Мушкилоти вобаста ба дандонҳои кӯдакон
Баровардани дандон дар кӯдакон
Аксарият фикр мекунанд кӯдаконе, ки дандон мебароранд:
- бисёр гиря мекунанд ё аз ҳад зиёд инҷиқ ба назар мерасанд;
- ба мисли ҳамеша нағз хӯрок намехӯранд;
- ҳама чизро бефарқона ба даҳони худ мебаранд, аз қабили бозичаҳо ва пешгиракҳо;
- бештар уребчаҳоро "ифлос" мекунанд;
- гӯши худро аз ҳамон тарафе, ки дандон мебарояд мекашанд.
Чунин аломатҳо метавонанд аз сабаби баровардани дандонҳо ба вуҷуд оянд, аммо онҳо метавонанд танҳо як қисми рушд ё натиҷаи сироят ё бемориҳои сабук бошанд.
Дандон баровардан: шумо чӣ кор карда метавонед?
Агар шумо аз дандонбарории кӯдаки худ нигарон бошед, шумо метавонед кӯшиш кунед:
- ба кӯдаки худ барои газидан ягон чиз диҳед, ба монанди дандонхояк, чӯткаи дандоншӯӣ ё пистонак;
- ба ӯ хӯрокҳои мулоимтар диҳед, ки хоидан лозим нест;
- ба фарзандатон чизи сахт диҳед, ба монанди нони қоқ ё ҳалқакулча, ки ӯ метавонед онро макад.
Ҳангоми дандонбарорӣ истифода бурдани гелҳо барои милк тавсия дода намешавад, зеро онҳо дардро таскин намедиҳанд ва таъсири манфии зараровар низ дошта метавонанд.
Агар фарзанди шумо худро бад ҳис кунад, беҳтар аст, ки ӯро ба табиби оилавӣ/педиатр баред, хусусан агар табларза, дарунравӣ ё дигар аломатҳо дошта бошад. Шояд сабаб дандонбарорӣ набошад.
Пистонак, макидани нарангушт ва ғиҷирроси дандон
Бисёре аз тифлон дар ин синну сол то ҳол пистонакро дӯст медоранд. Аммо дар ин марҳала хуб мебуд, ки кӯдакро тадриҷан аз пистонак тарки одат кунонед.
Макидани ангуштони калон ё дигар ангуштҳо дар тифлон ва кӯдакони хурдсол як рефлекси табиист. Барои аксари кӯдакон одати макидани ангушти калон ва дигар ангуштон тақрибан дар синни 2-4 солагӣ қатъ мешавад.
Кӯдакони хурдсол дандонҳои худро зуд-зуд ғиҷиррос мекунанд ва ин ҳолат одатан табобатро талаб намекунад. Баъзе кӯдакон ҷоғи худро хеле сахт мефишуранд, дигарон бошанд, дандонҳои худро чунон сахт ғиҷиррос мекунанд, ки садо мебарояд. Баъзе кӯдакон дар хоб дандонҳояшонро ғиҷиррос мекунанд. Бештари вақт ҳангоми ин корро кардан, онҳо худашон бедор намешаванд, аммо одамони дигар бедор мешаванд!
Дар аксари мавридҳо, ғиҷирроси дандон дер давом намекунад ва ба дандонҳои кӯдаки шумо осеб намерасонад. Аммо он метавонад ба кӯдаки шумо дарди сар, дарди дандон ё ҷоғ оварда расонад ё дандонҳои онҳоро фарсуда кунад. Агар ин ҳолат давом кунад ё шумо аз ин ҳолат нигарон бошед, аз духтури дандон маслиҳат пурсед.
