojshme të qumështit duke thithur shpesh.

Kulloshtra i siguron të sapolindurit sasinë e nevojshme të lëndëve ushqyese dhe lëngjeve, si edhe mbrojtjen nga infeksionet. Shtesat e panevojshme mund të bëjnë që fëmija të mos dojë më të thithë, për shkak të ndjenjës së stomakut plot. Furnizimi me qumësht do të pakësohet ose gjinjtë tuaj do të bëhen të plotë dhe të fryrë. Nëse përdoren shtesat për të qetësuar foshnjën, mund të të minohet besimi se do të jesh në gjendje t'i japësh gji fëmijës me sukses.

Nisma Spital Mik i Foshnjës i Organizatës Botërore të Shëndetësisë dhe UNICEF-it bazohet në 10 Hapat për një ushqyerje të suksesshme me gji, të cilat janë njohur dhe verifikuar si faktorë kyç të suksesit të ushqyerjes me gji. Hapat më të rëndësishëm të Nismës në maternitet janë kontakti lëkurë me lëkurë, nëna dhe i sapolinduri në një dhomë, ushqyerja sipas kërkesës dhe  shmangia e shtesave të panevojshme. Sa më shumë hapa të zbatohen vazhdimisht në maternitet, aq më i lartë është suksesi i ushqyerjes me gji!