Çfarë është testikuli i pazbritur?

Kur një djalë zhvillohet në mitër, testikujt e tij (testet) formohen në barkun e tij. Në muajt e fundit të zhvillimit, testikujt lëvizin poshtë në skrotum. Një testikul i pazbritur është ai që nuk ka lëvizur poshtë për t'u ulur plotësisht brenda skrotumit në lindje.

Rreth 2-4% e djemve të porsalindur kanë një testikul të pazbritur. Për disa djem, testikuli mund të lëvizë poshtë vetë brenda tre muajve të parë.

Rrallëherë një testikul mund të bëhet i pazbritur në moshën rreth 4-10 vjeç. Në këtë rast, testikuli është në skrotum në lindje. Ndërsa djali rritet, kordoni i ngjitur në testikul (kordoni spermatik) nuk zhvillohet me të njëjtin ritëm. Kjo bën që testikuli të tërhiqet deri në ijë.

Një testikul i pazbritur mund të rrisë rrezikun e disa problemeve shëndetësore, duke përfshirë përdredhjen (torzionin), herninë, ulje të fertilitetit dhe kancer të testikulit.

Termi mjekësor i testikulit të pazbritur është kriptorkidizëm.

Një testikul i pazbritur dallon nga një testikul i tërhequr. Një testikul i tërhequr është ai që qëndron normalisht në skrotum, por tërhiqet lart kur djali juaj ka të ftohtë, turpërohet ose është i mërzitur. Zbret përsëri kur djali juaj ngrohet ose qetësohet. Edhe pse testikujt e tërhequr konsiderohen normal, është ide e mirë që të bëhet një kontrollë tek mjeku juaj.

Simptomat e testikulit të pazbritur

Një testikul i pazbritur nuk gjendet në skrotum. Zakonisht qëndron në ijë ose në fund të barkut.

Kjo gjendje nuk shkakton dhimbje.

Herë pas here kur jeni duke e larë djalin tuaj të vogël ose duke ia ndërruar pelenën, kontrolloni që të mund t'i shihni dhe ndjeni të dy testikujt e tij në skrotum. Mjeku juaj do t'i kontrollojë gjithashtu gjatë kontrolleve rutinore. 

A ka nevojë fëmija juaj të vizitojë mjekun për një testikul të pazbritur?

Nëse mendoni se djali juaj ka një testikul të pazbritur, duhet ta vizitoni mjekun tuaj. Mjeku juaj mund ta udhëzojë djalin tuaj tek një kirurg.

Rrallëherë nevojitet ekografi ose analiza tjera.

Trajtimi për testikulin e pazbritur

Nëse pas lindjes është gjetur një testikul i pazbritur, djali juaj duhet të rivlerësohet në 3 deri në 6 muaj. Nëse testikuli i djalit tuaj nuk ka zbritur deri në këtë kohë, ai mund të ketë nevojë për operacion për ta ulur atë në skrotum.

Ky operacion quhet orkidopeksi dhe zakonisht bëhet rreth moshës 1 vjeçare për të parandaluar dëmtimin afatgjatë të testikujve dhe për të reduktuar rrezikun e problemeve të tjera.