Karakteristikat specifike të lëkurës së foshnjës

Lëkura e të porsalindurit është e hollë dhe e ndjeshme, e mbuluar me një shtresë vajore të quajtur verniks; nuk është e zhvilluar dhe struktura dhe funksioni i saj dallojnë nga lëkura e të rriturve.

Lëkura përbëhet nga tri shtresa të dallueshme

Shtresa e parë - epiderma

Kjo shtresë ka një funksion pengues dhe i jep lëkurës qëndrueshmëri dhe mbrojtje. Foshnja ndjen përmes saj, është më e hollë dhe më e depërtueshme se tek të rriturit. Lëkura e foshnjës thith më shumë substanca të dëmshme sesa lëkura e të rriturve.

Shtresa e dytë - derma

Derma përmban gjëndra djerse, gjëndra dhjamore, gjëndra të flokëve dhe ind lidhës. Tek foshnjat, funksioni i gjëndrave të djersës dhe atyre dhjamore është i reduktuar. Kjo e vështirëson rregullimin e ndryshimeve të temperaturës së trupit tek foshnjat. Kur nuk ka djersë dhe trupi mbinxehet, ai nuk mund të ftohet përmes lëkurës së foshnjës. Mbështjellësi i lëkurës (shtresa hidrolipide) përbëhet nga uji dhe yndyra fine (të imta) të cilat largojnë mikrobet me aciditetin e tyre të butë. Kjo është arsyeja pse është e rëndësishme të mos i lani shpesh foshnjat e porsalindura.

Shtresa më e thellë - hipoderma

Shtresa yndyrore nënlëkurore, hipoderma, përbëhet nga indi yndyror që përmban enët e gjakut dhe nervat. Ajo ruan energjinë (indi dhjamor), siguron mbrojtje dhe izolim. Rrjeti i enëve të gjakut është i nënzhvilluar, si rezultat i të cilit foshnja është termikisht e paqëndrueshme, pra përshtatet ngadalë me ndryshimet e temperaturës. Në dy deri në tri javë, foshnja fiton peshë, shtresat e lëkurës trashen dhe gjendja ndryshon ndjeshëm. Gjatë muajve të parë, lëkura bëhet më e fortë, duke u bërë kështu më pak e ndjeshme ndaj faktorëve të jashtëm. Ndonjëherë, zakonisht në anën e pasme, ka qime të holla delikate të quajtura lanugo dhe në fytyrë mund të shihen njolla të vogla të bardha, më të vogla se maja e një gjilpëre (milia).

Lëkura e foshnjës ndonjëherë mund të jetë e thatë, e plasaritur, e rrudhur, shumë e kuqe ose e larme. Skuqja në fytyrë dhe trup ose njollat ​​e kuqe mund të duken dramatike por të nesërmen ato zhduken sikur të mos kishin ekzistuar kurrë. Të gjitha këto ndryshime janë normale, ato ndodhin për shkak të papjekurisë së lëkurës, dhe ndërsa fëmija rritet dhe fiton peshë, lëkura zhvillohet, shtresa nënlëkurore rritet, shumica e ndryshimeve tërhiqen spontanisht dhe nuk kërkojnë trajtim