Ташаккули муносибат бо мураббиёни муассисаи кӯдаконаи томактабӣ
Манфиатҳои муносибатҳои устувор бо мураббиёни муассисаи томактабӣ
Агар Шумо бо мураббиёни муассисаи томактабӣ муносибати хуб ва эҳтиромона дошта бошед, Шумо ва фарзандатон манфиатҳои зиёде хоҳед дошт.
Манфиатҳо барои фарзанди Шумо
Аввалан, муносибати устувор ба Шумо имкон медиҳад, ки ба мураббиён маълумоти заруриро пешниҳод кунед, то ба фарзандатон барои ба осонӣ мутобиқ шудан ба шароити нав ва қаноатманд шудан аз вақти дар кӯдакистон гузаронида, кӯмак расонанд.
Муносибатҳои қавӣ инчунин барои рушди иҷтимоӣ ва эмотсионалии кӯдаки Шумо хубанд. Агар Шумо бо мураббиён муносибати мусбӣ ва эҳтиромона дошта бошед, он ба фарзандатон намунаи хуби рафтор карданро бо одамони дигар медиҳад. Ва агар фарзанди Шумо муносибатҳои нек ва эҳтиромонаро бубинад, ӯ бо дигарон чунин рафтор карданро ёд мегирад.
Ниҳоят, эҷоди муносибатҳои хуб бо мураббиён як роҳи олии зоҳир кардани таваҷҷӯҳ ва дастгирии фарзандатон дар ин қисми ҳаёти ӯ мебошад. Вақте ки Шумо ба кӯдаки худ таваҷҷӯҳ доред, ин ба ӯ кӯмак мекунад, ки худро муҳим ва арзишманд ҳис кунад.
Манфиатҳо барои Шумо
Манфиатҳои муносибати устувори мусбӣ бо мураббиёни кӯдакистон:
- таваҷҷӯҳ ва иштироки мураббиён ба раванди тарбия, таълим ва рушди кӯдак дар вақти дар боғча будан;
- мубоҳисаи осонтар бо мураббиён оид ба мушкилоти кӯдак ва ҷустуҷӯи муштараки ҳалли онҳо;
- имконияти гирифтани маълумоти боэътимод дар бораи ҳодисаҳое, ки дар гурӯҳи кӯдакистони кӯдаки Шумо рух медиҳад;
- имконияти иштирок дар барномаҳои таълимӣ (ба даст овардани маълумоти иловагӣ дар бораи рушди кӯдак).
Бо фарзанди худ эҳсосоти мусбии худро дар бораи кӯдакистон мубодила кунед, ба ӯ бигӯед, ки Шумо ба мураббиёни ӯ боварӣ доред - ин ба кӯдак кӯмак мекунад, ки ба шароити нав зуд мутобиқ шавад.
Бо мураббиёни боғча робитаи устувор барқарор мекунем
Шумо метавонед бо мураббиёни кӯдакистон муносибатро пеш аз дохил шудани фарзандатон ё аз рӯзҳои аввали ҳузур дар кӯдакистон оғоз кунед.
Дар ин ҷо баъзе идеяҳо ҳастанд:
- Вақти кори муассисаи бачагона ва соати қабули маъмурият (мудир) маълумот гиред. Бо мудир вохӯрда, дар бораи хусусиятҳо ва манфиатҳои боғчаи бачагона, ки интихоб кардаед, машварат кунед. Хоҳиш кунед, ки Шуморо ба сайри кӯтоҳмуддати боғча баранд, то бо мураббиён ва шароити муассисаи томактабӣ нағзтар шинос шавед.
- Бо мураббиёни гурўҳи кўдакистон шинос шавед, ки фарзанди Шумо ба он дохил мешавад, ба гурўҳ ташриф оваред.
- Ба мураббиён бигӯед, ки чаро ин муассисаи томактабиро интихоб кардед, дар боғча ба Шумо чӣ маъқул аст.
- Дар бораи фарзанди худ, хислат, шавқу завқи ӯ каме нақл кунед.
- Аз мураббиён пурсед, ки чӣ гуна Шумо метавонед фарзанди худро ба реҷаи кӯдакистон беҳтар омода созед. Оё талаботҳои мушаххасе вуҷуд доранд, ки фарзанди Шумо бояд риоя кунад ё қоидаҳое, ки ӯ бояд донад ва риоя кунад?
