Kush është ky person?

Materialet që ju nevojiten: Asnjë

Çfarë mund të bëni së bashku: Ju mund të habiteni që në këtë moshë, fëmija juaj papritmas fillon të ketë frikë, turp apo të shqetësohet kur takon njerëz që ajo ose ai nuk i njeh. Ndoshta më parë fëmija juaj u dhuronte të gjithëve buzëqeshje të mëdha. Ky është një hap tjetër në zhvillimin e fëmijës tuaj. Kjo tregon se fëmija juaj e njeh dhe kujdeset shumë për diferencën ndërmjet jush - njerëzve të tij të veçantë - dhe të gjithë të tjerëve.

Kur është e mundur, jepini fëmijës tuaj kohë që të pëlqejë një person të ri. Mbajeni fëmijën tuaj, flisni lirshëm me personin tjetër dhe duke e bërë këtë gjë, ju e ngushëlloni fëmijën tuaj. Në vend që ta ngacmoni ose ta nxisni fëmijën tuaj (“Mos u trego kaq i/e ndrojtur!”), lëreni atë të përgjigjet, apo mos të përgjigjet, në ndonjë mënyrë që duket se e bën fëmijën tuaj të ndihet më i/e relaksuar. Nëse personi i ri fillon ta mbingarkojë fëmijën tuaj me mirëdashësi, ju thjesht mund të thoni: “Le t'i japim pak kohë për t'ju njohur”, duke shmangur përsëri etiketimin e fëmijës tuaj si fëmijë i ndrojtur ose i frikësuar. Në varësi të situatës, ju mund t'i jepni personit të ri një lodër të vogël ose një send tjetër që fëmija juaj mund të jetë kurioz për të “thyer akullin”.

Çfarë po mëson fëmija juaj: Kjo jorehati me njerëz të rinj mund të zgjasë për një kohë të gjatë, por fëmija juaj po mëson dy gjëra. Së pari, ai ose ajo po mëson se ju jeni burim sigurie dhe ngushëllimi në situata shqetësuese (siguri emocionale). Së dyti, fëmija juaj po mëson se njerëzit e tjerë janë shpesh mjaft të mirë dhe mund të jetë kënaqësi të kalosh kohë me ta (zhvillimi shoqëror). Si gjithmonë, mbështetja juaj bën ndryshim të madh.