- Ба мураббиён маълумоти заруриро дар бораи кӯдаки худ диҳед. Масалан, оё ӯ аллергия дорад ё таҳаммулнопазирӣ ба ягон маҳсулот. Эҳтимол, фарзанди Шумо ягон изтироб ё тарс дорад, ки метавонад ба мутобиқшавии ӯ ба кӯдакистон таъсир расонад. Ба мураббиён дар бораи малакаҳо ё одатҳои кӯдаки худ нақл кунед, масалан: "Амина бо қошуқ нағзтар хӯрок мехӯрад" ё «Нигина ҳангоми хоб рафтан саропо дар зери рӯйпӯш хобиданро дӯст медорад".
Мулоқот бо мураббиёни муассисаи кӯдаконаи томактабӣ
Вақте ки фарзанди Шумо ба кӯдакистон рафтанро шурӯъ мекунад, муоширати мусбӣ бо мураббиёни ӯ асоси муносибатҳои устувор ва хуб бо онҳо мегардад.
Дар оғози рӯз бо эҳтиром салом гӯед ва ҳангоми ба хона бурдани кӯдакатон хайрухуш кунед - ин барои кӯдаки Шумо намунаи ибрат хоҳад буд ва ба ӯ кӯмак мекунад, ки номи мураббиёнро зудтар дар хотир нигоҳ дорад.
Ба дастовардҳо ва рафтори кӯдак дар давоми рӯз таваҷҷӯҳ кунед, ба мураббиён дар бораи кӯдаки худ, шавқу рағбат, чизҳои маъқул ё номаъқул ва ниёзҳои махсуси ӯ нақл кунед.
Чунин сӯҳбатҳо ба мураббиён кӯмак мекунанд, ки фарзанди Шуморо хубтар шиносанд, таълим ва инкишофи ӯро самараноктар ташкил кунанд ва ба ӯ нигоҳубини босифат расонанд. Дар ҷараёни ин гуна сӯҳбатҳо мураббиён имкон доранд, ки ба Шумо нақл кунанд, ки имрӯз рӯзи фарзандатон дар боғча чӣ гуна гузашт.
Ҳолатҳое ҳастанд, ки на ҳама вақт мустақиман бо мураббиён сӯҳбат кардан мумкин аст, аммо Шумо метавонед бо онҳо тавассути телефон ё паёмнависӣ тамос гиред. Дар бораи сарҳадҳои муошират дар хотир доред: мураббиён одамони оддӣ ҳастанд, онҳо вақти шахсии худ ва оилаҳои худро доранд, бинобар ин кӯшиш кунед, ки дар вақти корӣ бо онҳо муошират кунед.
Агар Шумо ба меҳнати онҳо миннатдорӣ баён кунед, мураббиён хеле шод хоҳанд шуд!
Чиро мураббиён бояд дар бораи фарзанди Шумо донанд
Мураббиёни кӯдаки Шумо мехоҳанд чизҳои зеринро донанд:
- шавқу завқи кӯдаки Шумо - ба шарофати ин маълумот онҳо метавонанд раванди омӯзиш ва рушди кӯдакро ҷолибтар гардонанд;
- ҳолатҳое, ки дар он кӯдаки Шумо хурсанд, ғамгин, ташвиш ё тарс дорад;
- роҳҳои муассири тасаллӣ ва дастгирии кӯдаки Шумо ҳангоми зарурат;
- ҳодисаҳои муҳим дар ҳаёти оилаи Шумо, аз қабили таваллуди кӯдак, марг, кӯчидан, ҷудошавӣ ё талоқ, то ин ки мураббиён барои мутобиқ шудан ба тағирот ба фарзандатон кӯмак расонанд.
Ҳама оилаҳо баъзан бо мушкилот рӯ ба рӯ мешаванд. Агар Шумо дар хона ё оила мушкилот дошта бошед, фикр кунед, ки ба мураббиён ё равоншиноси муассисаи томактабӣ барои кӯмак ё маълумот барои ҳалли масъалаҳое, ки метавонанд ба рафтор ва рушди кӯдаки Шумо таъсир расонанд, муроҷиат кунед. Барои мушкилоти оилавӣ метавонанд ба Шумо кӯмак расонанд ё ба дигар мутахассисон равона созанд.
Мушкилиҳои муассисаҳои бачагона
Баъзан метавонанд масъалаҳое вуҷуд дошта бошанд, ки Шумо бояд бо мураббиёни фарзандатон муҳокима кунед, ба монанди ашёи гумшуда ё одат кунонидан дар ҳоҷатхона. Агар Шумо аллакай бо мураббиён муносибати мусбӣ дошта бошед, муҳокимаи ин масъалаҳо ва дарёфти роҳҳои ҳалли созанда осонтар мешавад.
